ახალი ამბები

შოთა რუსთაველის სახელმწიფო უნივერსიტეტის რექტორმა, პროფესორმა ალიოშა ბაკურიძემ და ფრანკფურტის გოეთეს სახელობის უნივერსიტეტის ემპირიული ლინგვისტიკის ინსტიტუტის ხელმძღვანელმა იოსტ გიპერტმა ხელი მოაწერეს თანამშრომლობის მემორანდუმს. ხელშეკრულება ითვალისწინებს საგანმანათლებლო პროგრამების ელექტრონული სწავლების მეთოდის დანერგვას, ერთობლივი საერთაშორისო საზაფხულო სკოლის ჩატარებას, უმაღლესი სასწავლებლის ბაზაზე მულტილინგვალური კორპუსის, ქართული ლიტერატურის თარგმნითი კორპუსის შექმნას და სასწავლო-სამეცნიერო სფეროებში გამოცდილების გაზიარებას.

რსუ-ს განათლებისა და მეცნიერებათა ფაკულტეტის ჯანდაცვის მიმართულების სტუდენტებმა პროექტ "სტაჟიორის" ფარგლებში სამთვიანი სტაჟირება გაიარეს სხვადასხვა სამედიცინო დაწესებულებასა და სადაზღვევო კომპანიებში. მომავალ მედიკოსებს შესაძლებლობა მიეცათ აქტიურად ჩართულიყვნენ კლინიკებისა და საავადმყოფოების მუშაობაში, გაცნობოდნენ მისი საქმიანობის სპეციფიკას. მცირე საკონფერეცნიო დარბაზში გამართულ შეხვედრაზე საქართველოს ახალგაზრდა მედიკოსთა კავშირის აჭარის რეგიონული წარმომადგენლობის ხელმღვანელმა მამუკა აბულაძემ პროექტის მონაწილე 16 სტუდენტს სერტიფიკატები გადასცა. პროექტი "სტაჟიორი" საქართველოს ახალგაზრდა მედიკოსთა კავშირის აჭარის რეგიონალური წარმომადგენლობისა და აჭარის ჯანმრთელობის, შრომისა და სოციალური დაცვის სამინისტროს ორგანიზებით ხორციელდება. პროექტის მეორე ეტაპი 3 ოქტომბერს იწყება.

ეკონომიკის განვითარების ტენდენციები, მენეჯმენტი, მარკეტინგი, ეკონომიკური პოლიტიკის პრიორიტეტები, ბიზნესის განვითარება და პერსპექტივები - ეს ის საკითხებია, რომლებზეც ქართველი და უცხოელი მეცნიერები ორი დღის განმავლობაში საერთაშორისო სამეცნიერო–პრაქტიკული კონფერენციის „ეკონომიკისა და ბიზნესის განვითარების ტენდენციები თანამედროვე ეტაპზე“ ფარგლებში იმუშავებენ. კონფერენცია შოთა რუსთაველის სახელმწიფო უნივერსიტეტისა და საქართველოს ეკონომიკური განათლებისა და განვითარების ცენტრის ორგანიზებით იმართება. სამეცნიერო ფორმუმი მიზნად ისახავს ეკონომიკასა და ბიზნესში მეცნიერების, განათლების და საინფორმაციო ტექნოლოგიების როლის წარმოჩენასა და საერთაშორისო გამოცდილების გაზიარებას. შემუშავდება პრაქტიკული წინადადებები, რომელიც ხელს შეუწყობს ეკონომიკური პოლიტიკის პრიორიტეტების ოპტიმიზაციას.

შოთა რუსთაველის დარბაზში საერთაშორისო კონფერენცია დაიწყო თემაზე: „დავების ალტერნატიული გადაწყვეტის (ADR) საშუალებათა როლი სამხრეთ კავკასიის ქვეყნების წარმომადგენელთა მონაწილეობით არსებულ კერძო სამართლებრივ დავებში“. ქართველი, გერმანელი, ყაზახი, უკრაინელი, პოლონელი, თურქი, აზერბაიჯანელი, სომეხი არბიტრები და მოქმედი ადვოკატები ერთმანეთს ორი დღის განმავლობაში არბიტრაჟისა და მედიაციის სფეროში არსებულ გამოცდილებას გაუზიარებენ და ერთობლივი მუშაობის საკითხებზე შეთანხმდებიან. ფორუმი ხელს შეუწყოს სხვადასხვა ქვეყანაში დავების წარმოებისათვის დამახასიათებელი, კანონში არსებული თავისებურებებისა და სირთულეების გაცნობას, საზოგადოებაში არბიტრებისა და მედიატორის როლის გაზრდას, საქართველოს თანამედროვე საარბიტრაჟოს სისტემაში ჩართვას, არბიტრაჟის კოლეგიაში სხვადასხვა ეროვნების წარმომადგენლების შეყვანას და სხვადასხვა ქვეყანაში არსებული პრობლემების ერთობლივად მოგვარებას.

ცნობილი მათემატიკოსები თანამედროვე ალგებრის სამეცნიერო კვლევის შედეგებსა და პრობლემებზე სამუშაოდ საერთაშორისო სამეცნიერო კონფერენციაზე ,,თანამედროვე ალგებრა და მისი გამოყენება“ მეორედ შეიკრიბნენ. საერთაშორისო კონფერენცია შოთა რუსთაველის სახელმწიფო უნივერსიტეტში საზეიმოდ გაიხსნა და მონაწილეებს აჭარის უმაღლესი საბჭოს თავმჯდომარე, პროფესორი მიხეილ მახარაძე, უნივერსიტეტის რექტორი, პროფესორი ალიოშა ბაკურიძე და დარგის წამყვანი მეცნიერები მიესალმენ. ერთკვირიანი სამეცნიერო ფორუმი, რომელშიც 12 ქვეყნის 60 მკვლევარი მონაწილეობს, საქართველოს ეროვნული სამეცნიერო ფონდის მიერ დაფინანსებული სამეცნიერო გრანტების (GNSF/STO8/3-383 და GNSF/STO8/3-396) ფარგლებში იმართება. საერთაშორისო სამეცნიერო კონფერენციაზე წარმოდგენილი მოხსენებები ორ ტომად გამოიცემა.