ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტებმა საერთაშორისო ტურისტულ გამოფენაში „ექსპობათუმი - 2016” მიიღეს მონაწილეობა. უმაღლესი საგანმანათლებლო დაწესებულების სტუდენტები ჩართული იყვნენ საორგანიზაციო საკითხებში, გაეცნენ საერთაშორისო გამოფენების მნიშვნელობას, გაიარეს პრაქტიკა და მიიღეს გამოცდილება, რომელიც მათ სამომავლო კარიერულ წინსვლაში დაეხმარება. საერთაშორისო ტურისტული გამოფენა „ექსპობათუმი - 2016” 13-15 მაისს, სასტუმრო „შერატონ ბათუმში“ გაიმართა და მასში 8 ქვეყნის 70-მდე კომპანია იყო წარმოდგენილი.

სასწავლო-პრაქტიკული ხასიათის ტური ისტორიულ ტაო-კლარჯეთში - ასე ეწოდა ტურიზმის ფაკულტეტის სტუდენტთა ორდღიან მოგზაურობას ისტორიულ ტაოში. ფაკულტეტის 50 სტუდენტმა იშხნის, ოშკის, ხახულის, ოთხთას, პარხალის, დოლისყანის ტაძრები და სამონასტრო კომპლექსები მოინახულეს, კულტურულ ტურიზმსა და საექსკურსიო საქმეში პროფესიული უნარ-ჩვევების პირველი გამოცდა იქ, ისტორიულ საქართველოში ჩააბარეს.

2016 წლის 29 მაისიდან 6 ივნისის ჩათვლით, ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და გერმანიის ევროპული ბიზნესის სკოლის ორგანიზებით II საერთაშორისო საზაფხულო სკოლა „ტურიზმი: ეკონომიკა და ბიზნესი“ გერმანიაში ქ. ბერლინში ჩატარდება. სწავლება მიზნად ისახავს ტურიზმის ინდუსტრიის სიახლეების გაცნობასა და გერმანელი კოლეგების გამოცდილების გაზიარებას. საერთაშორისო საზაფხულო სკოლაში ტურიზმის ფაკულტეტის 10 სტუდენტი მიიღებს მონაწილეობას.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 3 სტუდენტი პროექტის „მდგრადი ტურიზმი: სოფლად მეწარმეობა და კულტურული მემკვიდრეობის’’ ფარგლებში სამხრეთ-აღმოსავლეთ ნორვეგიის უნივერსიტეტში (USN) გაემგზავრება. პროექტი, რომელსაც დღეს ბათუმის შოთა რუსთაველის სახელმწიფო უნივერსიტეტში 7 პარტნიორი უნივერსიტეტის რექტორმა მოაწერა ხელი, მიზნად ისახავს ყირგიზეთს, საქართველოსა და ნორვეგიას შორის განათლების სფეროში, კერძოდ კი მდგრადი ტურიზმის მიმართულებით თანამშრომლობას. თანამშრომლობა სტუდენტებისა და აკადემიური პერსონალის სტაჟირებას, პარტნიორ უნივერსიტეტებს შორის ერთობლივი საგანმანათლებლო და სამეცნიერო-კვლევითი პროგრამების განხორციელებას, მდგრადი ტურიზმის სწავლების სფეროში კურიკულუმის შემუშავებას მოიცავს.

ტურიზმის ფაკულტეტის სტუდენტები ერთობლივი პროექტის - „ნორვეგიაში, საქართველოსა და ყირგიზეთში რეგიონული ტურიზმის მდგრადი განვითარებისა და ინტეგრაციის სფეროში განათლება” ფარგლებში ნორვეგიაში გაემგზავრებიან. ახალგაზრდები ტელემარკის უნივერსიტეტში ერთი თვის განმავლობაში ისწავლიან და საბაკალავრო ნაშრომზე იმუშავებენ. სტუდენტები გაეცნობიან სასოფლო ტურიზმს, ზამთრის კურორტების მენეჯმენტს, აგროტურიზმსა და ტურისტული სერვისის ხარისხის ამაღლების საკითხებს. კონკურსში ტურიზმის ფაკულტეტის მეოთხე კურსის 10 სტუდენტი მონაწილეობდა.