16-18 ოქტომბერს, საქართველოს ტექნიკურ უნივერსიტეტში გამართულ Horizon Europe Proposal Writing Camp for Georgia პროექტის „წერისა და კონსულტაციის ბანაკის“ სამუშაო შეხვედრებში მონაწილეობა მიიღეს ბსუ-ს ჰუმანიტარულ მეცნიერებათა ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა ივდით დიასამიძემ, ასისტენტ პროფესორმა ლია დავითაძემ და ასოცირებულმა პროფესორმა ხათუნა ბერიძემ. ბანაკის სპიკერებმა მათიას ვურხმა და ანელი როუზმა მონაწილეებს „ჰორიზონტი ევროპას" სტანდარტებით გათვალისწინებული საპროექტო წინადადებების შექმნის დეტალები გააცნეს. სამუშაო შეხვედრის მონაწილეებმა იმუშავეს როგორც ინდივიდუალურ, ასევე ჯგუფურ რეჟიმში, ასევე გამარჯვებული პროექტების წარმომადგენლებმა საკუთარი წარმატების ისტორიის შესახებ ისაუბრეს და პოტენციურ აპლიკანტებს საკუთარი გამოცდილებები გაუზიარეს.

3-5 ოქტომბერს, ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორ-მასწავლებლებმა მონაწილეობა მიიღეს სკოპუსში ინდექსირებული ჟურნალ ნალანსის მიერ ორგანიზებულ - Journal of Narrative and Language Studies - IX საერთაშორისო სამეცნიერო კონფერენციაში: Narratives across boundaries - hybrid & hybrid. ბსუ-ს პროფესორ-მასწავლებლებმა: ნატალია სურგულაძემ, ირინე გოშხეთელიანმა, ნანა სტამბოლიშვილმა, თინა შიოშვილმა, მაია კიკვაძემ, თამილა დავითაძემ, ნანა მაზმიშვილმა, შოთა როდინაძემ, ნათია აბაშიძემ, თამარ მაჭუტაძემ, სოფიო კახიძემ და მაგული ბოლქვაძემ სესიაზე მოხსენებები წარადგინეს ბოლო პერიოდში განხორციელებული კვლევების შედეგებზე.

ფრანკფურტის იოჰან ვოლფგანგ გოეთეს უნივერსიტეტის ემპირიული ენათმეცნიერების ინსტიტუტის სიმპოზიუმში - „დიგიტალური კავკასიოლოგია - პარადაგმათა ცვლა?" მონაწილეობა მიიღეს ბათუმის შოთა რუსთაველის სახელმწიფო უნივერსიტეტის პროფესორებმა. სიმპოზიუმის გახსნის ოფიციალურ ცერემონიაზე მონაწილეებს მიესალმა ჰუმანიტარულ მეცნიერებათა ფაკულტეტის დეკანი, ასოცირებული პროფესორი თეონა ბერიძე. კონფერენციის მუშაობაში მონაწილეობა მიიღეს ბსუ-ს პროფესორმა რამაზ ხალვაშმა და ასოცირებულმა პროფესორმა ხათუნა ბერიძემ და მონაწილეებს უახლესი კვლევების შედგები გააცნეს.

ბათუმის შოთა რუსთაველის სახელმწიფო უნივერსიტეტში ბათუმის საჯარო ბიბლიოთეკის ორგანიზებით, მთარგმნელთა საერთაშორისო დღისადმი მიძღვნილი შეხვედრა ჩატარდა. ღონისძიება გახსნა და მთარგმნელობითი საქმიანობის მნიშვნელობაზე ისაუბრა ბსუ-ს ჰუმანიტარულ მეცნიერებათა ფაკულტეტის დეკანმა, ასოცირებულმა პროფესორმა თეონა ბერიძემ. შეხვედრის სპიკერმა, ასოცირებულმა პროფესორმა, მთარგმნელმა და თარჯიმანმა ხათუნა ბერიძემ იმსჯელა მთარგმნელობით საქმიანობაში არსებულ მიღწევებსა და ღირებულებებზე, ილიას სახელმწიფო უნივერსიტეტის პროფესორმა თინათინ მარგალიტაძემ მოხსენება წარმოადგინა თემაზე: „თარგმანი და ლექსიკოგრაფია“.

ბსუ-ს ჰუმანიტარულ მეცნიერებათა ფაკულტეტმა „ავსტრიულ ლიტერატურულ შაბათ-კვირას ბათუმში“ უმასპინძლა. პროექტი მეორე წელია საქართველოში ავსტრიის საელჩოს ორგანიზებით იმართება და მისი მიზანია საქართველოში ავსტრიული კულტურის, ხელოვნებისა და ლიტერატურის პოპულარიზაცია. ბათუმში გამართულ ღონისძიებაზე ავსტრიის სრულუფლებიანმა და საგანგებო ელჩმა საქართველოში თომას მიულმანმა ახალი სამენოვანი სასწავლო პლატფორმა - www.berta-von-suttner.net წარადგინა, რომელიც მშვიდობის დარგში პირველი ნობელიანტი ქალის, ბერტა ფონ ზუტნერის ცხოვრებასა და მოღვაწეობას, ზუტნერების ოჯახის საქართველოში გატარებულ წლებს ასახავს და მრავალფეროვან მულტიმედია რესურსს სთავაზობს მომხმარებელს.