ბსუ-ში საბუნებისმეტყველო მეცნიერებათა და ჯანდაცვის ფაკულტეტის დიპლომირებული მედიკოსის ერთსაფეხურიანი ინგლისურენოვანი პროგრამის კურსდამთავრებულთა საზეიმო გამოშვება გაიმართა. კურსდამთავრებულებს უნივერსიტეტის დასრულება მიულოცეს და კარიერული წინსვლა უსურვეს ბსუ-ს რექტორის მოადგილემ თამარ სირაძემ, საბუნებისმეტყველო მეცნიერებათა და ჯანდაცვის ფაკულტეტის დეკანმა რუსუდან ხუხუნაიშვილმა, დიპლომირებული მედიკოსის ერთსაფეხურიანი საგანმანათლებლო პროგრამის მართვის ცენტრის დირექტორმა მარინა ქორიძემ და პროფესორ-მასწავლებლებმა. თეთრ ხალათებში გამოწყობილმა კურსდამთავრებულებმა ტრადიციულად ექიმის ფიცი საზეიმო ვითარებაში დადეს. ბსუ-ს კურსდამთავრებულის სტატუსი 150 უცხოელ სტუდენტს მიენიჭა.

ბსუ-ში საბუნებისმეტყველო მეცნიერებათა და ჯანდაცვის ფაკულტეტის ფარმაციის საბაკალავრო-პროგრამის ხელმძღვანელს, ასოცირებულ პროფესორ ეთერ ჯაყელს შეხვდნენ ფარმაცევტული კომპანიის „ავერსი-ფარმა“ წარმომადგენლები, ადამიანური რესურსების სამსახურის ხელმძღვანელი ეკატერინე მჭედლიშვილი და პერსონალის შეფასების და განვითარების სამსახურის ხელმძღვანელი ნათია ჭოჭუა. შეხვედრაზე მონაწილეებმა ისაუბრეს უნივერსიტეტსა და ფარმაცევტულ კომპანიას შორის სამომავლო თანამშრომლობის შესახებ, დაიგეგმა სტუდენტებთან შეხვედრა სტაჟირებისა და დასაქმების თაობაზე. მხარეები ასევე შეთანხმდნენ ბათუმის შოთა რუსთაველის სახელმწიფო უნივერსიტეტსა და ფარმაცევტულ კომპანია „ავერსი-ფარმას“ შორის თანამშრომლობის მემორანდუმის გაფორმებაზე.

შოთა რუსთაველის ეროვნული სამეცნიერო ფონდის საგრანტო პროექტის (N FR-22-4236) „მცენარეული ნედლეულისა და გადამუშავების ანარჩენების ვალორიზაციის ინოვაციური ტექნოლოგიების შემუშავება გარემოზე უარყოფითი ზემოქმედების შესუსტების მიზნით ციკლური ეკონომიკის პრინციპების გამოყენებით“ ქიმიის დეპარტამენტის პროფესორ-მასწავლებლები, დოქტორანტები და ბაკალავრები იმყოფებოდნენ ლანჩხუთის მუნიციპალიტეტში (სოფ. სუფსა) შპს „მწვანე ბუმბოს“ საწარმოში. პროექტის მონაწილეებმა სხვადასხვა მცენარეული ნედლეულის გადამუშავების ანარჩენებიდან ცივი დაწნეხვის ტექნოლოგიური გზით მიიღეს მცენარეული ზეთები, რომელთა შემდგომი კვლევა გაგრძელდება დასავლეთ საქართველოს რეგიონული ქრომატოგრაფიულ ცენტრსა და ქიმიის დეპარტამენტში.

ბსუ-ს საბუნებისმეტყველო მეცნიერებათა და ჯანდაცვის ფაკულტეტმა 2023-2024 სასწავლო წლის შემოდგომის სემესტრში, „ერაზმუს+“-ის გაცვლითი პროგრამის ფარგლებში, უმასპინძლა პოლონეთის, კროსნოს უნივერსიტეტის 2 სტუდენტს. ანნა რიშიმ და ოლივია იაგოდამ სემესტრის განმავლობაში გაიარეს ბიოლოგიის საგანმანათლებლო პროგრამის სხვადასხვა სასწავლო კურსები: იმუნოლოგია, სამედიცინო გენეტიკა, მოლეკულური ბიოლოგია, კონსერვაციული ბიოლოგია, ბოტანიკა და ემბრიოლოგია. მათ ასევე ჰქონდათ შესაძლებლობა, მონაწილეობა მიეღოთ საველე-სასწავლო პრაქტიკებში ბსუ-ს ფიტოპათოლოგიისა და ბიომრავალფეროვნების ინსტიტუტში, ბათუმის ბოტანიკურ ბაღსა და იმუნოგენეტიკის ლაბორატორიაში.

5-6 თებერვალს დიპლომირებული მედიკოსის ინგლისურენოვანინპროგრამის დამამთავრებელ კურსს ემერჯენსის პრაქტიკაში დასკვნითი გამოცდა ჩაუტარდათ OSCE – ობიექტურად სტრუქტურირებული კლინიკური გამოცდის ფორმატში, ხოლო 7-12 თებერვალს - კლინიკური უნარების სხვადასხვა საფეხურის გამოცდა. სტუდენტებმა ყველა სადგურზე კლინიკური ქეისი შეასრულეს შესაბამისი პრაქტიკული დავალებით და შეფასდნენ წინასწარ შედგენილი სტრუქტურირებული ჩეკ-ლისტების საშუალებით. ოსკი შეფასების ეფექტიანი სისტემაა, რომელიც მთლიან სასწავლო პროცესზე დადებითად აისახება. ამ სისტემაში მთავარი აქცენტი პაციენტთან ურთიერთობასა და კლინიკური განსჯის უნართან ერთად, განსაკუთრებული ყურადღება ექცევა სტუდენტის უნარ-ჩვევებს.