საქართველოს სპორტის სამინისტროს და აჭარის განათლებისა და სპორტის სამინისტროს მხარდაჭერითა და ბათუმის შოთა რუსთაველის სახელმწიფო უნივერსიტეტის პარტნიორობით, ბათუმი მასპინძლობს მეორე საერთაშორისო კონფერენციას თემაზე: „სპორტული მედიცინა - სპორტსმენთა ჯანმრთელობისა და მიღწევებისთვის“. კონფერენციაში ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ფიზიკური მედიცინისა და სამედიცინო რეაბილიტაციის საბაკალავრო პროგრამის სტუდენტები, აკადემიური პერსონალი და კურსდამთავრებულები მონაწილეობენ.

საბუნებისმეტყველო მეცნიერებათა და ჯანდაცვის ფაკულტეტის ეკოლოგიისა და ბიოლოგიის მიმართულების სტუდენტებმა და პროფესორ-მასწავლებლებმა ბიომრავალფეროვნების საერთაშორისო დღე აღნიშნეს. ასოცირებულმა პროფესორმა ინგა დიასამიძემ წარადგინა მოხსენება „ბიომრავალფეროვნების კონვენციების და კონსერვაციული სტრატეგიების შესახებ“, ასოცირებულმა პროფესორმა ნათელა ვარშანიძემ კი „აჭარის წითელი ნუსხის სახეობების თანამედროვე მდგომარეობის შესახებ“. ღონისძიებაში ასევე მონაწილეობდნენ მაჭახელას ეროვნული პარკის თანამშრომლები.

ბათუმის შოთა რუსთაველის სახელმწიფო უნივერსიტეტის სტომატოლოგიის სპეციალობის მე-5 კურსის სტუდენტები: თამარი ბაჯელიძე და გიორგი ბალაძე ბაუ სტამბულის (BAU Istanbul) სტომატოლოგიურ კლინიკაში პრაქტიკაზე იმყოფებოდნენ. სტუდენტებმა აქტიურად მიიღეს მონაწილეობა სხვადასხვა კლინიკურ პროცესში, დაესწრნენ სპეციალისტების მიერ ჩატარებულ თერაპიულ და ორთოპედიულ ჩარევებს, ცნობილი თურქი ყბა-სახის ქირურგების: ბასა სელჩუკისა და ალთან ვაროლის მიერ ჩატარებულ ქირურგიულ ოპერაციებს.

ბსუ-ს ფიზიკური მედიცინისა და სამედიცინო რეაბილიტაციის საგანმანათლებლო პროგრამის სტუდენტები, პრაქტიკის ხელმძღვანელ პროფესორ თამარ ჩილინგარაშვილთან და ლალი ავალიანთან ერთად, მემორანდუმის ფარგლებში სამუშაო ვიზიტით იმყოფებოდნენ კურორტ ციხისძირში. ვიზიტისას მათ მიიღეს ინფორმაცია თანამედროვე საერთაშორისო სტანდარტებით შექმნილი სასტუმრო კომპლექსისა და სპა-ველნეს ცენტრის შესახებ, სადაც სრულად არის წარმოდგენილი როგორც ქართული, ისე ფრანგული თალასოთერაპიული პროდუქცია და პროცედურები.

ბათუმის შოთა რუსთაველის სახელმწიფო უნივერსიტეტში ბსუ-ს დიპლომირებული მედიკოსის ინგლისურენოვანი საგანმანათლებლო პროგრამის უცხოელმა სტუდენტებმა AGNI FEST-ის ფარგლებში ეთნიკური კულტურის დღე მოაწყვეს. AGNI FEST ინდურ კულტურაში ცეცხლის დღესასწაულს განასახიერებს და სიწმინდის სიმბოლოა. ფესტივალის მიზანია სტუდენტების გაერთიანება და მეგობრული კავშირების დამყარება. ღონისძიებაზე გაიმართა ფესტივალის ეთნიკური ნაწილი, სადაც წარმოდგენილი იყო ინდოეთის სხვადასხვა რეგიონის ტრადიციული სამოსი, კერძები და მუსიკალური ნომრები.