ბათუმის შოთა რუსთაველის სახელმწიფო უნივერსიტეტში ბათუმში მცხოვრები ომით დაზარალებული უკრაინელებისთვის ქართული ენის სწავლება დაიწყო. მსმენელებს მიესალმნენ ბათუმის დემოკრატიული ჩართულობის ცენტრის წარმომადგენელი — თეონა დიასამიძე, ენის ამერიკული ცენტრის ხელმძღვანელი, ფილოლოგიის დოქტორი ნათია ფუტკარაძე და ბსუ ჰუმანიტარულ მეცნიერებათა ფაკულტეტის დეკანი, პროფესორი მარინე გიორგაძე. ღონისძიების მონაწილეებმა წუთიერი დუმილით პატივი მიაგეს რუსეთის აგრესიის წინააღმდეგ ომში დაღუპული ქართველი და უკრაინელი მებრძოლების ხსოვნას. პროგრამა 4 თვის განმავლობაში გაგრძელდება და მას პროფესორი მაია კიკვაძე წარუძღვება.

დასრულდა ერთობლივი საერთაშორისო სეზონური სკოლა ლინგვოპოლიტოლოგიაში თემაზე: „პოლიტიკური მეტყველების კულტურა საჯარო გამოსვლებსა და დებატებში“. საქართველოს სხვადასხვა უმაღლესი საგანმანათლებლო დაწესებულების 18 სტუდენტს ექვსი დღის განმავლობაში ლექციები და სემინარები ჩაუტარდა პოლიტიკური დისკურსის კულტურაზე, „სიძულვილის ენასა“ და მასობრივ ცნობიერებაზე ასახული პოლიტიკური პოლარიზმის უარყოფითი ზეგავლენის აქტუალურ საკითხებზე. ღონისძიების მონაწილეებს გადაეცათ სერტიფიკატები. ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტისა და დიგიტალური ჰუმანიტარიის აკადემიის ერთობლივი საერთაშორისო სეზონური სკოლა აჭარის ა.რ. განათლების, კულტურისა და სპორტის სამინისტროს დაფინანსებით ჩატარდა.

18-19 ივლისს ქუთაისში, აკაკი წერეთლის სახელმწიფო უნივერსიტეტში, „ERASMUS+“- ის ინსტიტუციური განვითარების პროექტის „უნივერსიტეტების როლი რეგიონის განვითარებაში - RURD-ის (Role of Universities in the Regional Development) - შემაჯამებელი შეხვედრები გაიმართა. ბათუმის შოთა რუსთაველის სახელმწიფო უნივერსიტეტიდან პროექტის შემაჯამებელ შეხვედრებს ესწრებოდნენ: ბსუ-ს რექტორი, პროფესორი მერაბ ხალვაში, ჰუმანიტარულ მეცნიერებათა ფაკულტეტის დეკანი, პროფესორი მარინა გიორგაძე და სტუდენტთა კარიერული განვითარების, კულტურისა და სპორტის დეპარტამენტის უფროსი ლევან ტარიელაძე.

ბათუმის შოთა რუსთაველის სახელმწიფო უნივერსიტეტისა და დიგიტალური ჰუმანიტარიის აკადემიის ერთობლივი საერთაშორისო სეზონური სკოლა გაიხსნა ლინგვოპოლიტოლოგიაში თემაზე: „პოლიტიკური მეტყველების კულტურა საჯარო გამოსვლებსა და დებატებში“. სეზონური სკოლა გახსნეს ბსუ-ს რექტორმა, პროფესორმა მერაბ ხალვაშმა, პროექტის ხელმძღვანელმა, ბსუ-ს ასოცირებულმა პროფესორმა მზია ხახუტაიშვილმა და პროექტის თანახელმძღვანელმა, ფრანკფურტის გოეთეს უნივერსიტეტის ემპირიული ენათმეცნიერების ინსტიტუტის პროფესორმა მანანა თანდაშვილმა. ღონისძიება მიზნად ისახავს, წარმოაჩნოს როგორ აისახება პოლიტიკურ დისკურსში კულტურა, „სიძულვილის ენა“ და პოლიტიკური პოლარიზმის უარყოფითი ზეგავლენა მასობრივ ცნობიერებაზე.

დასრულდა „ქართული ლიტერატურისა და ლიტერატურული პროცესის შემსწავლელი სეზონური სკოლა“. ბსუ-ს ჰუმანიტარულ მეცნიერებათა ფაჯულტეტის დეკანმა მარინა გიორგაძემ სეზონური სკოლის მონაწილეებს სერტიფიკატები გადასცა. საქართველოს სხვადასხვა უმაღლესი საგანმანათლებლო დაწესებულების 30 სტუდენტს ხუთი დღის განმავლობაში ლექციები და სემინარები ჩაუტარეს ნანა ტრაპაიძემ (ბათუმი, ბსუ), ლექსო დორეულმა (თბილისი, თავისუფალი უნივერსიტეტი), დათო გაბუნიამ (თბილისი, ილიაუნი), ლევან ბერძენიშვილმა (თბილისი, ილიაუნი), დიანა ანფიმიადმა (თბილისი, ჯიპა) და ინგა ჟღენტმა (თბილისი, კავკასიის უნივერსიტეტი).