ახალი ამბები

შოთა რუსთაველის სახელმწიფო უნივერსიტეტის სტუდენტური თეატრის სცენაზე რეჟისორ როინ დვალის სპექტაკლის ,,ქართველების“ პრემიერა შედგა. ერთმოქედებიანი სპექტაკლი თამაზ მეტრეველის პიესის ,,სუპერ ქართვლების“ მიხედვით დაიდგა და მასში სხვადასხვა ფაკულტეტის სტუდენტები მონაწილეობდნენ. არაპროფესიონალი მსახიობებით დაკომპლექტებული დასი პრემიერისთვის 6 თვის განმავლობაში ემზდებოდა. სპექტაკლი რსუ-ს სტუდენტთა მომსახურებისა და მხარდაჭერის სამსახურის კულტურის ცენტრის ორგანიზებით გაიმართა და თეატრის საერთაშორისო დღეს მიეძღვნა.

შოთა რუსთაველის სახელმწიფო უნივერსიტეტში ტურიზმის ფაკულტეტის პრეზენტაცია გაიმართა. წარდგინებას აჭარის მთავრობის თავმჯდომარე ლევან ვარშალომიძე, ბათუმის მერი რობერტ ჩხაიძე, აჭარის განათლების, კულტურისა და სპორტის მინისტრი გია აბულაძე, დიპლომატიური კორპუსის წარმომადგენლები, წამყვანი სასტუმროების მენეჯერები, დარგის ექსპერტები, პროფესორ-მასწავლებლები და სტუდენტები ესწრებოდნენ. სიტყვით გამოსვლისას აჭარის მთავრობის თავმჯდომარემ ლევან ვარშალომიძემ ფაკულტეტის შექმნის მნიშვნელობაზე, პერსპექტივებზე და ტურიზმის განვითარების აუცილებლობაზე ისაუბრა. უნივერსიტეტის რექტორმა, პროფესორმა ალიოშა ბაკურიძემ მოწვეულ სტუმრებს ფაკულტეტის მიზნები და ამოცანები, ხოლო ფაკულტეტის დეკანის მოვალეობის შემსრულებელმა როსტომ ბერიძემ საგანმანათლებლო პროგრამები გააცნო.

განათლების ხარისხის განვითარების ეროვნულმა ცენტრმა შოთა რუსთაველის სახელმწიფო უნივერსიტეტში აჭარაში არსებული უმაღლესი სასწავლებლების ადმინისტრაციისა და პროფესორ-მასწავლებლებისათვის ავტორიზაციისა და აკრედიტაციის საკითხებზე ორდღიანი ტრენინგი ჩაატარა. განათლების ხარისხის განვითარების ეროვნული ცენტრის დირექტორმა დავით კერესელიძემ უმაღლესი საგანმანათლებლო დაწესებულების სტატუსის მოპოვების პროცედურასა და საგანმანათლებლო პროგრამებისა და სილაბუსების შემუშავება-დახვეწის საკითხებზე ისუბრა. შეკრებილთ ასევე ის რჩევები და რეკომენდაციები გააცნო, რომელიც უმაღლეს სასწავლებლებს ავტორიზაციისა და აკრედიტაციის გავლაში დაეხმარება.

სოციალურ მეცნიერებათა და ისტორიის, არქეოლოგიისა და ეთნოლოგიის დეპარტემენტების ორგანიზებით წიგნის - ,,ბრძოლა ბათუმისთვის, 1921 წლის 18-20 მარტი“ წარდგინება გაიმართა. მონოგრაფია რსუ-სა და სხვადასხვა უმაღლესი სასწავლებლის 11 მკვლევრის ნაშრომს აერთიანებს და ეძღვნება 1921 წლის თებერვალ-მარტის ომის ბოლო პერიოდს - ბრძოლას ბათუმისთვის. ნაშრომში განხილულია საკითხის ქართული და თურქული ისტორიოგრაფია, ბათუმსა და მის ოლქში არსებული ვითარება, ქალაქის გარშემო მიმდინარე დიპლომატიური ბრძოლა და საომარი მოქმედებები. ნაშრომში ნაჩვენებია ასევე ომში დაღუპულთა საძმო საფლავის შემდგომი ბედი და 1921 წლის თებერვალ-მარტის მოვლენების ასახვა ქართულ მხატვრულ ლიტერატურაში.

დიდი ბრიტანეთის სურსათისა და გარემოს კვლევის სააგენტოს (FERA) წამყვანმა სპეციალისტმა მოლეკულურ ბიოლოგიაში რიჩარდ თუეითსმა საჯარო ლექცია წაიკითხა თემაზე: ,,დიდი ბრიტანეთის სურსათისა და გარემოს კვლევის სააგენტოსა და შოთა რუსთაველის სახელმწიფო უნივერსიტეტის ფიტოპათოლოგიის ინსტიტუტს შორის სამეცნიერო თანმაშრომლობა“. ექსპერტმა საერთაშორისო სამეცნიერო - ტექნიკური ცენტრის (ISTC) საპარტნიორო პროექტის (№G 1775p) ,,საქართველოს სოფლის მეურნეობის განვითარების ხელშეწყობა: სამი მნიშვნელოვანი სასოფლო-სამეურნეო კულტურის დაავადებისადმი გამძლეობის შესწავლა მოსავლიანობის მართვის გზების გაუმჯობესების მიზნით საქართველოსა და სამხრეთ კავკასიის სხვა ქვეყნებში“ შედეგები შეაჯამა. პროექტი დიდი ბრიტანეთის თავდაცვის სამინისტროსა და გლობალური პარტნიორობის პროგრამის მხარდაჭერით ხორციელდება.