ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტზე სწავლა 15 ოქტომბერს განახლდა. პირველკურსელებთან შეხვედრაზე ფაკულტეტის დეკანმა, პროფ. მ. გიორგაძემ, დეპარტამენტებისა და საგანმანათლებლო პროგრამების ხელმძღვანელებმა ახალგაზრდებს მიულოცეს სასწავლო წლის დაწყება, გააცნეს უნივერსიტეტის ისტორია, საგანმანათლებლო პროგრამების სტრუქტურა და სასწავლო პროცესთან დაკავშირებული ინფორმაცია. სტუდენტები სწავლას განახლებულ შენობასა და აუდიტორიებში გააგრძელებენ. 2018-2019 სასწავლო წელს ჰუმანიტარულ მეცნიერებათა ფაკულტეტზე 290 სტუდენტი ჩაირიცხა.

ბათუმის შოთა რუსთაველის სახელმწიფო უნივერსიტეტში გერმანიის აკადემიური გაცვლის სამსახურის DAAD-ის გაცვლითი პროგრამების წარდგენა გაიმართა. DAAD-ის წარმომადგენელმა მაქს ბორნმანმა სხვადასხვა საფეხურის სტუდენტებს, პროფესორ-მასწავლებლებსა და მკვლევარებს გერმანიის გაცვლითი პროგრამები და მასში მონაწილეობის პირობები გააცნო. წარდგინებაზე გერმანიაში სწავლის მსურველები ასევე გაეცნენ გერმანიის უმაღლესი განათლების სისტემას, სასწავლო გერმანულ და ინგლისურენოვან პროგრამებს, სტიპენდიებს.

ნიუ იორკის უნივერსიტეტის პროფესორმა ნებაჰატ ავჯიოღლუმ ბათუმის შოთა რუსთაველის სახელმწიფო უნივერსიტეტში საჯარო ლექცია წაიკითხა თემაზე: „კულტურათა გლობალიზაცია: ხელოვნება და მობილობა მეთვრამეტე საუკუნეში“. ევროპული კოლონიზაციის თანამედროვე ისტორიოგრაფია იმ ასიმეტრიული ურთიერთობებისკენ მიუთითებს, რაც დასავლურ და აღმოსავლურ სამყაროებს შორის არსებობდა. უცხო კულტურებთან კონტაქტმა ხელი შეუწყო ახალი სახელოვნებო საქმიანობების, იდეების და პოლიტიკური ამოცანების აღმოცენებას მეთვრამეტე და მეცხრამეტე საუკუნეების ევროპაში.

ბათუმის შოთა რუსთაველის სახელმწიფო უნივერსიტეტში I საერთაშორისო სამეცნიერო კონფერენციის - „აღმოსავლეთ ევროპის მულტიკულტურული სივრცე“ გაიხსნა. კონფერენციის მიზანია კულტურათშორისი დიალოგის, ურთიერთგავლენების, ენისა და ენობრივი პოლიტიკის, ლიტერატურის, თარგმანის, კულტურათა ურთიერთმიმართების წარსულისა და თანამედროვეობისა და სხვა აქტუალური ინტერდისციპლინური კვლევითი ტენდენციების გამოკვეთა, გაანალიზება, შეფასება და თანამედროვე მეთოდების ურთიერთგაზიარება. საერთაშორისო სესია ასევე ითვალისწინებს ახალგაზრდა მკვლევართათვის კვლევითი დიაპაზონის გაფართოებას, თანამედროვე მიმართულებებით სამეცნიერო საქმიანობის ხელშეწყობასა და პროფესიული ურთიერთკავშირის განვითარებას.

თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტში გაიმართა მონოგრაფიის - „პონტოელი ბერძნები აჭარაში - წარსული და თანამედროვეობა“ - განხილვა. მონოგრაფია შოთა რუსთაველის ეროვნული სამეცნიერო ფონდის საგრანტო სამეცნიერო პროექტის „პონტოელი ბერძნები აჭარაში - წარსული და თანამედროვეობა“ ფარგლებში მომზადდა. წიგნის განხილვაში მონაწილეობა მიიღეს თსუ-ს კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტის პროფესორებმა და ილიაუნის აღმოსავლეთმცოდნეობის ინსტიტუტის ბიზანტინოლოგიის გამყოფილების მკვლევრებმა. მონოგრაფიამ გამომსვლელთა მაღალი შეფასება დაიმსახურა.