2016 წლის 2 აპრილს, საქართველოს ფრანგულ ინსტიტუტში შედგა საინფორმაციო შეხვედრა 2016 წელს დაგეგმილი iFOS-ის ტრენინგების შესახებ. ტრენინგში მონაწილეობას ღებულობდნენ ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ფრანგული ფილოლოგიის პედაგოგები.
აღნიშნული ტრენინგები გათვალისწინებულია საქართველოს უნივერსიტეტებისა და საქართველოს ფრანგული ინსტიტუტის ფრანგული ენის პედაგოგებისთვის და მიზნად ისახავს საქართველოში პროფესიული ფრანგულის სწავლების განვითარებას.

ბათუმის შოთა რუსთაველის სახელმწიფო უნივერსიტეტში შემოქმედებითი წერის კონკურსი ჩატარდა ინგლისურ ენაში. კონკურსის მიზანი იყო სტუდენტების შემოქმედებითი უნარის გამოვლენა. კონკურსის საფუძველზე, გამოვლინდა რეგიონული, ეროვნული და საერთაშორისო მასშტაბით გამარჯვებული სტუდენტები, მათ შორის ჰუმანიტარულ მეცნიერებათა ფაკულტეტიდან. ეროვნული დონის გამარჯვებულები გახდნენ: მარინა ცინცქილაძე, ქრისტინე თოფურია, მარიამ მამულაძე, თამთა ნაგერვაძე და ქეთევან არძენაძე; რეგიონულ დონეზე გამარჯვებული გახდა მარიანა აპოსტოლი. კონკურსი ინგლისური ენის შემოქმედებით წერაში საქართველოში აშშ-ის საელჩოს ინიციატივით გაიმართა. გამარჯვებულებს გადაეცემათ სერტიფიკატები.

30 მარტს, ბერძენთა ეროვნულ დღესასწაულს (25 მარტი) მიეძღვნა ფოტოგამოფენა, რომელიც გაიხსნა ჰუმანიტარულ მეცნიერებათა ფაკულტეტის საგამოფენო სივრცეში. გამოფენაზე წარმოდგენილი იყო აჭარაში მცხოვრები პონტოელი ბერძნების საოჯახო ალბომებიდან შერჩეული ფოტოები, ზოგიერთი მათგანი ისტორიული ღირებულებისაა (XX ს-ის დასაწყისის). გამოფენას პროფესორ-მასწავლებლებისა და სტუდენტების გარდა ბერძენთა ბათუმის ორგანიზაციისა, ასევე კვირიკედან ჩამოსული ბერძნებიც ესწრებოდნენ.

დღეს, რექტორის მოვალეობის შემსრულებელი მერაბ ხალვაში და ჰუმანიტარულ მეცნიერებათა ფაკულტეტის დეკანი მარინა გიორგაძე უცხოელ სტუდენტებს შეხვდნენ. გაცნობითი ხასიათის შეხვედრას ყაზახეთის იურიდიული უნივერსიტეტის, ნახიჭევანის სახელმწიფო უნივერსიტეტის და თურქეთის რესპუბლიკის 25-მდე სტუდენტი ესწრებოდა. რექტორის მოვალეობის შემსრულებელი უცხოელი სტუდენტების სწავლისა და ცხოვრების პირობებს გაეცნო. ასევე, დაიგეგმა სხვადასხვა გაცნობითი და კულტურული ღონისძიებების მოწყობა. შეხვედრის დასასრულს სტუდენტებს სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტში ფრანკოფონიის კვირეული საზეიმოდ დაიხურა. კვირეულის ფარგლებში უნივერსიტეტს ფრანგული ინსტიტუტის დირექტორი, საფრანგეთის საელჩოს მრჩეველი კულტურის საკითხებში ჟან ივ-ლავუარი ეწვია. ვიზიტის ფარგლებში უნივერსიტეტსა და ფრანგულ ინსტიტუტს შორი ხელი მოეწერა ურთიერთთანამშრომლობის მემორანდუმს, რომელიც ურთიერთობის გაღრმავებას, ფრანგული ენის და კულტურის პოპულარიზაციას, ერთობლივი პროექტების განხორციელებას და სტუდენტებისა და პროფესორ-მასწავლებელთა მობილობას ითვალისწინებს.