არაფორმალური განათლების ცენტრის ეგიდით ბათუმის შოთა რუსთაველის სახელმწიფო უნივერსიტეტში ვიდეოკონფერენცია ჩატარდა თემაზე: ,,ახალგაზრდობის პრობლემები თანამედროვე მსოფლიოში“. საქართველოს ელჩი გაეროში ახალგაზრდულ საქმეთა მიმართულებით ლაშა შავყულაშვილი კავკასიის საერთაშორისო უნივერსიტეტიდან ჩაერთო და ახალგაზრდების აქტუალური პრობლემები განიხილა. ვიდეოკონფერენცია არაფორმალური ცენტრის კოორდინატორის ლალი ანთიძის ორგანიზებით გაიმართა და მასში 30 სტუდენტი მონაწილეობდა.

თბილისში საერთაშორისო კონკურსის Write on Competition-ის გამარჯვებულების დაჯილდოება ჩატარდა. ბათუმის შოთა რუსთაველის სახელმწიფო უნივერსიტეტის ინგლისური ფილოლოგიის მეორე, მესამე და მეოთხე კურსის სტუდენტებმა საერთაშორისო და რესპუბლიკურ კონკურსში პირველი და მეორე საპრიზო ადგილები დაიკავეს.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ორგანიზებით პროექტის - „უნივერსიტეტი-სკოლას“ ფარგლებში აბიტურიენტებისათვის ზოგად უნარებში იმიტირებული გამოცდა ჩატარდა. ღონისძიებაში მონაწილეობა მიიღო ბათუმის 20-მდე საჯარო და კერძო სკოლის, ასევე ფერიის, ქობულეთის, მახინჯაურის, ხელვაჩაურის, ორთაბათუმის, კირნათისა და ხულოს დამამთავრებელი კლასების 250-მა აბიტურიენტმა. იმიტირებული გამოცდა ფილოსოფიის დეპარტამენტის ასოცირებულმა პროფესორმა ლალი ანთიძემ და ფილოსოფიის სტუდენტბმა ჩაატარეს.

ევროპეისტიკის დეპარტამენტის ასისტენტ პროფესორმა, ნათია აბაშიძემ ბათუმის შოთა რუსთაველის სახელმწიფო უნივერსიტეტის ევროპეისტიკის დეპარტამენტის, რომანისტიკის მიმართულების პროფესორ-მასწავლებლებს წარუდგინა პრეზენტაცია თემაზე: „ემპირიული მასალების დამუშავება და კვლევის მეთოდები“ კორპუსლინგვისტიკაზე დაყრდნობით. ისაუბრა კორპუსლინგვისტიკის ძირითად მონაცემებზე და მის გამოყენებაზე ენის შესწავლისა თუ კვლევის პროცესში, სოციოლინგვისტურ ასპექტებზე. იგი ექვსი თვით იტალიაში პავიის უნივერსიტეტში ერასმუს მუნდუსის გაცვლითი პროგრამის (TEMPO) ფარგლებში იმყოფებოდა.

მარტყოფის და მარაბდის ბრძოლების 390 წლისთავისადმი მიძღვნილი კონფერენცია „ქართველი ხალხის ეროვნულ-გამათავისუფლებელი მოძრაობის ისტორიიდან“ (XVII ს-ის პირველი მესამედი) გაიმართა ბათუმის შოთა რუსთაველის სახელმწიფო უნივერსიტეტში. ისტორიის სპეციალობის II და III კურსის სტუდენტებმა სესიაზე მოხსენებები წარმოადგინეს ისეთ საკითხებზე, როგორიცაა: პოლიტიკური ვითარება ამიერკავკასიაში XVI ს. ბოლოსა და XVII ს. დასაწყისში, შაჰ-აბასის ლაშქრობები აღმოსავლეთ საქართველოში, დედოფალი კახეთისა - ქეთევანი, მარტყოფის აჯანყება, მარაბდის ბრძოლა, გიორგი სააკაძე - გმირი თუ მოღალატე, ბაზალეთის ბრძოლა, გზა ევროპისაკენ - ქართველი დიპლომატ ნიკოლოზ ჩოლოყაშვილი. კონფერენცია ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის, არქეოლოგიის და ეთნოლოგიის დეპარტამენტისა და სტუდენტთა სამეცნიერო ცენტრის ორგანიზებით ჩატარდა.