ბათუმის შოთა რუსთაველის სახელმწიფო უნივერსიტეტის სლავისტიკის დეპაარტამენტის ასოცირებული პროფესორი ქეთევან სვანიძე 2014-2015 სასწავლო წელს ერასმუს მუნდუსის გაცვლითი პროგრამის ფარგლებში იმყოფებოდა ვენეციის კაფოსკარის უნივერსიტეტში (Ca’Foscari University of Venice). მკვლევარმა პროფესორ პაოლო ბალბონის ხელმძღვანელობით ჩაატარა სამეცნიერო კვლევა თემაზე: “ინტერკულტურული კომუნიკაციის არავერბალური ასპექტები და კომუნიკაციის არავერბალური ნაწილის როლი ენების სწავლების პროცესში“ („Non-verbal aspects of intercultural communication and the place and role of non-verbal part of communication in the process of teaching languages“), რომლის პრეზენტაცია შედგა უნივერსიტეტის ჰუმანიტარულ მეცნიერებათა ფაკულტეტის ლინგვისტიკისა და შეპირისპირებითი კულტურული კვლევების დეპარტამენტის სხდომაზე. ასოცირებულმა პროფესორმა ქეთევან სვანიძემ ერთი სასწავლო წლის განმავლობაში კაფოსკარის უნივერსიტეტში ჩაატარა ლექციები (120 აკად. საათი) რუსულში, როგორც უცხო ენაში უნივერსიტეტის პირველი და მეორე კურსის სტუდენტებთან და მონაწილეობა მიიღო ენების საზაფხულო სკოლის მუშაობაში.

ბათუმის სახელმწიფო უნივერსიტეტი IV საერთაშორისო საზაფხულო სკოლას „დიგიტალური ჰუმანიტარია - ენისა და კულტურის ელექტრონული დოკუმენტირება“ მასპინძლობს. ათდღიანი საერთაშორისო საზაფხულო სკოლა ბათუმის შოთა რუსთაველის სახელმწიფო უნივერსიტეტისა და ფრანკფურტის გოეთეს უნივერსიტეტის ორგანიზებით მეოთხედ ტარდება და მასში საქართველოს უმაღლესი საგანმანათლებლო დაწესებულებებიდან 25 სტუდენტი მონაწილეობს. ლექციებს ბათუმის შოთა რუსთაველის სახელმწიფო უნივერსიტეტის პროფესორებთან ერთად, ივანე ჯავახიშვილის სახელობის თბილისის სახელმწიფო უნივერსიტეტის, თავისუფალი უნივერსიტეტის, ფრანკფურტის გოეთეს უნივერსიტეტისა და ჰოლანდიის ნეიმეხენის უნივერსიტეტის პროფესორები წაიკითხავენ.

სლავისტიკის დეპარტამენტის ასისტენტ პროფესორმა სოფიკო თავარქთილაძემ, რუსული ფილოლოგიის III კურსის სტუდენტებმა გიორგი ხორავამ და თემურ დიდმანიძემ მონაწილეობა მიიღეს საზაფხულო სკოლაში „პოლონური კულტურისა და ენის საზაფხულო სკოლა უცხოელთათვის“ („Letnia Szkoła Języka i Kultury Polskiej dla cudzoziemców“). სწავლება პოლონეთში, ქალაქ ბელასტოკში ბელასტოკის უნივერსიტეტის ფილოლოგიის ფაკულტეტთან არსებული პოლონური კულტურისა და ენის სკოლის POLLANDO-ს ორგანიზებით გაიმართა და მასში სხვადასხვა ქვეყნის სტუდენტები მონაწილეობდნენ. ბსუ-ს სტუდენტებმა პოლონეთის განათლების სამინისტროს სტიპენდია მოიპოვეს, პოლონური ენის შესწავლის კურსი გაიარეს და A1 დონის შესაბამისი სერტიფიკატები მიიღეს.

ბათუმის შოთა რუსთაველის სახელმწიფო უნივერსიტეტში ინგლისური ენის საზაფხულო სკოლის მეორე ეტაპი დაიწყო. ჰუმანიტარულ მეცნიერებათა ფაკულტეტის ინგლისური ფილოლოგიის სპეციალობის 80-მდე სტუდენტი ერთი კვირის განმავლობაში ინგლისურ ენაზე თავისუფლად საუბრის უნარ-ჩვევებს გაიღრმავებენ. საზაფხულო სკოლის ფარგლებში ასევე მუშაობდა თარგმანისა და ინტერდისციპლინარული კვლევების ცენტრის (კოორდინატორი ასოცირებული პროფესორი ხათუნა ბერიძე) სექცია, ინგლისური ფილოლოგიის IV კურსის სტუდენტებმა „ბიაფის“ საერთაშორისო კინოფესტივალის ფილმების თარგმნაში მიიღეს მონაწილეობა. გარდა ამისა დოქტორანტ მაია ბოლქვაძის ინსტრუქტაჟით სტუდენტებმა თარგმნეს პოლიტიკური ჟანრის ტექსტები და მუშაობდნენ ტერმინების კონტექსტური მნიშვნელობების ლექსიკონზე. აუდიო-ვიზუალური თარგმანის დასრულების შემდეგ, საზაფხულო სკოლის მონაწილეებს კინოფესტივალის ორგანიზატორი ზვიად ელიზიანი სერტიფიკატებს გადასცემს.

ჰუმანიტარულ მეცნიერებათა ფაკულტეტის სტუდენტებმა მონაწილეობა მიიღეს იუნუს ემრეს სახელობის თბილისის თურქული კულტურის ცენტრის მიერ გამოცხადებულ კონკურსში. 45-დღიანი საზაფხულო სკოლის (უცხოელებისათვის თურქული ენის შემსწავლელი (TOMER) – ის კურსები) სტიპენდიები მოიპოვეს თურქეთისმცოდნეობის სპეციალობის III კურსის კურსის სტუდენტებმა მალვინა ხოზრევანიძემ და ინდირა კოჩალიძემ. მაგისტრატურის საგანმანათლებლო პროგრამის სამწლიანი კურსის სტიპენდიები მიენიჭათ თურქეთისმცოდნეობის სპეციალობის IV კურსის სტუდენტებს მეგი მანველიძეს, მალვინა მსახურაძესა და ნონა ნიქაბაძეს, ხოლო დოქტორანტურის საგანმანათლებლო პროგრამის სამწლიანი კურსის სტიპენდია - ქეთევან ქობულაძეს.