დასრულდა ბათუმის შოთა რუსთველის სახელმწიფო უნივერსიტეტის საზაფხულო სკოლა თემაზე: „ფორმალური ლოგიკის კანონების გამოყენება სწავლა - სწავლების პროცესში“. ბსუ-ს ასოცირებულმა პროფესორმა ლალი ანთიძემ და ნებრასკა-ლინკოლნის უნივერსიტეტის განათლების მაგისტრმა, ბსუ-ს ფილოსოფიის ბაკალავრმა იმედა იაკოვენკოს საზაფხულო სკოლის მონაწილეებს სერტიფიკატები გადასცეს. საზაფხულო სკოლის ფარგლებში განათლების მიმართულების სტუდენტები და მასწავლებლობის სტატუსის მაძიებელი პირები ლოგიკის საფუძველზე სწავლა-სწავლების ახალი მოდელის შემუშავების საკითხებს გაეცნენ. ღონისძიება აჭარის ა.რ. განათლების, კულტურისა და სპორტის სამინისტროს საგრანტო პროექტის ფარგლებში გაიმართა.

განათლების მიმართულების სტუდენტებისა და მასწავლებლობის სტატუსის მაძიებელი პირებისთვის ბათუმის შოთა რუსთაველის სახელმწიფო უნივერსიტეტში საზაფხულო სკოლა ტარდება თემაზე: „ფორმალური ლოგიკის კანონების გამოყენება სწავლა - სწავლების პროცესში“. საზაფხულო სკოლა მიზნად ისახავს ლოგიკის, როგორც თეორიული მეცნიერების საფუძველზე სწავლა-სწავლების ახალი მოდელის შემუშავებას, რომელიც მიმართული იქნება სწავლისა და სწავლების პროცესის გაუმჯობესებისა და მოსწავლეებში კრიტიკული აზროვნების განვითარებაზე.

ბათუმის შოთა რუსთაველის სახელმწიფო უნივერსიტეტისა და სოციალური კვლევისა და ანალიზის ინსტიტუტის ორგანიზებით სეზონურ სკოლა „სოციალური მუშაობის სერტიფიცირების პროგრამის მომზადება ბათუმის სახელმწიფო უნივერსიტეტში“ გაიხსნა. ბსუ-ს პროფესორ-მასწავლებლები და დასავლეთ საქართველოში მოქმედი სოციალური მუშაკები ხუთი დღის განმავლობაში სოციალური მუშაობის ისეთ აქტუალურ საკითხებს გაეცნობიან, როგორიცაა: სოციალური მუშაობის საფუძვლები, სოციალური ადვოკატირება, ადამიანის ქცევა სოციალურ გარემოში, სოციალურ კეთილდღეობის პოლიტიკა, სოციალური მუშაობის კვლევის მეთოდები. ქართველი და უცხოელი მომხსენებლები ლექციებს წაიკითხავენ ასევე თემებზე: სოციალური მუშაობა თემებთან და ორგანიზაციებთან, სოციალური მუშაობა და ოჯახში ძალადობა, სოციალური მუშაობა და ბავშვთა დაცვა, სოციალური მუშაობა და სისხლის სამართლის მართლმსაჯულება.

დასრულდა ბათუმის შოთა რუსთაველის სახელმწიფო უნივერსიტეტისა და ილიას სახელმწიფო უნივერსიტეტის მკვლევართა გუნდის ერთობლივი სოციოლოგიური კვლევა „მოსახლეობის ღირებულებების კვლევა აჭარაში”. კვლევა განხორციელდა ილიას სახელმწიფო უნივერსიტეტის ინიციატივით, ბსუ-ს ჰუმანიტრულ მეცნიერებათა ფაკულტეტთან თანამშრომლობით და მოიცავდა აჭარის ავტონომიური რესპუბლიკის ექვსივე მუნიციპალიტეტს. საველე სამუშაოები განხორციელდა 11 ივლისიდან 25 ივლისის ჩათვლით, გამოიკითხა 1200 ადამიანი.

ბათუმის შოთა რუსთაველის სახელმწიფო უნივერსიტეტის, ფრანგული ენის მასწავლებელთა ასოციაციის და ბათუმის ბულვარის ორგანიზებით საფრაგეთის ეროვნული დღესასწაული სხვადასხვა აქტივობებით აღინიშნა. ღონისძიება ბსუ-ში საქართველოში საფრანგეთის ელჩმა პასკალ მენიემ, უნივერსიტეტის რექტორმა მერაბ ხალვაშმა და ქალაქ ბათუმის მერმა ლაშა კომახიძემ გახსნეს. უნივერსიტეტის ფოიეში მოეწყო ფაბლაბ ბსუ-ს ნამუშევრების გამოფენა, ძველი ბულვარის ამსახველი ექსპოზიცია, ქართულ-ამერიკულმა სკოლამ და სკოლამ „ევრო 2000“ ფრანგული ლიტერატურის პერსონაჟები გააცოცხლეს და მოსწავლეების ნახატები გამოფინეს. ღონისძიება მუსიკალურად გააფორმა უნივერსიტეტის ბენდმა, ასევე შესრულდა მელოდიები აკორდეონით და კლასიკური მუსიკალური ნომრები ფორტეპიანოზე.