ჰარვარდის უნივერსიტეტის დევისის ცენტრის ქართველოლოგიის პროგრამის მიმართულებით ცხადდება ვაკანსია დირექტორის პოზიციაზე. დაინტერესებული აპლიკანტი უნდა ფლობდეს მაგისტრის ხარისხს პოლიტიკურ მეცნიერებებში, ან სხვა მომიჯნავე დარგში, უნდა ჰქონდეს განხორციელებული კვლევები და სამეცნიერო პუბლიკაციები საქართველოს ისტორიაზე, კულტურაზე, ლიტერატურასა და პოლიტიკაზე, ასევე, უნდა გააჩნდეს ბაკალავრიატისა და მაგისტრატურის საფეხურის სტუდენტების ასისტენტების მართვისა და ფორმალური სამეცნიერო პრეზენტაციების წარდგენის გამოცდილება. აღსანიშნავია, რომ აპლიკანტი უნდა ფლობდეს ქართულ ენას და ჰქონდეს ქვეყანაში მუშაობის მნიშვნელოვანი გამოცდილება.

ბათუმის შოთა რუსთაველის სახელმწიფო უნივერსიტეტში მოსწავლეთა მეშვიდე სამეცნიერო კონფერენცია ჩატარდა თემაზე: „ახლო აღმოსავლეთი და საქართველო“. კონფერენციაზე აჭარის საჯარო სკოლების 50-ზე მეტი XI-XII კლასის მოსწავლე მოხსენებებს წარმოადგენს ისტორიის, კულტურის, ენისა და ლიტერატურის აქტუალურ საკითხებზე. მოსწავლეთა სამეცნიერო კონფეფენცია მიზნად ისახავდა უნივერსიტეტისა და სკოლებს შორის თანამშრომლობის ხელშეწყობის გაღრმავებას, მოსწავლეებში კრიტიკული აზროვნების განვითარების ხელშეწყობა, კვლევითი უნარების ჩამოყალიბება და ნიჭიერი ახალგაზრდების გამოვლენა.

ბსუ-ს ასისტენტ პროფესორი ნათია აბაშიძე და ფილოლოგიის დოქტორი სოფიო კახიძე ა. დიუმას სახელობის ფრანგულ-ქართული სკოლის მე-10-მე-12 კლასის მოსწავლეებსა და სკოლის მასწავლებლებს შეხვდნენ. პროფესორ-მასწავლებლებმა მოსწავლეეებს გააცნეს უნივერსიტეტი, ისაუბრეს ფრანგულენოვან გაცვლითი პროგრამებზე, AUF-ის მიერ ახალგახსნილ ცენტრსა და ფრანგული ენის როლზე თანამედროვე ეპოქაში. შემეცნებითი ხასიათის ღონისძიება კითხვა-პასუხის რეჟიმში წარიმართა და ბსუ-ს პროფესორ-მასწავლებლებმა მოსწავლეების შეკითხვებს უპასუხეს. ვიზიტი მიზნად ისახავდა სკოლასთან თანამშრომლობის გაღრმავებასა და ფრანგული ენის პოპულარიზაციას.

15-19 აპრილს, „ერაზმუს+“-ის გაცვლითი პროგრამის ფარგლებში, ბსუ-ს ზუსტ მეცნიერებათა და განათლების ფაკულტეტის ასისტენტ პროფესორი ნათია აბაშიძე და ჰუმანიტარულ მეცნიერებათა ფაკულტეტის მოწვეული უფროსი მასწავლებელი, ფილოლოგიის დოქტორი სოფიო კახიძე აკადემიური მობილობით იმყოფებოდნენ საფრანგეთში, რუანის ნორმანდიის უნივერსიტეტში. ნათია აბაშიძემ და სოფიო კახიძემ ლექციები წაიკითხეს და პრაქტიკული მეცადინეობები ჩაატარეს ლიგვისტიკის სამაგისტრო პროგრამის სტუდენტებთან. ვიზიტის ფარგლებში პროფესორ-მასწავლებლები გაეცნენ საგანმანათლებლო პროგრამებს, საუნივერსიტეტო ცხოვრებას, რუნის უნივერსიტეტის ბიბლიოთეკას, სასწავლო პროცესსა და სიახლეებს; ასევე შეხვდნენ უნივერსიტეტის დეპარტამენტების, ლაბორატორიებისა, ენების სკოლისა და საგარეო ურთიერთობათა სამსახურის წარმომადგენლებს და დაიგეგმა სამომავლო თანამშრომლობის მიმართულებები.

ბსუ-ს ჰუმანიტარულ მეცნიერებათა ფაკულტეტის პროფესორ მამია ფაღავას საქართველოს განათლების, მეცნიერებისა და ახალგაზრდობის სამინისტრომ და შოთა რუსთაველის საქართველოს ეროვნულმა სამეცნიერო ფონდმა ქართული ენის დაცვა-განვითარებაში შეტანილი წვლილისთვის სიგელი გადასცეს. ბათუმის შოთა რუსთაველის სახელმწიფო უნივერსიტეტი ულოცავს პროფესორ მამია ფაღავას დაჯილდოებას და წარმატებებს უსურვებს.