ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ისტორიის სპეციალობის IV კურსის წარჩინებულმა სტუდენტმა თამაზ დავითაძემ იძულებით გადაადგილებული, სოციალურად დაუცველი ოჯახების ბავშვებისთვის წაიკითხა საჯარო ლექცია საქართველოს ისტორიის აქტუალურ საკითხებზე. მომხსენებელმა მოზარდებს ქვეყნის ისტორიის მნიშვნელოვანი მოვლენები შეახსენა და მათ მნიშვნელობაზე ისაუბრა. ღონისძიება საქველმოქმედო ფონდ „იალქანის“ ინიციატივით ჩატარდა.

ლიტერატურულ კლუბში მწერალ ოთარ ჯირკვალიშვილის საჯარო ლექცია: „ქრისტეს მხატვრული სახე ლიტერატურაში"ჩატარდა. ღონისძიება მიზნად ისახავდა რელიგიური საკითხის მხატვრული დამუშავების ტრადიციის განხილვას. იესო ქრისტეზე წერდა და ქრისტიანული იდეალების კონტექსტში თავის შემოქმედებას განიხილავდა ბევრი დიდი მწერალი. სალექციო თემის პრობლემატიკა მე-19-20 საუკუნის მწერალთა მხატვრული პოზიციის ანალიზი იყო. ლექცია ასევე ითვალისწინებდა მხატვრული და რელიგიური აზროვნების მიმართების ანალიზს თანამედროვე კულტურულ დისკურსში. ლექცია გაიმართა აჭარის ა.რ. განათლების, კულტურისა და სპორტის სამინისტროს ქვეპროგრამების - „უმაღლესი განათლების ხელშეწყობა“ ფარგლებში.

ლიტერატურულ კლუბში პოეტმა პაატა შამუგიამ საჯარო ლექცია წაიკითხა თემაზე: „უახლესი ლიტერატურის გამოწვევები“. მომხსენებელმა თანამედროვე ლიტერატურაში არსებული გამოწვევების თავმოყრასა და საერთო ნიშნით ტიპოლოგიაზე ისაუბრა. თანამედროვე ლიტერატურამეოცე საუკუნის 10-იან წლებში იწყება; შესაბამისად, ლექცია იმ ექსპერიმენტების მიმოხილვით დაიწყო, რომლებმაც სალიტერატურო ენა და დისკურსები მნიშვნელოვნად შეცვალეს. ლიტერატურის გენერალური და მარგინალური ხაზების შეპირისპირება და გამოკვეთა აუცილებელია იმ მთავარი ესთეტიკური პროექტების წასაკითხად, რაც თანამედროვე ლიტერატურაში იქმნება. პოეტის თვალთახედვით დანახული მიმდინარე ლიტერატურული პროცესის ანალიზი, უახლესი ლიტერატურული ტენდენციები და პერსპექტივები საინტერესო აღმოჩნდა ფილოლოგიის ფაკულტეტის სტუდენტებისა და ლიტერატურით დაინტერესებული პირებისათვის.

ბათუმის შოთა რუსთაველის სახელმწიფო უნივერსიტეტში კონფერენცია „უწყვეტი პროფესიული განვითარება აჭარაში: მიღწევები და შედეგები“ გაიხსნა. სამი დღის განმავლობაში სხვადასხვა უმაღლესი საგანმანათლებლო დაწესებულების პროფესორ-მასწავლებლები, რეგიონის 50 საჯარო სკოლის ინგლისური ენის მასწავლებლები, საერთაშორისო და ადგილობრივი არასამთავრობო ორგანიზაციების წარმომადგენლები უწყვეტი პროფესიული განვითარების პროგრამას გაეცნობიან. სესიის მონაწილეები ასევე იმსჯელებენ პროფესიული განვითარების უწყვეტი პროფესიული განვითარების კონცეფციაზე, სახელმწიფო სკოლებში ინგლისური ენის სწავლების აქტუალურ საკითხებსა და ინგლისური ენის მასწავლებლების პროფესიული განვითარების შესაძლებლობებზე. კონფერენცია ბრიტანეთის საბჭოსა და აჭარის განათლების ფონდის ორგანიზებით იმართება.

ილიას სახელმწიფო უნივერსიტეტის პროფესორმა ცირა ბარბაქაძემ ჰუმანიტარულ მეცნიერებათა ფაკულტეტის სტუდენტებისა და პროფესორ-მასწავლებლებისათვის საჯარო ლექცია წაიკითხა თემაზე: "კვანტურობა, შემოქმედება და ადამიანი". მომხსენებლის შეფასებით, მეცნიერები სულ უფრო რწმუნდებიან იმაში, რომ კვანტური ეფექტები მხოლოდ ფიზიკის სფეროს არ განეკუთვნება, იგი ცნობიერების პროცესების გამოვლინებაა და ვრცელდება ყველაფერზე. თანამედროვე ადამიანი კვანტური ცნობიერების დაუფლებით ცვლის და მართავს საკუთარ ცხოვრებას. ღონისძიება ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტისა და ილიას სახელმწიფო უნივერსიტეტის სემიოტიკის კვლევითი ცენტრის მემორანდუმის ფარგლებში გაიმართა.