1 ივნისს, მედიცინის I კურსის სტუდენტებმა, ბიოლოგიის დეპარტამენტის ასოცირებული პროფესორის ნინო ლომთათიძის ხელმძღვანელობით, წმინდა მატათა მოციქულის სახელობის გიმნაზია-პანსიონის 50 -მდე აღსაზრდელს ბავშვთა დაცვის საერთაშორისო დღე მიულოცეს და საჩუქრად ხილი და ტკბილეულობა მიუტანეს.
წმინდა მატათა მოციქულის სახელობის გიმნაზია-პანსიონი 2006 წლის 21 თებერვალს დაარსდა საქართველოს ავტოკეფალური მართმადიდებლური ეკლესიის, სრულიად საქართველოს კათოლიკოს–პატრიარქის, მცხეთა–თბილისის მთავარეპისკოპოსის, ბიჭვინთისა და ცხუმ–აფხაზეთის მიტროპოლიტის ილია II -ის თანადგომით და ბათუმისა და ლაზეთის, ჩრდილოეთ ამერიკის მიტროპოლიტის დიმიტრის ინიციატივით.
შეხვედრის დასასრულს, გიმნაზია-პანსიონის აღსაზრდელებმა სტუდენტებისათვის კონცერტი გამართეს.

საბუნებისმეტყველო მეცნიერებათა და ჯანდაცვის ფაკულტეტის მედიცინის სპეციალობის პირველკურსელები დაბა შუახევის საჯარო სკოლისა და სხალთის საჯარო სკოლის მოსწავლეებს შეხვდნენ. სტუდენტებმა მოსწავლეებს აჭარის რეგიონში ფართოდ გავრცელებული პარაზიტული დაავადებების: ენტერობიოზის, ასკარიდოზის, ტრიქოცეფალოზისა, ლამბლიოზის პათოგენეზზე მიაწოდეს ინფორმაცია და მოსალოდნელ გართულებებსა და პროფილაქტიკურ ღონისძიებებზე ესაუბრეს.

აჭარის ა/რ ჯანმრთელობისა და სოციალური დაცვის მინისტრი ნუგზარ სურმანიძე ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტებს შეხვდა. ნუგზარ სურმანიძემ სტუდენტებს ჯანდაცვის სისტემა გააცნო და დარგში განხორციელებულ, მიმდინარე და დაგეგმილ პროექტზე ესაუბრა.

15 მაისს, ფრინველთა მიგრაციის საერთაშორისო დღესთან დაკავშირებით, საბუნებისმეტყველო მეცნიერებათა და ჯანდაცვის ფაკულტეტის სტუდენტებმა და ეკო-ტურის წევრებმა აჭარის ა.რ. გარემოს დაცვისა და ბუნებრივი რესურსების სამმართველოს ორგანიზებით ჭოროხის დელტაში გასვლითი ღონისძიება განახორციელეს.
სტუდენტებმა გარემოს დაცვის ასოციაცია „ფსოვის“ დირექტორის, ჯიმშერ მამუჭაძის ღია ლექცია მოისმინეს ფრინველთა მიგრაციის ფენომენის შესახებ და ბინოკულარის საშუალებით გადამფრენ ფრინველებს დააკვირდნენ.

საბუნებისმეტყველო მეცნიერებათა და ჯანდაცვის ფაკულტეტზე განახლებული ზოოლოგიისა და მინერალოგიის კაბინეტები გაიხსნა. თანამედროვე სტანდარტებით მოწყობილ კაბინეტებში პროფესორ-მასწავლებლებისა და ლაბორანტების მიერ წლების განმავლობაში შეგროვებული უნიკალური მინერალოგიური ექსპონატები და ნიმუშები განთავსდა. სასწავლო თვალსაჩინოებისათვის განკუთვნილი ინტერიერი და საგამოფენო სტენდები საბუნებისმეტყველო მიმართულების სტუდენტებისათვის პრაქტიკული უნარ-ჩვევების ჩამოყალიბებასა და სასწავლო პროცესის ეფექტურობას შეუწყობს ხელს.