25-26 თებერვალს, ბათუმის შოთა რუსთაველის სახელმწიფო უნივერსიტეტში ტრენინგი ჩატარდა თემაზე: „შეფასების მეთოდი - ობიექტურად სტრუქტურირებული კლინიკური გამოცდა - OSCE“. ღონისძიება მიზნად ისახავდა სტომატოლოგიის პროგრამაში თანამედროვე მეთოდების დანერგვასა და გამოყენების ხელშეწყობას. ტრენინგს უძღვებოდნენ დარგის ექსპერტები, ქუთაისის აკაკი წერეთლის სახელმწიფო უნივერსიტეტის სამედიცნო ფაკულტეტის წარმომადგენლები. ტრენინგს ესწრებოდნენ სტომატოლოგიის ერთსაფეხურიანი საგანმანათლებლო პროგრამის ხელმძღვანელი და პროგრამაში ჩართული, როგორც აკადემიური ასევე, მოწვეული პირები.

ბსუ-ს ხარისხის უზრუნველყოფის სამსახურისა და ინოვაციური განათლების ცენტრის ორგანიზებით, საბუნებისმეტყველო მეცნიერებათა და ჯანდაცვის ფაკულტეტის ხარისხის კოორდინატორებს 2021 წლის 25-26 ნოემბერს, ZOOM-ის პლატფორმის გამოყენებით ჩაუტარდა ტრენინგი თემაზე: „სწავლების აქტიური მეთოდების გამოყენება ონლაინ სწავლების დროს". 2022 წლის 18-19 თებერვალს ფაკულტეტის ხარისხის კოორდინატორებმა (ასოც. პროფ. ინგა დიასამიძე, ასისტ. პროფ. ხათუნა ჭიჭილეიშვილი და ასისტ. პროფ. ინდირა ჯაფარიძე) აღნიშნულ ტრენინგზე მიღებული ცოდნა გაუზიარეს საბუნებისმეტყველო მეცნიერებათა და ჯანდაცვის ფაკულტეტის - ბიოლოგიის, ქიმიის, გეოგრაფიის, კლინიკური მედიცინის, საზოგადოებრივი ჯანდაცვის და სტომატოლოგიის დეპარტამენტების პროფესორ -მასწავლებლებს. ტრენინგის მონაწილეები გაეცნენ ინფორმაციას სწავლების სხვადასხვა მეთოდის შესახებ, რომელსაც გამოიყენებენ როგორც დისტანციურ, ასევე აუდიტორიული სწავლების დროს.

სტუდენტურ კამპანიას - „ავიცრათ ერთმანეთისთვის“ ბათუმის შოთა რუსთაველის სახელმწიფო უნივერსიტეტის სტუდენტები შეუერთდნენ. უმაღლესმა საგანმანათლებლო დაწესებულებამ გამოწვევა ტექნოლოგიური უნივერსიტეტისგან მიიღო. ღონისძიების ფარგლებში საბუნებისმეტყველო მეცნიერებათა და ჯანდაცვის ფაკულტეტის სტუდენტები ბრენდირებული ხალათებითა და პირბადეებით შეიკრიბნენ და ვაქცინაციის პროცესის გააქტიურების მიზნით, საინფორმაციო ბროშურები დაარიგეს. კომპანია „ავიცრათ ერთმანეთისთვის“ ხორციელდება ორგანიზაცია „ქოლგის“ მხარდაჭერით.

“პანდემიას ასრულებ შენ!“ – ამ დევიზით ვაქცინაციის წამახალისებელ ექვსთვიან საინფორმაციო კამპანიაში ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის მედიცინის მიმართულების სტუდენტები ერთვებიან. კამპანია გაეროს ბავშვთა ფონდისა და იმუნიზაციისა და ვაქცინოლოგიის ასოციაციის (AIVA) მიერ USAID-ის მხარდაჭერით მიმდინარეობს და Covid 19-ის შესახებ საზოგადოების ინფორმირებას ისახავს მიზნად.
საინფორმაციო კამპანიის ფარგლებში,ბათუმის შოთა რუსთაველის სახელმწიფო უნივერსიტეტში თანამშრომლობის მემორანდუმი გაფორმდა, რომელსაც ხელი ბსუ-ს რექტორმა მერაბ ხალვაშმა, გაეროს ბავშვთა ფონდის წარმომადგენელმა საქართველოში (UNICEF) ღასან ხალილიმ და იმუნიზაციისა და ვაქცინოლოგიის ასოციაციის (AIVA) წარმომადგენელმა მარიამ ჯაშმა მოაწერეს.

აჭარის ა.რ. სოფლის მეურნეობის მინისტრი გიორგი სურმანიძე ბსუ-ს ტექნოლოგიური ფაკულტეტის აგრარული მიმართულების და საბუნებისმეტყველო მეცნიერებათა და ჯანდაცვის ფაკულტეტების სტუდენტებს შეხვდა და პროგრამის „აგროსექტორის მდგრადი განვითარების“ ქვეპროგრამა „საგანმანათლებლო და სამეცნიერო პრაქტიკის დანერგვა“ წარუდგინა. ღონისძიების ფარგლებში, ასევე გაიმართა სამინისტროს აგროსერვის ცენტრსა და გარემოს დაცვისა და ბუნებრივი რესურსების სამმართველოში ანაზღაურებადი, ექვსთვიანი სტაჟირების პროგრამის მონაწილე სტუდენტების შემაჯამებელი პრეზენტაცია. სოფლის მეურნეობის მინისტრმა გიორგი სურმანიძემ და ბსუ-ს რექტორმა, პროფესორმა მერაბ ხალვაშმა ახალგაზრდებს მადლობა გადაუხადეს სტაჟირების პროგრამაში წარმატებული მონაწილეობისთვის და წარმატებები უსურვეს.