ბათუმის შოთ რუსთველის სახელმწიფო უნივერსიტეტს გერმანიის ელჩის მოადგილე ტანია ჰუტი ეწვია. რექტორთან მერაბ ხალვაშთან და ჰუმანიტარულ მეცნიერებათა ფაკულტეტის დეკანთან თეონა ბერიძესთან გამართულ შეხვედრაზე სტუმარმა ბსუ-სა და გერმანიის უნივერსიტეტებთან თანამშრომლობის გაღრმავებასა და ახალი საგანმანათლებლო პროგრამების განხორციელებაზე ისაუბრა. გერმანიის ელჩის მოადგილემ, ტანია ჰუტმა ხაზის გაუსვა გერმანული ენის სწავლების მხარდაჭერის პროექტს, რომელიც ითვალისწინებს გერმანული ენის სწავლების გაძლიერებას. ვიზიტის ფარგლებში დიპლომატიური კორპუსის წარმომადგენელი ასევე შეხვდა გერმანისტიკის მიმართულების აკადემიურ პერსონალს, პროფესიული და უწყვეტი განათლების სამაგისტრო საგანმანათლებლო პროგრამის, ევროპისმცოდნეობის, საერთაშორისო ურთიერთობების საბაკალავრო საგანამანათლებლო პროგრამების სტუდენტებსა და აჭარის რესურსცენტრების ხელმძღვანელებს.

15-19 მაისს, „ერაზმუს+“-ის აკადემიური პერსონალის მობილობისა და კვირეულის ფარგლებში, ჰუმანიტარულ მეცნიერებათა ფაკულტეტის ასისტენტ-პროფესორი მარიამ კორინთელი ბულგარეთის, რუსეს ანჯელ კანჩევის უნივერსიტეტს ეწვია.
კვირეულის განმავლობაში მარიამ კორინთელმა ჩაატარა ლექციები დაწყებითი განათლების პროგრამის სტუდენტებისთვის თემაზე: „საბავშვო ლიტერატურა - მიმდინარე პროცესები და ტენდენციები“. ლექციების ბოლოს ჩაატარა შემეცნებითი აქტივობა - ვიქტორინა წიგნების ილუსტრაციების გამოცნობაზე, რაშიც მონაწილეობა მიიღეს სტუდენტებმა და პროფესორ-მასწავლებლებმა.

ბათუმის შოთა რუსთაველის სახელმწიფო უნივერსიტეტში ევროკავშირის პროექტის „ევროდიალოგის“ ფარგლებში, გერმანიის არქეოლოგიის ინსტიტუტის გერმანიის განყოფილებისა და გოეთეს ინსტიტუტის ორგანიზებით არქეოლოგიური ვორქშოპი გაიმართა. არქეოლოგიური ვორქშოფი მიზნად ისახავდა ადრ ებრინჯაოს ხანის ძეგლების წარდგენასა და მათთვის საჯარო რეესტრის შექმნის შესაძლებლობების განხილვას. პროექტში ქართველ მეცნიერებთან ერთად გერმანელი, მოლდოველი, აზერბაიჯანელი და სომეხი მკლევრები მონაწილეობდნენ.

ბათუმის შოთა რუსთაველის სახელმწიფო უნივერსიტეტში მწერალმა, მეცნიერმა, ექიმმა და მეცენატმა მერაბ კვიცარიძემ ქართული პოეზიის ასპექტებზე საჯარო ლექცია ჩაატარა. მომხსენებელმა ისაუბრა ქუთაისზე, აკაკი წერეთლის, ცისფერყანწელებისა და გალაკტიონ ტაბიძის პოეზიაზე, ვაჟა-ფშაველას გენიალობაზე. მერაბ კვიცარიძემ წაიკითხა როგორც ქართველი პოეტების, ისე საკუთარი ლექსები. მოყავდა საინტერესო ფაქტები ქართველ მწერალთა ცხოვრებიდან. მერაბ კვიცარიძის საჯარო ლექციას სტუდენტებთან ერთად, ესწრებოდნენ აჭარის მწერალთა ორგანიზაციის თავმჯდომარე დავით თედორაძე, პოეტები: ვახტანგ ღლონტი და გენრი დოლიძე, ჰუმანიტარულ მეცნიერებათა ფაკულტეტის დეკანი თეონა ბერიძე, პროფესორები: ინგა შამილიშვილი, შორენა მახაჭაძე და რამაზ ხალვაში.

ბსუ-ს ჰუმანიტარულ მეცნიერებათა ფაკულტეტის თარგმანის ლაბორატორიაში ასოცირებულმა პროფესორმა ხათუნა ბერიძემ ინგლისურ ენაზე მთარგმნელობითი და საკომუნიკაციო უნარების განმავითარებელი ლაბორატორიული ტრენინგ-კურსი ჩაატარა. სწავლება მიზნად ისახავდა ენობრივი, მთარგმნელობითი და საკომუნიკაციო უნარების განვითარება-განმტკიცებას უახლესი მეთოდოლოგიითა და ლაბორატორიული ტექნოლოგიების გამოყენებით. ლაბორატორიული მეცადინეობებისას ინტეგრირებული იყო ლაბორატორიაში დამუშავებული უახლესი ტექსტური მასალა, ინტეგრირებული სასწავლო ვიდეომასალა, ენობრივი ტექნოლოგიები, აპლიკაციები და იმიტირებული სასწავლო გარემო.