ბათუმის შოთა რუსთაველის სახელმწიფო უნივერსიტეტი „მე-12 საერთაშორისო ტურიზმისა და სასტუმრო აღჭურვილობის და მე-2 საერთაშორისო სამედიცინო ტურიზმის გამოფენაში“ მონაწილეობს. გამოფენაზე საბუნებისმეტყველო მეცნიერებათა და ჯანდაცვის ფაკულტეტისა და ტურიზმის ფაკულტეტის სტუდენტები, პროფესორ-მასწავლებლები დამთვალიერებლებს ქართულენოვან საგანმანათლებლო პროგრამებთან ერთად, დიპლომირებული მედიკოსის ერთსაფეხურიან ინგლისურენოვან საგანმანათლებლო პროგრამას გააცნობენ. ასევე წარუდგენენ უნივერსიტეტში სწავლების პირობებს, სერვისებსა და სტუდენტურ ცხოვრებას. ბსუ-ში დიპლომირებული მედიკოსის ერთსაფეხურიან ინგლისურენოვან საგანმანათლებლო პროგრამაზე 625 ინდოელი სტუდენტი სწავლობს. საერთაშორისო გამოფენა სამ დღეს გაგრძელდება და მასში 13 ქვეყნის 80-ზე მეტი ქართული და უცხოური კომპანია მონაწილეობს.

ტურიზმის ფაკულტეტის ორგანიზებით ისტორიულ ტაო-კლარჯეთში ტრადიციული სასწავლო-პრაქტიკული ტური მოეწყო. ბათუმის შოთ რუსთაველის სახელმწიფო უნივერსიტეტის ტურიზმის ფაკულტეტის 60-მა სტუდენტმა სამდღიანი მოგზაურობის ფარგლებში ხახულის, ოშკის, იშხანის, ოთხთას, პარხალის, დოლისყანის, ტბეთის და შატბერდის ტაძრები და სამონასტრო კომპლექსები მოინახულეს. ტური კულტურული ტურიზმისა და საექსკურსიო საქმის სასწავლო კურსების ფარგლებში განხორციელდა და მიზნად ისახავდა სტუდენტების ცოდნის გაღრმავებასა და პროფესიული უნარ-ჩვევების გამომუშავებას.

ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის ასისტენტმა ნინო დევაძემ ერასმუს+-ის პროგრამის ფარგლებში პორტუგალიაში, მინიოს უნივერსიტეტში ლექციები ჩაატარა. ნინო დევაძემ ერთი კვირის განმავლობაში სემინარები ჩაატარა ასევე ბაკალავრიატისა და მაგისტრატურის საგანმანათლებლო პროგრამების სტუდენტებისათვის ტურიზმის მდგრადი განვითარების საკითხებზე.

საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის და აჭარის ა.რ. ტურიზმისა და კურორტების დეპარტამენტის ორგანიზებით ბათუმის შოთა რუსთაველის სახელმწიფო უნივერსიტეტში სამდღიანი სასწავლო კურსი დაიწყო თემაზე: „ტურისტული დიპლომატია, როგორც ქვეყნის საგარეო პოლიტიკის მნიშვნელოვანი პრიორიტეტი“. დიპლომატიური კორპუსის წარმომადგენლები, საქართველოს საგარეო საქმეთა სამინისტროს თანამშრომლები და ლევან მიქელაძის სახელობის დიპლომატიური სასწავლო და კვლევითი ინსტიტუტის მკვლევარები ბსუ-ს სტუდენტებსა და ტურიზმით დაინტერესებულ პირებს ლექციებს წაუკითხავენ საქართველოს საგარეო პოლიტიკის, დიპლომატიისა (ტურისტული, ეკონომიკური, კულტურული დიპლომატიის) და საერთაშორისო სივრცეში ინტეგრირების საკითხებზე. სასწავლო კურსი ელჩის მიხეილ უკლებას საჯარო ლექციით - „საქართველოს დიპლომატიის უახლესი ისტორია 1991 წლიდან დღემდე“ დაიწყო.

საქართველოს, ყირგიზეთსა და ნორვეგიას შორის განათლების სფეროში თანამშრომლობის პროექტის „მდგრადი ტურიზმი: სოფლად მეწარმეობა და კულტურული მემკვიდრეობა“ ფარგლებში, ყირგიზი სტუდენტები საკვალიფიკაციო ნაშრომის კვლევით კომპონენტს ერთი თვის განმავლობაში ბსუ-ს ტურიზმის ფაკულტეტზე ასრულებენ. ტურიზმის ფაკულტეტის დეკანმა, პროფესორმა როსტომ ბერიძემ სტუდენტებს ფაკულტეტის აკადემიური პერსონალი, ინფრასტრუქტურა და განვითარების სტრატეგიები გააცნო. საინფორმაციო შეხვედრაზე სტუმრები ფაკულტეტის სტუდენტებს ყირგიზეთის ტურისტულ რესურსებსა და პერსპექტივებზე ესაუბრეს.