ოდესის VIII საერთაშორისო ლიტერატურული ფესტივალის ფარგლებში, ბათუმის შოთა რუსთაველის სახელმწიფო უნივერსიტეტში უკრაინელ პოეტებთან - ჰალინა კრუკთან და დმიტრო ლაზუტკინთან - შეხვედრა-დისკუსია „წერის ხელოვნება“ გაიმართა. შეხევედრაზე სტუდენტებს, პროფესორ-მასწავლებლებსა და საზოგადოების წარმომადგენლებს უკრაინელმა პოეტებმა ომის თემატიკაზე, რეალურ ამბებზე შექმნილი საკუთარი ლექსები წაუკითხეს. ღონისძიების მონაწილეებს შესაძლებლობა ჰქონდათ ასევე, გაცნობოდნენ ჰალინა კრუკისა და დმიტრო ლაზუტკინის ლექსებს ქართულ ენაზე.

ბათუმის შოთა რუსთაველის სახელმწიფო უნივერსიტეტში ოდესის VIII საერთაშორისო ლიტერატურული ფესტივალის ფარგლებში ჰუმანიტარულ მეცნიერებათა ფაკულტეტის სტუდენტებისთვის მთარგმნელ კატია ვოლტერსის მთარგმნელობითი მასტერკლასი გაიმართა თემაზე: „დანაკარგი და შენაძენი თარგმანში“. ღონისძიება ბსუ-ს ჰუმანიტარულ მეცნიერებათა ფაკულტეტის დეკანმა პროფესორმა მარინე გიორგაძემ გახსნა და ლიტერატურული ფესტივალის ჩატარების მნიშვნელობაზე ისაუბრა. მთარგმნელმა კატია ვოლტერსმა ინტერაქციულ ღონისძიებაზე ახალგაზრდებს მთარგმნელობით შემოქმედებით პროცესზე ესაუბრა, საკუთარი გამოცდილება გაუზიარა და მათ შეკითხვებს უპასუხა. მასტერკლასს მოდერატორობას უწევდა ბსუ-ს ჰუმანიტარულ მეცნიერებათა ფაკულტეტის ასისტენტ პროფესორი მარიამ კორინთელი.

24-25 სექტემბერს ბსუ-ს გერმანული ფილოლოგიის საბაკალავრო პროგრამის მეორე კურსის სტუდენტმა მარიამ აბრალავამ მონაწილეობა მიიღო პროექტში „Literatur-Wochenende”. ლიტერატურულ პროექტს წელს ჩაეყარა საფუძველი და საქართველოში ავსტრიის საელჩოს ორგანიზებით ხორციელდება. საქართველოს მასშტაბით გამართულ შესარჩევ ტურში გამარჯვებულმა თითოეულმა მონაწილემ ავსტრიელი ავტორის ერთი წიგნი წარადგინა. ბსუ-ს სტუდენტი მარიამ აბრალავა პროექტში ფელიქს მიტერერის პიესით „იდიოტებისთვის ადგილი არ არის“ წარსდგა.

19 სექტემბერს, უნივერსიტეტის სააქტო დარბაზში ჰუმანიტარულ მეცნიერებათა ფაკულტეტის პირველკურსელებთან შეხვედრა გაიმართა. პირველკურსელებს მიესალმნენ და წარმატებები უსურვეს უნივერსიტეტის რექტორმა, პროფესორმა მერაბ ხალვაშმა, ფაკულტეტის დეკანმა, პროფესორმა მარინა გიორგაძემ, პროფესორმა ირინა გოშხეთელიანმა, პროფ. ლალი ზაქარაძემ და სხვებმა. 2022-2023 სასწავლო წელსაც ფაკულტეტი სრულად დაკომპლექტდა, 10 პროგრამაზე 280-მდე სტუდენტი ჩაირიცხა, მათ შორის 30-მდე სტუდენტი სასწავლო გრანტის მფლობელია. 130 სტუდენტი (50 ისტორიის, 80 - ქართული ფილოლოგიის საგანმანათლებლო პროგრამაზე) სახელმწიფო დაფინანსებით გააგრძელებს სწავლას.

ბსუ-ს ჰუმანიტარულ მეცნიერებათა ფაკულტეტის ისტორიის სადოქტორო საგანმანათლებლო პროგრამის დოქტორანტმა გიორგი ბაციკაძემ გამოსცა ნაშრომი „ეროვნულ-განმათავისუფლებელი მოძრაობა საქართველოში XX საუკუნის 70-90-იან წლებში“. ეს მისი სამაგისტრო კვლევა იყო, რომელიც დაფინანსდა შოთა რუსთაველის საქართველოს ეროვნული სამეცნიერო ფონდის მიერ. ნაშრომი ეხება ეროვნულ-განმათავისუფლებელ მოძრაობას საქართველოში XX საუკუნის 70-90-იან წლებში.