პროფესიული საგანმანათლებლო პროგრამის „მეფუტკრის“ სტუდენტებისა და პროფესიული განათლების მასწავლებლებისათვის სავაჭრო სამრეწველო პალატაში გაიმართა ტრენინგი თემაზე: „სამრეწველო საფუტკრე მეურნეობების მოწყობა“. ასოციაციის „დასავლეთ საქართველოს მეფუტკრეთა ალიანსის“ თავმჯდომარემ ედუარდ მელიამ მსმენელებს ისეთი მნიშვნელოვანი საკითხები გააცნო, როგორიცაა: ფუტკრის მოვლა-პატრონობა და სეზონური სამუშაოები საფუტკრეებში, ფუტკრის დაავადებების პრევენცია და მკურნალობის მეთოდები, ფუტკრის დედების ხარისხობრივი მაჩვენებლების განსაზღვრა და „პენეტის“ მეთოდით მისი წარმოება, ფუტკრის რძის წარმოება და მისი შენახვის პირობები. ტრენინგი ბსუ-ს ორგანიზებითა და DCFTA-ს (საინფორმაციო ცენტრი ევროკავშირთან თავისუფალი ვაჭრობის შესახებ) მხარდაჭერით ჩატარდა.

ბათუმის შოთა რუსთაველის სახელმწიფო უნივერსიტეტში პროფესიულ საგანმანათლებლო პროგრამებზე ჩარიცხულ სტუდენტებთან შეხვედრა გაიმართა. პროფესიული პროგრამების მართვისა და უწყვეტი განათლების ცენტრის დირექტორმა მადონა მიქელაძემ, ცენტრის ხარისხის მართვის მენეჯერმა მამუკა გოგელიამ, ცენტრის სასწავლო პროცესის მართვის მენეჯერმა გულადი ფარტენაძემ და პროფესიული პროგრამების ხელმძღვანელებმა სტუდენტებს მიულოცეს პროგრამებზე ჩარიცხვა, გააცნეს უნივერსიტეტის ისტორია, საგანმანათლებლო პროგრამების სტრუქტურა და სასწავლო პროცესთან დაკავშირებული ინფორმაცია. 2018 წლის შემოდგომაზე ბსუ-ს პროფესიულ პროგრამებზე „ბაგა-ბაღის აღმზრდელი პედაგოგი“, „მეფუტკრე“, „პრაქტიკოსი ექთანი“ 55 სტუდენტი ჩაირიცხა.

ბათუმის შოთა რუსთაველის სახელმწიფო უნივერსიტეტის ადმინისტრაციის ხელმძღვანელი ჯემალ ანანიძე და პროფესიული პროგრამებისა და უწყვეტი განათლების ცენტრის დირექტორი მადონა მიქელაძე ორგანიზაცია „მწვანე სექტორის“ ინიციატივით ფოთის პროფესიულ კოლეჯში „ფაზისი“ იმყოფებოდნენ. ვიზიტის მიზანი იყო „მეთევზეობის“ პროფესიული საგანმანათლებლო პროგრამის განხორციელებასთან დაკავშირებული გამოცდილების გაზიარება და კოლეჯის მეთევზეობის თანამედროვე ლაბორატორიების გაცნობა.

აჭარის სავაჭრო-სამრეწველო პალატაში სამუშაო შეხვედრა გაიმართა საჯარო და კერძო პროფესიული საგანმანათლებლო დაწესებულებების წარმომადგენლებთან. შეხვედრაში ბათუმის შოთა რუსთაველის სახელმწიფო უნივერსიტეტის პროფესიული პროგრამების მართვისა და უწყვეტი განათლები ცენტრის დირექტორმა მადონა მიქელაძეს მიიღო მონაწილეობა. ღონისძიება მიზნად ისახავდა დუალური პროფესიული საგანმანათლებლო პროგრამების დანერგვის ხელშეწყობას. სავაჭრო-სამრეწველო პალატა შუამავლის ფუნქციას შეასრულებს პროფესიული პროგრამების განმახორციელებელ სასწავლებლებსა და საწარმოებს შორის. მხარეთა შეთანხმებით შეიქმნება საკოორდინაციო საბჭო, რომლის შემადგენლობაში შევლენ როგორც პროფესიული საგანმანათლებლო პროგრამების განმახორციელებელი დაწესებულებები, ასევე დამსაქმებლები.

ბათუმის შოთა რუსთაველის სახელმწიფო უნივერსიტეტში მოდულური პროფესიული საგანმანათლებლო პროგრამების დანერგვის ხელშეწყობის მიზნით სამდღიანი საინფორმაციო შეხვედრა გაიმართა. ხარისხის განვითარების ეროვნული ცენტრის პროფესიული საგანმანათლებლო პროგრამების გარე მხარდაჭერის სპეციალისტმა, განათლების ექსპერტმა ია გიგიბერიამ პროფესიული პროგრამების მართვისა და უწყვეტი განათლების ცენტრის პერსონალს, პროფესიული პროგრამების ხელმძღვანელებს, პროფესიული განათლების მასწავლებლებს პროფესიული საგანმანათლებლო დაწესებულების ავტორიზაციის სტანდარტები და შეფასების პრინციპები გააცნო.