კომპანია „ჯიემჯის“ წარმომადგენლები ბათუმის შოთა რუსთაველის სახელმწიფო უნივერსიტეტის ტექნოლოგიური ფაკულტეტის სტუდენტებსა და პროფესორ-მასწავლებლებს შეხვდნენ და დარგის სიახლეები გააცნეს. შეხვედრის შემდეგ მომავალმა მშენებლებმა ბათუმში, ს. ჟღენტის ქუჩაზე, #1-ში მშენებარე ხუთვარსკვლავიანი სასტუმრო და გასართობი კომპლექსი დაათვალიერეს. უმაღლეს საგანმანათლებლო დაწესებულებასა და კომპანიას შორის გაფორმებული თანამშრომლობის მემორანდუმის ფარგლებში სტუდენტები „ჯიემჯიში“ სასწავლო პრაქტიკასა და სტაჟირებას გადიან. კომპანიაში დასაქმებული არიან უნივერსიტეტის კურსდამთავრებულები და ამჟამად, პარტნიორ ორგანიზაციაში პროფესიულ უნარ-ჩვევებს 2 სტუდენტი ეუფლება.

ქალაქ ბათუმის მერი გიორგი ერმაკოვი უნივერსიტეტში ბსუ-ს ტექნოლოგიური ფაკულტეტის სტუდენტებს შეხვდა და ახალი მუნიციპალური პროგრამა ,,უმაღლესი განათლების ხელშეწყობა“ გააცნო. პროგრამა წარმატებული სტუდენტებისთვის ლუკა ასათიანის სახელობის სტიპენდიის გაცემას ითვალისწინებს. 150 და 200-ლარიანი სტიპენდია 2014 წელს ჩარიცხული უმაღლესი აკადემიური განათლების პირველი და მეორე საფეხურის საგანამანათლებლო პროგრამების იმ სტუდენტებზე გაიცემა, რომლებიც რეგისტრირებულნი არიან ქ. ბათუმის მუნიციპალიტეტის ტერიტორიაზე. კონკურსში მონაწილეობა შეუძლიათ მშენებლობისა და არქიტექტურის მიმართულების სტუდენტებს, რომელთაც მიღებული აქვთ დადებითი შეფასება არანაკლებ 81-90 ქულა. პროგრამის ფარგლებში 30 სტუდენტი დაფინასდება.

ცნობილი ქართველი მეცნიერისა და საზოგადო მოღვაწის, საქართველოს მეცნიერებათა ეროვნული აკადემიის წვერ-კორესპოდენტ ვანო პაპუნიძის 75 წლისადმი მიძღვნილი საიუბილეო სხდომა გაიმართა ბათუმის შოთა რუსთაველის სახელმწიფო უნივერსიტეტში. ბიოლოგიის მეცნიერებათა დოქტორს, პროფესორ ვანო პაპუნიძეს მნიშვნელოვანი წვლილი მიუძღვის საქართველოში აგროსატყეო და ზოგადი ბიოლოგიური მეცნიერების დარგების განვითარებაში, გამოქვეყნებული აქვს 120-მდე სამეცნიერო ნაშრომი, მათ შორის 21 მონოგრაფიული ხასიათის წიგნი. მკვლევარს იუბილე მიულოცეს და წარმატებები უსურვეს უნივერსიტეტის რექტორის მოადგილეებმა ირაკლი ბარამიძემ, ნათია წიკლაშვილმა, საქართველოს მეცნიერებათა ეროვნული აკადემიის პრეზიდენტმა, აკადემიკოსმა გიორგი კვესიტაძემ, აღმასრულებელი და საკანონმდებლო ხელისუფლების წარმომადგენლებმა, კოლეგებმა და მეგობრებმა.

დამდეგი შობა-ახალი წელი ტექნოლოგიურმა ფაკულტეტმა საახალწლო ღონისძიებით აღნიშნა. სტუდენტებსა და პროფესორ-მასწავლებლებს დღესასწაული ბათუმის შოთა რუსთაველის სახელმწიფო უნივერსიტეტის რექტორის მოადგილეებმა ასოცირებულმა პროფესორმა ირაკლი ბარამიძემ, პროფესორმა ნათია წიკლაშვილმა, ფაკულტეტის დეკანმა გიზო ფარხცალაძემ მიულოცეს, წარმატებები უსურვეს და გასული წელი შეაჯამეს. სტუდენტების მიერ ორგანიზებულ საახალწლო საღამოზე ფაკულტეტის შემოქმედებითი ჯგუფები წარსდგნენ.

ევროკავშირის წარმომადგენელი საქართველოში ხოან ეჩანოვი, აჭარის ა.რ. სოფლის მეურნეობის მინისტრი ზაურ ფუტკარძე, აგროსერვის ცენტრის დირექტორი გოჩა ბერიძე, გაეროს განვითარების პროგრამის ეკონომიკური გუნდის ხელმძღვანელი გიორგი ნანობაშვილი და პროექტის „ENPARD Ajara“ მენეჯერი ლაშა კომახიძე ბათუმის შოთა რუსთაველის სახელმწიფო უნივერსიტეტს ეწვივნენ. უნივერსიტეტის რექტორთან, პროფესორ ალიოშა ბაკურიძესთან, ტექნოლოგიური ფაკულტეტის სტუდენტებთან და პროფესორ-მასწავლებლებთან გამართულ შეხვედრაზე დაიგეგმა აგრარული მიმართულების სტუდენტების სტაჟირება, გაცვლითი პროგრამების განხორციელება და ერთობლივი კვლევების წარმოება. სოფლის მეურნეობის განვითარების მხარდაჭერის პროგრამის ფარგლებში უმაღლეს საგანმანათლებლო დაწესებულებას საჩუქრად სასოფლო-სამეურნეო მიმართულების ლიტერატურა გადაეცა.