ბათუმის შოთა რუსთაველის სახელმწიფო უნივერსიტეტში წიგნის „მცირე ადგილები, ვრცელი საკითხები” (შესავალი სოციალურ და კულტურულ ანთროპოლოგიაში) ქართულენოვანი გამოცემის პრეზენტაცია და საჯარო ლექცია თემაზე: „რატომ არის ანთროპოლოგია მნიშვნელოვანი დღეს, ვიდრე ოდესმე” გაიმართა. ოსლოს უნივერსიტეტის პროფესორმა თომას ჰილანდ ერიქსენმა სტუდენტებსა და პროფესორ-მასწავლებლებს თანამედროვე ანთროპოლოგიის აქტუალური საკითხები და სამეცნიერო კვლევის შედეგები გააცნო. წიგნი აჭარის ა.რ. განათლების, კულტურისა და სპორტის სამინისტროს უმაღლესი განათლების დახმარების პროგრამის ფარგლებში ითარგმნა და გამოიცა.

ივანე ჯავახიშვილის სახელობის თბილისის სახელმწიფო უნივერსიტეტის პროფესორმა, ამერიკისმცოდნეობის დოქტორმა ქეთი ანთელავამ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „ქალთა უფლებებისათვის ბრძოლის 100 წელი: ელიზაბეთ ქეიდი სტენტონიდან გერტრუდ ვანდერბილტ უითნიმდე“. ჰუმანიტარულ მეცნიერებათა ფაკულტეტის სტუდენტებსა და პროფესორ-მასწავლებლებს სამოქალაქო უფლებებისა და სოციალური თანასწორობისათვის მებრძოლი ამერიკელი ქალების მოღვაწეობა გააცნო.

ბათუმის შოთა რუსთაველის სახელმწიფო უნივერსიტეტში გერმანული ენის თვის ფარგლებში სტუდენტებისათვის, მასწავლებლებისათვის, მოსწავლეებისა და მშობლებისათვის საინფორმაციო შეხვედრა ჩატარდა. გერმანული ენის თვე გერმანიის, ავსტრიის, შვეიცარიის საელჩოების და კულტურის სფეროს ინსტიტუტების ორგანიზებით იმართება. ერთი თვის განმავლობაში დაგეგმილი პროექტები ეძღვნება გერმანულ ენასა და გერმანულენოვანი ქვეყნების კულტურას. ინიციატივის „სამი ქვეყანა - ერთი ენა“ ფარგლებში გაიმართება ღონისძიებები სხვადასხვა ასაკის სტუმრებისათვის, კითხვის, კინოს მოყვარულებისა და ფეხბურთის გულშემატკივრებისათვის.

27 მაისსა და 5 ივნისს ჰუმანიტარულ მეცნიერებათა ფაკულტეტზე შედგა ფაკულტეტის ადმინისტრაციის შეხვედრა ფაკულტეტის სამაგისტრო-საგანმანათლებლო პროგრამების მეორე კურსის სტუდენტებთან და მათ ხელმძღვანელებთან. ხარისხის უზრუნველყოფის სამსახურის უფროსმა, ასოცირებულმა პროფესორმა ჟუკა გუმბარიძემ სტუდენტებსა და პროფესორ-მასწავლებლებს გააცნო სამაგისტრო ნაშრომების Moodle-ის ელექტრონულ სისტემაში პლაგიატის გამოვლენის პროგრამა Turnitin-ის გამოყენებით ატვირთვის, შემოწმების ვადები და პროცედურები.

1-2 მაისს ინგლისური ენის საერთაშორისო ტრენერმა დიდი ბრიტანეთიდან ენდრიუ უოლკლეიმ ჰუმანიტარულ მეცნიერებათა ფაკულტეტის ინგლისური ფილოლოგიის პროფესორ-მასწავლებლებისათვის ჩაატარა ტრეინინგი ინგლისური ენის სწავლებაში ლექსიკის გამოყენების საკითხებზე. ტრენერმა სწავლების მონაწილეებს გააცნო სტუდენტების ლექსიკური ცოდნის განვითარების საკითხები, ყოველდღიურად სასწავლო პროცესში თანამედროვე მეთოდების და მიდგომების გამოყენების მნიშვნელობა. ენდრიუ უოლკლეიმ კოლეგებს გაუზიარა ინგლისური ენის ლექსიკის სწავლების გამოცდილება და აუდიტორიაში საქმიანობის ახალი პრაქტიკული და ტექნიკური მეთოდებზე, რაც ხელს შეუწყობს სტუდენტებში სწავლის მოტივაციის გაზრდას.