ბათუმის შოთა რუსთაველის სახელმწიფო უნივერსიტეტში, ქართული ფილოლოგიის დეპარტამენტის პროფესორის, ფილოლოგიის მეცნიერებათა დოქტორის, მამია ფაღავას 60 წლის იუბილისადმი მიძღვნილი სხდომა გაიმართა. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა და სტუდენტებმა.

ბათუმის შოთა რუსთაველის სახელმწიფო უნივერსიტეტში, აღმოსავლეთმცოდნეობის დეპარტამენტის ორგანიზებით, პოპულარული თურქი მწერლის, ნობელის პრემიის ლაურეატის, ორჰან ფამუქის ნაწარმოების მიხედვით საჯარო ლექცია გაიმართა თემაზე : „ტარიკა ანუ დიდი ბრძოლა ორჰან ფამუქის „ფარული სახის“ მიხედვით“.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის საგანმანათლებლო პროგრამებში მნიშვნელოვანი სიახლეა, მომავალი სასწავლო წლიდან სტუდენტებს საშუალება ექნებათ აირჩიონ და შეისწავლონ აფხაზური ენა. ამჟამად მიმდინარეობს მუშაობა აფხაზური ენის სასწავლო კურსის სილაბუსებზე, გათვალისწინებულია ელემენტარული კურსის შესწავლა, რასაც დაეთმობა 4 სემესტრი. პროცესში აქტიურადაა ჩართული ბათუმის მკვიდრი, ეროვნებით აფხაზი ადა ქუთელია, რომელსაც აფხაზური ენის სწავლების კარგი გამოცდილება აქვს. რეგულარულად იმართება სამუშაო შეხვედრები, როგორც ჰუმანიტარულ მეცნიერებათა ფაკულტეტის დეკანმა, პროფ. მ. გიორგაძე აღნიშნა, ინიციატივა დაგვიანებულიცაა, რადგან აფხაზური მეორე ენაა, რომელსაც საქართველოში სახელმწიფო ენის სტატუსი აქვს; გასათვალისწინებელია ისიც, რომ აჭარაში ბევრი აფხაზი ცხოვრობს, რომელთა ინტერესებშიც შედის მშობლიური ენის შესწავლა. სამომავლოდ უნივერსიტეტში გაიხსნება აფხაზური ენის კაბინეტი, გაიმართება საინტერესო შეხვედრები.

ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტის ხელმძღვანელმა, პროფესორმა ემზარ მაკარაძემ მონაწილეობა მიიღო ივანე ჯავახიშვილის სახელობის თბილისის სახელმწიფო უნივერსიტეტის აღმოსავლეთმცოდნეობის სასწავლო-სამეცნიერო ინსტიტუტის 70 წლისადმი მიძღვნილ საზეიმო სხდომასა და სამეცნიერო კონფერენციაში. მკვლევარმა სესიაზე მოხსენება წარადგინა თემაზე: „თანამედროვე თურქეთის საშინაო პოლიტიკის პრობლემები (2015 წლის მოვლენები)“. ღონისძიება მიზნად ისახავდა საქართველოში აღმოსავლეთმცოდნეობის მიმართულებით არსებული პრობლემების წარმოჩენას, განხილვასა და მათი გადაჭრისათვის ოპტიმალური გზების მოძიებას.

ბათუმის შოთა რუსთაველის სახელმწიფო უნივერსიტეტის ემერიტუს-პროფესორის, სამხრეთ-დასავლეთ საქართველოს სამეცნიერო-კვლევითი ცენტრის უფროსი მეცნიერ-თანამშრომლისა და ღვაწლმოსილი პროფესორის მერი ცინცაძის 85 წლისადმი მიძღვნილი საიუბილეო სხდომა გაიმართა შოთა რუსთაველის დარბაზში. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა და სტუდენტებმა. პროფესორ მერი ცინცაძეს მნიშვნელოვანი წვლილი მიუძღვნის ენათმეცნიერების განვითრებაში, გამოქვეყნებული აქვს ათეულობით სამეცნიერო ნაშრომი და მონოგრაფიები, ეწევა სარედაქციო საქმიანობას. ცნობილ მეცნიერს წილად ხვდა ქართველ მკვლევართა შორის პირველად ესაუბრა კლარჯული კილოს შესახებ, სამეცნიერო მიმოქცევაში შემოეტანა ქართული ენათმეცნიერებისათვის უცხო დიალექტის მასალები.