არასამთავრობო ორგანიზაცია „საორსა“-ს ორგანიზებით პროექტის „პროფესიების არჩევის პროგრამა“ ფარგლებში ქედის, შუახევის და ხულოს მუნიციპალიტეტების საჯარო სკოლების მოსწავლეებისათვის განათლების ფორუმი ჩატარდა. პროფორიენტაციის ფორუმის მონაწილე სკოლის მოსწავლეები სხვადასხვა უმაღლესი და პროფესიული საგანმანათლებლო დაწესებულებების წარმომადგენლებს შეხვდნენ და სხვადასხვა პროფესიებს გაეცნენ. ბათუმის შოთა რუსთაველის სახელმწიფო უნივერსიტეტის პროფესიული პროგრამების მართვისა და უწყვეტი განათლების ცენტრის წარმომადგენლებმა მოსწავლეებს ბსუ-ს პროფესიული საგანმანათლებლო პროგრამები და პროგრამებზე მიღების წესები წარუდგინეს.

ბსუ-ს პროფესიული პროგრამების მართვისა და უწყვეტი განათლების ცენტრის წარმომადგენლებმა მონაწილეობა მიიღეს 2-4 დეკემბერს გამართულ სამუშაო შეხვედრაში. განათლების ხარისხის განვითარების ეროვნული ცენტრის ხარისხის უზრუნველყოფის სამსახურისა და პროფესიული საგანმანათლებლო პროგრამების განმახორციელებელი დაწესებულებების წარმომადგენლებმა შეხვედრაზე განიხილეს პროფესიული განათლების სფეროში არსებული სიახლეები, იმსჯელეს დაგეგმილ რეგულაციებსა და მიდგომებზე.

ბათუმის შოთა რუსთაველის სახელმწიფო უნივერსიტეტში პროფესიულ საგანმანათლებლო პროგრამებზე ჩარიცხულ სტუდენტებთან შეხვედრა გაიმართა. პროფესიული პროგრამების მართვისა და უწყვეტი განათლების ცენტრის ცენტრის ხარისხის მართვის მენეჯერმა მამუკა გოგელიამ, ცენტრის სასწავლო პროცესის მართვის მენეჯერმა გულადი ფარტენაძემ და პროფესიული პროგრამების ხელმძღვანელებმა სტუდენტებს მიულოცეს პროგრამებზე ჩარიცხვა, გააცნეს უნივერსიტეტის ისტორია, საგანმანათლებლო პროგრამების სტრუქტურა და სასწავლო პროცესთან დაკავშირებული ინფორმაცია. 2019 წლის შემოდგომაზე ბსუ-ს არქიტექტორ-ტექნიკოსის, ბიბლიოთეკარის, ვებინტერფეისის დიზაინერის, ვებინტერფეისის დეველოპერისა და მეფუტკრის პროფესიულ საგანმანათლებლო პროგრამებზე 80-მდე სტუდენტი ჩაირიცხა, მათ შორის 5 სპეციალური საგანმანათლებლო საჭიროების მქონეა.

სკოლის მოსწავლეებში პროფესიული უნარების განვითარების ქვეპროგრამის ფარგლებში ბათუმის შოთა რუსთაველის სახელმწიფო უნივერსიტეტში ამოქმედდა 48-საათიანი „პროფესიული უნარების განვითარების სასწავლო კურსი ვებპროგრამირებაში“. მეცადინეობები ტარდება ქედის, ხელვაჩაურის და ლანჩხუთის მუნიციპალიტეტების სამ პარტნიორ სკოლაში, სადაც პროფესიულ მომზადებას გადის 11 სკოლის 48 მოსწავლე. სასწავლო პროცესი დაიწყო 2019 წლის 25 ოქტომბერს და დასრულდება 2020 წლის იანვარში. სწავლის წარმატებით დასრულების შემდეგ მსმენელები მიიღებენ სერტიფიკატებს. აღნიშნული პროგრამის ფარგლებში საქართველოს განათლების, მეცნიერების, კულტურის და სპორტის სამინისტრომ ბსუ-ს სამ პარტნიორ სკოლას საჩუქრად პერსონალური კომპიუტერები გადასცა.

ბათუმის შოთა რუსთაველის სახელმწიფო უნივერსიტეტი მეორედ ჩაერთო „სამუშაოს მაძიებელთა პროფესიული მომზადება-გადამზადების და კვალიფიკაციის ამაღლების“ სახელმწიფო პროგრამაში. ამ ეტაპზე ბსუ-ში ხორციელდება ხუთი მოკლევადიანი პროგრამა: „ბაგა-ბაღის აღმზრდელი“, „ბუღალტრული აღრიცხვა“, „ვებ პროგრამისტი“, „ელექტრონული და ციფრული მოწყობილობის დიაგნოსტიკოს-შემკეთებელი“, „მეფუტკრე“. პროგრამებზე პროფესიულ გადამზადებას გადის 50 მსმენელი. სწავლება ფინანსდება სახელმწიფოს მიერ და სწავლის წარმატებით დასრულების შემთხვევაში აღნიშნული პროგრამებით განსაზღვრული შეფასების სისტემის საფუძველზე მსმენელები მიიღებენ სერტიფიკატებს.