ახალი ამბები

ისრაელის ქართულენოვანმა კამერულმა თეატრმა შოთა რუსთაველის სახელმწიფო უნივერსიტეტის სცენაზე ელისაბედ ყვავილაშვილის პიესა „მოპატიჟება მოწყალებაზე" წარმოადგინა. ერთმოქმედებიან დრამაში თეატრის დამაარსებელი და სამხატვრო ხელმძღვანელი ნაზი ნანიკაშვილი და თეატრის წამყვანი მსახიობი შოთა ეთერაშვილი მონაწილეობენ. სპექტაკლი უცხოეთში მცხოვრები ქართველი ემიგრანტების ცხოვრებასა და პრობლემებს ასახავს. წარმოდგენის შემდეგ ისრაელის ცნობილმა დუეტმა „ელეგიამ“ კომპოზიტორისა და შემსრულებლის ალექსანდერე პელეგისა (ელიგულაშვილი) და მომღერალ ლუიზა მანაშეროვის შემადგენლობით კონცერტი გამართა.

საქართველოს კონტროლის პალატის თავმჯდომარის მოადგილე დევი ვეფხვაძე და აუდიტორები შოთა რუსთაველის სახელმწიფო უნივერსიტეტის სტუდენტებსა და პროფესორ-მასწავლებლებს შეხვდნენ. ღონისძიების მიზანი იყო კონტროლის პალატის საქმიანობის გაცნობა და ახალგაზრდების საჯარო სექტორის მართვითა და აუდიტით დაინტერესება. პალატის წარმომადგენლებმა შეხვედრაზე ისაუბრეს ისეთ თემებზე, როგორიცაა: კონტროლის პალატის ახალი მანდატი, აუდიტის საერთაშორისო სტანდარტები და მოქალაქეთა ინფორმირებულობა. რსუ-ს სტუდენტებისათვის აუდიტორ-სტაჟიორთა სასწავლო პროგრამა განხორციელდება, რაც მათ დაეხმარება აუდიტის სფეროში თანამედროვე სტანდარტების შესაბამისი განათლების მიღებაში.

ფილოსოფიის დეპარტამენტის ორგანიზებით შოთა რუსთაველის დარბაზში ოთხტომეულის „ქართული ფილოსოფიური აზრის ისტორიის“ წარდგინება გაიმართა. ფუნდამენტური ნარკვევის ერთ-ერთმა ავტორმა, რედაქტორმა და პროექტის ხელმძღვანელმა, პროფესორმა მიხეილ მახარაძემ პრეზენტაციაზე ოთხტომეულის შექმნის ოცდახუთწლიან ისტორიასა და ქართული ფილოსოფიის განვითარებაზე ისაუბრა. რსუ-ს რექტორმა, პროფესორმა ალიოშა ბაკურიძემ, პროფესორ-მასწავლებლებმა და დარგის სპეციალისტებმა „ქართული ფილოსოფიური აზრის ისტორია“ განიხილეს და მისი მნიშვნელობა შეაფასეს. პროფესორი მიხეილ მახარაძე ოთხტომეულის მომზადებისა და გამოცემისათვის 2011 წელს ეროვნული პრემიით დაჯილდოვდა.

„სტუდენტური დღეები-2011“ ქედაში ინტერმედიით დასრულდა. სტუდენტურ დღეებში შოთა რუსთაველის სახელმწიფო უნივერსიტეტის, ბათუმის სახელმწიფო საზღვაო აკადემიისა და ბათუმის ნავიგაციის სასწავლო უნივერსიტეტის სტუდენტები მონაწილეობდნენ. სპეციალურმა ჟიურიმ ახალგაზრდების შესაძლებლობები სხვადასხვა ნომინაციაში შეაფასა. გრან-პრის მფლობელი შოთა რუსთაველის სახელმწიფო უნივერსიტეტი გახდა. საუკეთესო ფოლკლორული და მუსიკალური ნომრებისა და საუკეთესო მკლავჭიდელების ნომინაციების პრიზიორებად რსუ-ს სტუდენტები დასახელდნენ.

შოთა რუსთაველის სახელმწიფო უნივერსიტეტში კურსდამთავრებულთა საზეიმო გაცილება მოეწყო. ახალგაზრდებს უნივერსიტეტის რექტორმა, პროფესორმა ალიოშა ბაკურიძემ, წმინდა ეკატერინეს სახელობის ტაძრის წინამძღვარმა, დეკანოზმა მამა შიომ, რექტორის მოადგილეებმა ნათია წიკლაშვილმა, ირაკლი ბარამიძემ, დეკანებმა და პროფესორ-მასწავლებლებმა გზა დაულოცეს და წარმატებები უსურვეს. უმაღლესი სასწავლებელი წელს 499-მა სტუდენტმა დაამთავრა. წარჩინებული სწავლისა და სტუდენტურ ცხოვრებაში შეტანილი წვლილისათვის 87 კურსდამთავრებულს სიგელები გადაეცა. კურსდამთავრებულთა საზეიმო გაცილება კონცერტით დასრულდა, რომელშიც მონაწილეობა მიიღეს უნივერსიტეტის ქორეოგრაფიულმა ანსამბლმა ,,ტბეთმა“, გოგონათა და ვაჟთა ვოკალურმა ანსამბლმა, ბავშვთა ქორეოგრაფიულმა ანსამბლმა და უმაღლესი სასწავლებლის სხვა შემოქმედებითმა ჯგუფებმა.