2020 წლის 22 დეკემბერს ბსუ-ში პირველად შედგა სადოქტორო დისერტაციის დაცვა დისტანციურად, Zoom-ის პლატფორმის გამოყენებით. ჰუმანიტარულ მეცნიერებათა ფაკულტეტის „ლიტერატურათმცოდნეობის“ სადოქტორო პროგრამის დოქტორანტმა მარიამ კორინთელმა დაიცვა დისერტაცია თემაზე „ქალაქი თანამედროვე ქართულ პროზაში“.

საქართველოში ჩინეთის სახალხო რესპუბლიკის საელჩოსა ბათუმის შოთა რუსთაველის სახელმწიფო უნივერსიტეტს შორის გაფორმებული ხელშეკრულების საფუძველზე, ჰუმანიტარულ მეცნიერებათა ფაკულტეტის აღმოსავლეთმცოდნეობის დეპარტამენტში განხორციელდა სამეცნიერო კვლევითი პროექტი: „ლაო ჯონჯაუს მოღვაწეობა საქართველოში“ (პროექტის ხელმძღვანელი პროფესორი ემზარ მაკარაძე). პროექტის დასრულების შემდეგ, გამოიცა მონოგრაფია - „ლაო ჯონჯაუს მოღვაწეობა საქართველოში“ ქართულ, ინგლისურ და ჩინურ ენებზე. წიგნის ავტორები არიან: პროფესორები ემზარ მაკარაძე, ოთარ გოგოლიშვილი და დოქტორანტი დავით ანდღულაძე.

ბსუ-ს ჰუმანიტარულ მეცნიერებათა ფაკულტეტის ფილოსოფიის დეპარტამენტის ასოცირებულმა პროფესორმა, გიორგი მასალკინმა, გამოსცა წიგნი „საქართველოს პოლიეთნიკურობა და პოლირელიგიურობა - საფრთხე თუ გასაფრთხილებელი მონაპოვარი“. წიგნი ქართულ და ინგლისურ ენებზე გამოიცა ორგანიზაციის - „სამოქალაქო ინიციატივა - დემოკრატიული, ევრო-ატლანტიკური არჩევანისათვის - იდეის“ - მიერ, დემოკრატიის ვირტუალური აკადემიის ბიბლიოთეკის ფარგლებში, ნიდერლანდების სამეფოს და Black Sea Trust ფონდის ფინანსური მხარდაჭერით.

ჰუმანიტარულ მეცნიერებათა ფაკულტეტის პროფესორმა შორენა მახაჭაძემ აბიტურიენტ კობა ჟღენტთან ერთად „ვეფხისტყაოსნის“ მობილური აპლიკაცია (წარმდგენი KJ Education) შექმნა, რომელიც შოთა რუსთაველის პოემის ადაპტირებულ ტექსტსაც შეიცავს. აპლიკაციის შექმნის მიზანია, ყველა დაინტერესებულს მაქსიმალურად გაუიოლოს შუასაუკუნეების მხატვრული ტექსტის გაგება. აქედან დაიბადა სლოგანიც: „ვეფხისტყაოსნის გაგება ასე მარტივი არასოდეს ყოფილა“.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტისა და ფრანკფურტის გოეთეს სახელობის უნივერსიტეტის პროფესორების სამწლიანი თანამშრომლობის ფარგლებში შემაჯამებელი სამეცნიერო პუბლიკაციები გამოიცა. მანანა თანდაშვილის ავტორობით გამოქვეყნდა „ენისა და კულტურის დოკუმენტირების თანამედროვე მეთოდები და ინსტრუმენტები: ლინგვოკულტუროლოგიური დიგიტალური არქივის მაგალითზე“, ხოლო მანანა თანდაშვილის, რამაზ ხალვაშის, რუსუდან პაპიაშვილის, მზია ხახუტაიშვილის, გრიგოლ კახიანისა და ნანა ცეცხლაძის თანაავტორობით - „ენისა და კულტურის ელექტრონული დოკუმენტირების თანამედროვე ინსტრუმენტები: მეგზური“.