ბათუმის შოთა რუსთველის სახელმწიფო უნივერსიტეტის ტურიზმის ფაკულტეტის ტურიზმის დეპარტამენტის ხელმძღვანელმა, პროფესორმა ანზორ დევაძემ და ხარისხის უზრუნველყოფის სამსახურის ხელმძღვანელმა, ასისტენტ პროფესორმა ირაკლი კორძაიამ 23-24 მაისს მონაწილეობა მიიღეს პოლტავის იური კონდრატიუკის სახელობის ეროვნულ ტექნიკურ უნივერსიტეტის III საერთაშორისო სამეცნიერო-პრაქტიკულ კონფერენციაში „სახელმწიფოს ეკონომიკური განვითარება და მისი სოციალური სტაბილურობა’’. პროფესორმა ანზორ დევაძემ სესიაზე მოხსენება წაიკითხა თემაზე: „საერთაშორისო ტურისტული ბაზრის განვითარების პრობლემები საქართველოში“, ხოლო ასისტენტ პროფესორმა ირაკლი კორძაიამ - „საერთაშორისო ტურისტული ბაზარი, როგორც სოციალურ ურთიერთობათა სისტემის შემადგენელი ნაწილი’’.

ბსუ-ს ტურიზმის ფაკულტეტის სტუდენტებმა ნინო თურმანიძემ, მარიამ ანანიძემ, ქეთევან ზოიძემ და ლუიზა ჯაიანმა ყაზგუს უნივერსიტეტის საერთაშორისო კვირეულში საქართველო წარადგინეს. ღონისძიების ფარგლებში სტუდენტებმა მონაწილეობა მიიღეს დაგეგმილ აქტივობებში, წარადგინეს პრეზენაციები, ტრადიციული კერძები და ფოლკლორული პერფორმანსები. ბსუ-ს და ყაზახეთის იურიდიული უნივერსიტეტის გაცვლითი პროგრამის ფარგლებში სტუდენტები ერთი სემესტრის განმავლობაში ყაზგუს უნივერსიტეტში სწავლობენ.

„ერაზმუს+-ის” აკადემიური პერსონალის გაცვლითი პროგრამის ფარგლებში ბსუ-ს ტურიზმის ფაკულტეტის სტუდენტებისთვის ზალცბურგის გამოყენებით მეცნიერებათა უნივერსიტეტის ლექტორმა სიუზენ სტეპეტმა ლექციათა ციკლი და პრაქტიკული აქტივობები ჩაატარა თემაზე: „ბიზნესის დაგეგმვა და განვითარება“. სამი მოდულისგან შემდგარი სასწავლო კურსი მიზნად ისახავს ახალი ტურისტული პროდუქტისთვის ბიზნეს გეგმის შემუშავებასა და მისი მიზანშეწონილობის განსაზღვრას.

ბათუმის შოთა რუსთაველის სახელმწიფო უნივერსიტეტი „მე-12 საერთაშორისო ტურიზმისა და სასტუმრო აღჭურვილობის და მე-2 საერთაშორისო სამედიცინო ტურიზმის გამოფენაში“ მონაწილეობს. გამოფენაზე საბუნებისმეტყველო მეცნიერებათა და ჯანდაცვის ფაკულტეტისა და ტურიზმის ფაკულტეტის სტუდენტები, პროფესორ-მასწავლებლები დამთვალიერებლებს ქართულენოვან საგანმანათლებლო პროგრამებთან ერთად, დიპლომირებული მედიკოსის ერთსაფეხურიან ინგლისურენოვან საგანმანათლებლო პროგრამას გააცნობენ. ასევე წარუდგენენ უნივერსიტეტში სწავლების პირობებს, სერვისებსა და სტუდენტურ ცხოვრებას. ბსუ-ში დიპლომირებული მედიკოსის ერთსაფეხურიან ინგლისურენოვან საგანმანათლებლო პროგრამაზე 625 ინდოელი სტუდენტი სწავლობს. საერთაშორისო გამოფენა სამ დღეს გაგრძელდება და მასში 13 ქვეყნის 80-ზე მეტი ქართული და უცხოური კომპანია მონაწილეობს.

ტურიზმის ფაკულტეტის ორგანიზებით ისტორიულ ტაო-კლარჯეთში ტრადიციული სასწავლო-პრაქტიკული ტური მოეწყო. ბათუმის შოთ რუსთაველის სახელმწიფო უნივერსიტეტის ტურიზმის ფაკულტეტის 60-მა სტუდენტმა სამდღიანი მოგზაურობის ფარგლებში ხახულის, ოშკის, იშხანის, ოთხთას, პარხალის, დოლისყანის, ტბეთის და შატბერდის ტაძრები და სამონასტრო კომპლექსები მოინახულეს. ტური კულტურული ტურიზმისა და საექსკურსიო საქმის სასწავლო კურსების ფარგლებში განხორციელდა და მიზნად ისახავდა სტუდენტების ცოდნის გაღრმავებასა და პროფესიული უნარ-ჩვევების გამომუშავებას.