ტექნიკის მეცნიერებათა დოქტორმა, საქართველოს მეცნიერებათა აკადემიის აკადემიკოსმა, პროფესორმა ელგუჯა მეძმარიაშვილმა ბათუმის შოთა რუსთაველის სახელმწიფო უნივერსიტეტში საჯარო ლექციები წაიკითხა საინჟინრო ტექნოლოგიებზე. მომხსენებელმა ლექციაზე ყურადღება გაამახვილა შემდეგ აქტუალურ საკითხებზე: ტრანსფორმირებადი საინჟინრო სისტემები დედამიწაზე და კოსმოსში, ექსტრემალური ხიდები და საქართველოს ტერიტორიის საინჟინრო მომზადება თავდაცვისათვის. პროფესორი ელგუჯა მეძმარიაშვილი პირველი ქართული კოსმოსური ობიექტის გენერალური კონსტრუქტორია. მან საქართველოში ჩამოაყალიბა და განავითარა კოსმოსური ტექნიკისა და სამხედრო-საინჟინრო დარგების სამეცნიერო, აკადემიური, პრაქტიკული მიმართულებები. ლექციათა ციკლი აჭარის განათლების, კულტურისა და სპორტის სამინისტრო განათლების უმაღლესი განათლების ხელშეწყობის ქვეპროგრამის ფარგლებში ჩატარდა.

საქართველოს სოფლის მეურნეობის მეცნიერებათა აკადემიის აკადემიკოს მამია გოგოლიშვილის 100 წლის იუბილე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. უმაღლეს საგანმანათლებლო დაწესებულებაში ცნობილი მეცნიერისა და საზოგადო მოღვაწის სახელობის აუდიტორია გაიხსნა და საიუბილეო შეხვედრა გაიმართა. უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს წევრებმა, საქართველოს მეცნიერებათა ეროვნული აკადემიის წევრებმა, კოლეგებმა, საზოგადოების წარმომადგენლებმა და სტუდენტებმა მის ღვაწლსა და მიღწევებზე ისაუბრეს. აკადემიკოსმა მამია გოგოლიშვილმა ნაყოფიერი საზოგადოებრივი და მეცნიერულ-პედაგოგიური გზა განვლო. ცნობილი მეცნიერი ასზე მეტი სამეცნიერო ნაშრომის ავტორია, რომელთაგან ცხრა მონოგრაფიაა.

17-21 სექტემბერს ტექნოლოგიური ფაკულტეტის აგრარულ მიმართულებაზე (მწვანე კონცხი) მოსავლის აღების შემდგომი დამუშავებისა და სამაცივრო ტექნოლოგიების საკითხებზე ტრენინგი ჩატარდა. სემინარი აშშ-ს საერთაშორისო განვითარების სააგენტოს (USAID) საქართველოს სასოფლო-სამეურნეო წარმოების ეფექტიანობის აღდგენის პროექტით (REAP) გაიმართა. ლექციები დარგის ექსპერტებმა რიჩარდ დაუდელმა და ჰალა ჩაინემ ჩაატარეს. ტრენინგს ბსუ-ს პროფესორ-მასწავლებლები, სტუდენტები, აჭარის საწარმოთა ტექნოლოგები, ქუთაისის აკაკი წერეთლის სახელობის უნივერსიტეტის პროფესორები და სტუდენტები ესწრებოდნენ.

ტექნიკის მეცნიერებათა დოქტორის, პროფესორ ჯემალ ბერიძის 70 წლისადმი მიძღვნილი საიუბილეო საღამო გაიმართა ბათუმის შოთა რუსთაველის სახელმწიფო უნივერსიტეტში. ღვაწლმოსილ პროფესორს იუბილე მიულოცეს და მის მიღწევებზე ისაუბრეს უნივერსიტეტის რექტორმა, პროფესორმა ალიოშა ბაკურიძემ, აჭარის უმაღლესი საბჭოს თავმჯდომარემ ავთანდილ ბერიძემ, ტექნოლოგიური ფაკულტეტის დეკანმა გიზო ფარცხალაძემ, აკადემიკოსმა ვანო პაპუნიძემ, მწერალმა და საზოგადო მოღვაწემ რამაზ სურმანიძემ, კოლეგებმა და მეგობრებმა. პროფესორი ჯემალ ბერიძე წლების განმავლობაში მოწვეულ პროფესორად მუშაობს ბათუმის შოთა რუსთაველის სახელმწიფო უნივერსიტეტის ტექნოლოგიურ და ქუთაისის აკაკი წერეთლის სახელმწიფო უნივერსიტეტის საინჟინრო-ტექნიკურ ფაკულტეტებზე. ცნობილ მკვლევარს მნიშვნელოვანი წვლილი მიუძღვის კავშირგაბმულობის განვითარებისა და მომავალი თაობის აღზრდის საქმეში. მეცნიერს გამოქვეყნებული აქვს 80-ზე მეტი სამეცნიერო-ტექნიკური ხასიათის ნაშრომი, 10-ზე მეტი სახელმძღვანელო და დამხმარე სახელმძღვანელო. 2014 წელს გამოიცემა მონოგრაფია „თანამედროვე უსადენო ქსელები: მდგომარეობა და განვითარების პერსპექტივები“.

საქართველოს ტექნიკური უნივერსიტეტის პროფესორ რეზო სტურუას შემოქმედებითი საღამო "მზე, რომელიც წვიმამ გადაიყოლა" გაიმართა ბათუმის შოთა რუსთაველის სახელმწიფო უნივერსიტეტში. საღამოზე პროფესორ-მასწავლებლებმა და მწერლებმა მეცნიერის პოეზია შეაფასეს, ხოლო ტექნოლოგიური ფაკულტეტის სტუდენტებმა მისი ლექსები წაიკითხეს. ღონისძიების დასასრულს ავტორმა საზოგადოებას საკუთარი შემოქმედება გააცნო და წიგნი "მზე, რომელიც წვიმამ გადაიყოლა" წარუდგინა. ლექსების კრებული გამომცემლობა “მოაზროვნემ” გამოსცა და მასში პროფესორ რეზო სტურუას ბოლო პერიოდში შექმნილი 100 ლექსია შესული. შემოქმედებითი საღამო ტექნოლოგიური ფაკულტეტის ორგანიზებით ჩატარდა.