ბათუმის შოთა რუსთაველის სახელმწიფო უნივერსიტეტში ბათუმის ახალგაზრდული ცენტრის pita-ს ეკოკლუბის ინიციატივით, შეხვედრა გაიმართა სახელწოდებით „ნარჩენების მართვის თანამედროვე ტექნოლოგიები“. ბსუ-ს სტუდენტებმა, ცენრტის წევრებმა მარი ხოზრევანიძემ და გიორგი ბოლქვაძემ ღონისძიებაზე ისეთ აქტუალურ საკითხებზე ისაუბრეს, როგორიცაა: თუ რა გამოწვევების წინაშე დგას საქართველო? რა მნიშვენლობა აქვს ნარჩენების მართვას გარემოს დაცვის მიმართულებით, როგორი უნდა იყოს თანამედროვე ნაგავსაყრელი „პოლიგონი" და როგორ უნდა დავახარისხოთ ნარჩენი. მომხსენებლებმა ასევე ისაუბრეს ასოცირების ხელშეკრულების ვალდებულებებსა და არსებულ სიახლეებზე.

ბათუმის შოთა რუსთაველს სახელმწიფო უნივერსიტეტის ინოვაციების ცენტრში სამეწარმეო დღე ჩატარდა. შეხვედრაზე სტუდენტებმა, ERASMUS+-ის საგრანტო პროგრამის Innocens-ის მონაწილეებმა და სხვადასხვა კომპანიის წარმომადგენლებმა განიხილეს პროექტის ეგიდით დაგეგმილი ღონისძიებები, სამომავლო გეგმები, მეწარმეობისა და ინოვაციების თანამედროვე საკითხები. სამეწარმეო დღის მონაწილეები გაეცნენ სტარტაპის პრაქტიკულ მაგალითებს, ინოვაციების შეფასების თანამედროვე სისტემებს, კომპანიების შექმნისა და საავტორო უფლებების იურიდიული საკითხებს. კომპანიების წარმომადგენლებმა სტუდენტებს წარუდგინეს ასევე სამეწარმეო საქმიანობის წარმატებული მაგალითები.

უნივერსიტეტში აჭარის ა.რ. სოფლის მეურნეობის მინისტრის მოადგილე მამუკა თურმანიძე, ა(ა)იპ აგროსერვის ცენტრის დირექტორი გოჩა ბერიძე ბსუ-ს რექტორის მოადგილესთან ნათია წიკლაშვილთან ერთად ტექნოლოგიური ფაკულტეტის სტუდენტებს შეხვდნენ. აგროსერვის ცენტრში ანაზღაურებადი სტაჟირების პროგრამის მონაწილე სტუდენტებმა სასათბურე, სადედე და სადემონსტრაციო მეურნეობებში მიღებული პრაქტიკული გამოცდილების ანგარიში წარმოადგინეს. შეხვედრის დასასრულს აგრარული მიმართულების სტუდენტებს: ავთანდილ გოგიტიძეს, რუსუდან მელაძეს, სალომე ბერძენიშვილს და მერი ჭელიძეს, რომლებმაც აგროსერვის ცენტრში წარმატებით გაიარეს სტაჟირების პროგრამა სერტიფიკატები გადაეცათ.

ბათუმის შოთა რუსთაველის სახელმწიფო უნივერსიტეტმა, ბორჯომში, კამპანიის „ბსუ ბორჯომის ტყის აღსადგენად“ ფარგლებში, განადგურებული ტყის ხელახალი განაშენიანების აქცია გამართა. ბსუ-ს ტექნოლოგიური ფაკულტეტის სტუდენტებმა, უნივერსიტეტის რექტორმა და პროფესორ-მასწავლებლებმა ბორჯომის პლატოს ტერიტორიაზე, რომელიც მავნებლებითაა დაზიანებული და მიმდინარეობს აღდგენითი პროექტი, უნივერსიტეტის სათბურში გამოყვანილი ნაძვის, ფიჭვის, სოჭისა და ქართული მუხის 800-მდე ნერგი დარგეს. ბორჯომის ტყის მწვანე საფარის აღსადგენად ტექნოლოგიური ფაკულტეტის ბაზაზე არსებულ სათბურში სტუდენტებმა პროფესორ-მასწავლებლებთან ერთად ნერგების გამოყვანა ერთი წლის წინ დაიწყეს.

18-22 სექტემბერს ვალენსიის პოლიტექნიკურ უნივერსიტეტში ERASMUS+-ის საგრანტო პროექტის „Inno CENS Project“-ის (Enhacing Innovation Competences and Entrepreneurial Skills in Engineering Education (ინოვაციური კომპეტენციებისა და სამეწარმეო უნარების ამაღლება საინჟინრო განათლებაში)“ ფარგლებში გამართულ შეხვედრაში მონაწილეობა მიიღეს ტექნოლოგიური ფაკულტეტის დეკანმა, საგრანტო პროგრამის კოორდინატორმა გიზო ფარცხალაძემ და ინოვაციების ლაბორატორიის მენეჯერმა თამაზ ჩხარტიშვილმა. ვიზიტის მიზანი იყო მიმდინარე ანგარიშისა და სამომავლო გეგმების წარდგენა.