86 წლის ასაკში გარდაიცვალა საქართველოს მეცნიერებათა აკადემიის ვიცე-პრეზიდენტი და აკადემიური საბჭოს წევრი, ილიას სახელმწიფო უნივერსიტეტის პროფესორი, ემერიტუსი, ცნობილი მეცნიერი გურამ თევზაძე. პროფესორი გურამ თევზაძე 2005 წლამდე იყო ივანე ჯავახიშვილის სახელობის თბილისის სახელმწიფო უნინვერსიტეტის ფილოსოფიის ისტორიის კათედრის გამგე. აღიარებულმა ფილოსოფოსმა შექმნა თანამედროვე ქართული ფილოსოფიური სკოლა და უდიდესი წვლილი შეიტანა ახალი თაობის მეცნიერების აღზდაში. პროფესორი გურამ თევზაძე ავტორია 218 ნაშრომის, მათ შორისაა: „ანტიკური ფილოსოფია“, „შუა საუკუნეების ფილოსოფია“, „აღორძინების ეპოქის ფილოსოფია“, „ახალი ფილოსოფიის ისტორია“, „XX საუკუნის ფილოსოფიის ისტორია“, „იმანუელ კანტი“, „გერმანული ნეოკანტიანელობის შემეცნების თეორია“, „ნიკოლაი ჰარტმანის ონტოლოგიის კრიტიკა“, „ვალენტინ ვაიგელი“„თეოფრასტე პარაცელსი“ და სხვ.

გარდაიცვალა ცნობილი მეცნიერი, ბათუმის შოთა რუსთაველის სახელმწიფო უნივერსიტეტის ემერიტუს-პროფესორი, საქართველოს მეცნიერებათა ეროვნული აკადემიის ივანე ჯავახიშვილის პრემიის ლაურეატი მერი ცინცაძე. ღვაწლმოსილ პროფესორს მნიშვნელოვანი წვლილი მიუძღვის ენათმეცნიერების განვითარებაში, გამოქვეყნებული აქვს ათეულობით სამეცნიერო ნაშრომი და მონოგრაფიები, ეწეოდა სარედაქციო საქმიანობას, მკვლევართა შორის პირველმა ისაუბრა კლარჯული კილოს შესახებ, სამეცნიერო მიმოქცევაში შემოეტანა ქართული ენათმეცნიერებისათვის უცხო დიალექტის მასალები.

22 ივნისს, 13:00 საათზე, ბათუმის შოთა რუსთაველის სახელმწიფო უნივერსიტეტში (42-ე აუდიტორია) გაიმართება ილიას სახელმწიფო უნივერსიტეტის პროფესორის, პოეტ ცირა ბარბაქაძის პირველი ტვიტერატურული კრებულის - „ყველაფერი (თ)ამაშია“ წარდგენა. ღონისძიების ფარგლებში წიგნის ავტორი ასევე წაიკითხავს საჯარო ლექციას თემაზე: „რა არის ტვიტერატურა?“.

ბათუმის შოთა რუსთაველის სახელმწიფო უნივერსიტეტის დიგიტალური ჰუმანიტარიის VII საერთაშორისო საზაფხულო სკოლა აცხადებს მონაწილეთა მიღებას. 2018 წლის 24 აგვისტოდან 2 სექტემბრამდე ბსუ-ში დიგიტალური ჰუმანიტარიის ცენტრის ორგანიზებით ჩატარდება საერთაშორისო საზაფხულო სკოლა და ვორკშოფი თემაზე: „დიგიტალური ქართველოლოგია, კორპუსლინგვისტიკა, ენისა და კულტურის ციფრული დოკუმენტირება". საზაფხულო სკოლა მონაწილეებს საშუალებას მისცემს, გაეცნონ ქართველოლოგიაში დიგიტალური კვლევების განსახორციელებლად აუცილებელ მეთოდურ და ტექნოლოგიურ საშუალებებს (XML, TEI, ELAN, FLEX), დიგიტალური ჰუმანიტარიის ცნობილი ცენტრების (ფრანკფურტის გოეთეს უნივერსიტეტი, SOAS-ის უნივერსიტეტი ლონდონში, ლიდსის უნივერსიტეტი და სხვა) გამოცდილებას და აქტიურად ჩაერთონ ციფრული რესურსების შექმნაში.