10 აპრილს ბსუ-ს ეკოკლუბის წევრებმა ეკოტურის ფარგლებში ხელვაჩაურის მუნიცეპალიტეტის სოფ. მირვეთში რელიქტური კოლხური ტყის შთენილი „კოლხური ბზის ხეივანი“ მოინახულეს. აჭარის რეგიონის ტერიტორიებზე ბზის კორომებში თავი იჩინა აქამდე უცხო სოკოვანმა დაავადებამ – ბზის სიდამწვრემ, რომელმაც სოფელ მირვეთის ბზის მრავალსაუკუნოვანი ხეივანი ერთიანად გაანადგურა. ვიზიტის საფუძველზე ბზის კორომებში მიმდინარე სუქცესიურ პროცესებში წვდომისა და შეფასების მიზნით უახლოესი მომავლისთვის დაიგეგმა დებატები.
აჭარის განათლების ფონდის მასწავლებელთა სახლის ქიმიის მიმართულების ტრენერი ნუკრი კობახიძე ქიმიის საბაკალავრო და მასწავლებლის მომზადების მინორ პროგრამის სტუდენტებს, მაგისტრანტებს და დოქტორანტებს შეხვდა. სამუშაო შეხვედრაზე სტუდენტები მიერ დასმულ შეკითხვებს და გაუზიარა გამოცდილება ქიმიური სიმბოლოების, ნიშნების, რეაქციის ტოლობებისა და გარდაქმნების, აგრეთვე მოლეკულის სხვადასხვა სახის სამგანზომილებიანი მოდელების შექმნის ახალი ტექნოლოგიების შესახებ, ესაუბრა ქიმიის სწავლების თანამედროვე მეთოდებზე.
საბუნებისმეტყველო მეცნიერებათა და ჯანდაცვის ფაკულტეტის ბიოლოგიის სპეციალობის სტუდენტების მონაწილეობით ბათუმის ბოტანიკურ ბაღში ტყის საერთაშორისო დღე აღნიშნეს. ბაღის ადგილობრივი ფლორისა და კონსერვაციის დეპარტამენტის მთავარმა სპეციალისტმა თემურ ვასაძემ სტუდენტებისათვის სემინარი ჩაატარა: „აჭარაში გავრცელებული „საქართველოს წითელი ნუსხის“ მერქნიანი მცენარეები“. ღონისძიების ფარგლებში, სტუდენტებმა დაათვალიერეს ბაღის ამიერკავკასიის ტენიანი სუბტროპიკების ფიტოგეოგრაფიული განყოფილება, სადაც სტუდენტებს „საქართველოს წითელი ნუსხის სახეობებზე“ ამომწურავი ინფორმაციები მიაწოდეს ბაღის ადგილობრივი ფლორისა და კონსერვაციის დეპარტამენტის უფროსმა დავით ხარაზიშვილმა და ჰერბარიუმის ფონდის ხელმძღვანელმა ნინო მემიაძემ. სტუდენტებმა, ამიერკავკასიის ტენიანი სუბტროპიკების ფიტოგეოგრაფიული განყოფილების იშვიათ მცენარეთა ნაკვეთში, „საქართველოს წითელი ნუსხის სახეობის“ - ლაფანის ნერგები დარგეს.
26-28 თებერვალს, საბუნებისმეტყველო მეცნიერებათა და ჯანდაცვის ფაკულტეტის ბიოლოგიისა და ეკოლოგიის მაგისტრებმა მონაწილეობა მიიღეს ახალგაზრდა მეცნიერთა კონფერენციაზე, რომელიც საქართველოს მეცნიერებათა ეროვნული აკადემიის 75 წლისთავს მიეძღვნა.
ივანე ჯავახიშვილის სახელობის თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის დეკანმა, ასოცირებულმა პროფესორმა თამარ დოლბაიამ საჯარო ლექცია ჩაატარა საბუნებისმეტყველო მეცნიერებათა და ჯანდაცვის ფაკულტეტის სტუდენტებისა და პროფესორ-მასწავლებლებისათვის. საჯარო ლექციის თემა გახლდათ „საქართველოს მოსახლეობის დამოკიდებულება შავიზღვისპირა მდებარეობისადმი და საპორტო ქალაქების განვითარების პერსპექტივები“. ლექციის შემდეგ გაიმართა დისკუსია, რომლის შემდეგაც გამოითქვა ორმხრივი სურვილი ამ ფორმატით საჯარო ლექციების ციკლის გაგრძელებისა.
