1835-6 წლის „ოსმალეთის საქართველოს აღწერის მასალების“ თემაზე ბათუმის შოთა რუსთაველის სახელმწიფო უნივერსიტეტში სემინარი ჩატარდა. უნივერსიტეტის ასოცირებულმა პროფესორმა ზაზა შაშიკაძემ და ისტორიის აკადემიურმა დოქტორმა რუსლან ბარამიძემ სტუდენტებს გააცნეს შოთა რუსთაველის ეროვნული სამეცნიერო ფონდის მიერ დაფინანსებული სამეცნიერო გრანტის “ქართველ მუსლიმთა მატერიალური და სულიერი მემკვიდრეობა თურქეთში“ (საგრანტო ხელშეკრულება #57/06) ფარგლებში მიმდინარე წლის აგვისტო-სექტემბერში თურქეთის არქივებში წარმოებული კვლევის შედეგები. მკვლევარებმა მუშაობისას აღმოაჩინეს მრავალი საინტერესო დოკუმენტი, მათ შორის 1835/6 წლის აღწერის მასალები, რომლებიც მოიცავს ,,ოსმალეთის საქართველოს“ ტერიტორიას.

ბათუმის შოთა რუსთაველის სახელმწიფო უნივერსიტეტის სტუდენტთა სამეცნიერო ცენტრის, სტუდენტთა მხარდაჭერისა და მომსახურების სამსახურის, ისტორიის, არქეოლოგიის და ეთნოლოგიის დეპარტამენტის ერთობლივი პროექტის „მოგზაურობა საქართველოს ისტორიულ რუკაზე“ ეგიდით, შალვა რადიანის სახელობის ეთნოგრაფიულ მუზეუმში კონფერენცია გაიმართა. სამეცნიერო სესიაზე უნივერსიტეტის ბაკალავრიატისა და დოქტორანტურის საგანმანათლებლო საფეხურის სტუდენტებმა და პროფესორ-მასწავლებლებმა მოხსენებები წარმოადგინეს გურია-აჭარის ისტორიულ ურთიერთობებზე. კონფერენციის მონაწილეებმა ასევე გაიხსენეს ფილოლოგიის მეცნიერებათა დოქტორი, კრიტიკოსი, ლიტერატურათმცოდნე, პროფესორი შალვა რადიანი.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებით მწერალმა და მთარგმნელმა დათო ბარბაქაძემ საჯარო ლექცია წაიკითხა თემაზე: “პოეზია და ფილოსოფია~. ლექციის მიზანი იყო ფილოსოფიისა და პოეზიის ურთიერთმიმართების რეტროსპექტული ანალიზი გერმანული გამოცდილების მაგალითზე. მომხსენებელმა ისაუბრა გერმანულ პოეზიაში რეფლექსირებადი ლირიკისა და ფილოსოფიური ლირიკის სათავეებზე; მიმოიხილა, თუ როგორ აისახა შილერის, გოეთეს და რომანტიკოსების თეორიულ შემოქმედებაში ფილოსოფიისა და პოეზიის ურთიერთმიმართების პრობლემატიკა. მომხსენებლის საგანგებო ყურადღების საგანი იყო გერმანული რომანტიზმის ფილოსოფიის გადამწყვეტი როლი კლასიკური ევროპული მოდერნიზმის ფორმირებაში.

ჰუმანიტარულ მეცნიერებათა ფაკულტეტის ისტორიის, არქეოლოგიისა და ეთნოლოგიის დეპარტამენტის ორგანიზებით 1924 წლის ეროვნული აჯანყების 90 წლისადმი მიძღვნილი სამეცნიერო კონფერენცია გაიმართა. მკვლევარებმა სესიაზე მოხსენებები წარმოადგინეს საბჭოთა ხელისუფლების წინააღმდეგ მოწყობილ აჯანყებაზე, 1924 წელს საქართველოში განვითარებულ მოვლენებზე, აჯანყებულთა თავდადებაზე, ემიგრანტ მამულიშვილთა საქმიანობაზე, ამბოხების შედეგებსა და რეპრესიებზე. კონფერენცია მიზნად ისახავდა ბოლო პერიოდში წარმოებული კვლევის შედეგების წარმოჩენას.

ბათუმის შოთა რუსთაველის სახელმწიფო უნივერსიტეტში საერთაშორისო კონფერენცია ტარდება თემაზე: ,,მთარგმნელი და თარგმანმცოდნეობა ევროინტეგრაციის კონტექსტში“. ორი დღის განმავლობაში მრგვალ მაგიდასთან ევროკომისიის თარგმანმცოდნეობის დირექტორანტის წარმომადგენლები და სხვადასხვა ქვეყნის წამყვანი უნივერსიტეტების პროფესორები განიხილავენ ახალი ევროპული სამაგისტრო პროგრამების დანერგვის, ევროპულ უნივერსიტეტებთან პარტნიორობის, საგრანტო კონკურსებში მონაწილეობის საკითხებს. საერთაშორისო კონფერენციაზე ქართველი, ინგლისელი, ბელგიელი, უნგრელი, ავსტრიელი, ლატვიელი ექსპერტები და მკვლევარები მოხსენებებს წარმოადგენენ ისეთ მნიშვნელოვან საკითხებზე, როგორიცაა: კონფერენციის სინქრონისტის ახალი პროგრამების თარჯიმნის განვითარება სამაგისტრო სწავლების საფეხურზე და მისი წინაპირობები, კონფერენციის თარჯიმანთა მომზადება, პროგრამული უზრუნველყოფა, მატერიალურ-ტექნიკური ბაზებით სტუდენტთა უზრუნველყოფის პრობლემები და მათი გადაჭრის გზები, თარგმანმცოდნეობის ინსტიტუტიონალიზაცია და მისი ზეგავლენა სამაგისტრო პროგრამებზე.