არასამთავრობო ორგანიზაცია „ეკონომიკური განათლებისა და სტრატეგიული კვლევის ცენტრი’’ ’’Friedrich Naumann’’-ის ფონდის მხარდაჭერით „Ideas for Freedom in Georgia’’ - პროექტის ფარგლებში ცენტრის ანალიტიკოსმა სემინარი ჩაატარა თემაზე: „თავისუფალი ბაზარი თანამედროვე მსოფლიოში’’. ტურიზმის ფაკულტეტის სტუდენტები გაეცნენ დარგის აქტუალურ საკითხებს. მომხსენებელმა ისაუბრა თუ რამდენად თავისუფალია პრაქტიკაში ბაზარი ჩარევისაგან, როგორ მუშაობს კლასიკური თეორიები რეალურ სამყაროში, თავისუფალი ბაზრის მხარდამჭერი ეკონომისტების როლი და მნიშვნელობა თანამედროვე თავისუფალ ბაზარზე. სემინარის მონაწილე სტუდენტებს გადაეცათ სერტიფიკატები.

გერმანელი ექსპერტი კურტ ჰეინც რეიცი ტურიზმის ფაკულტეტის სტუდენტებისათვის თემაზე „საერთაშორისო ტურიზმის განვითარების თანამედროვე ტენდენციები და საქართველოში სასტუმრო ბიზნესის განვითარება“ მასტერკლასს ჩაატარებს. ახალგაზრდები 14 დღის განმავლობაში დარგის სიახლეებს გაეცნობიან და პროფესიულ უნარ-ჩვევებს გაიუმჯობესებენ. ბატონი კურტ ჰეინც რეიცი რამდენიმე წელია აქტიურად თანამშრომლობს ტურიზმის ფაკულტეტთან, 2010 წლიდან კი ბათუმის შოთა რუსთაველის სახელმწიფო უნივერსიტეტის საპატიო დოქტორია.

ტურიზმის ფაკულტეტის ადმინისტრაცია და ხარისხის უზრუნველყოფის სამსახური ტურიზმის ფაკულტეტის პირველკურსელებს შეხვდნენ და უმაღლესი საგანმანათლებლო დაწესებულების ძირითადი მარეგულირებელი აქტები, საგანმანათლებლო პროგრამების განხორციელების წესი და სტრუქტურა გააცნეს. 2015-2016 სასწავლო წელს ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტზე 140 პირველკურსელი და 35 მობილობით გადმოსული სტუდენტი ჩაირიცხა.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის 27 სტუდენტი სასწავლო პრაქტიკას გერმანიაში, კუნძულ უსედომსა და რუგენზე ტურიზმის ინდუსტრიის ორგანიზაციებში გადის. ახალგაზრდებს საშუალება ექნებათ 2 თვის განმავლობაში გაეცნონ სასტუმროს ყველა ძირითადი სტრუქტურული ერთეულის ფუნქციონირებას. სტუდენტები თეორიული ცოდნის მიღებასთან ერთად, აქტიურად ჩაერთვებიან სასტუმროს ყოველდღიურ საქმიანობაში. სასწავლო პრაქტიკა გერმანიის შვერინის ბალტიკის კოლეჯთან გაფორმებული მემორანდუმის ფარგლებში ხორციელდება.

წარმატებით გაიარა აკრედიტაცია ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ახალმა საგანმანათლებლო პროგრამამ „ტურიზმისა და მასპინძლობის მენეჯმენტი“, მისანიჭებელი კვალიფიკაცია „ბიზნესის ადმინისტრირების მაგისტრი მენეჯმენტში“. აღნიშნული პროგრამა 2015-2016 სასწავლო წლიდან განხორციელდება.