ბსუ-ში წიგნის „ლაზურ-მეგრული გრამატიკა I. მორფოლოგია“ პრეზენტაცია გაიმართა. სახელმძღვანელო ავტორებმა:ჭაბუკი ქირიამ, ლალი ეზუგბაიამ, ომარ მემიშიშმა, მერაბ ჩუხუამ წარადგინეს. ნაშრომი შესრულდა შოთა რუსთაველის სამეცნიერო ეროვნული ფონდის ფუნდამენტური კვლევების გრანტით სამეცნიერო პროექტის „ლაზურისა და მეგრულის შეპირისპირებითი გრამატიკა. I. მორფოლოგია (საერთო ძირ-ფუძეთა ინდექსითურთ)“ მიხედვით 2012-2015 წლებში თსუ არნ. ჩიქობავას სახელობის ენათმეცნიერების ინსტიტუტის ბაზაზე.

ბათუმის შოთა რუსთაველის სახელმწიფო უნივერსიტეტში ინგლისური ენის საზაფხულო სკოლა გაიხსნა. ღონისძიება აშშ-ს ელჩმა საქართველოში რიჩარდ ნორლანდმა, ბსუ-ს რექტორის მოვალეობის შემსრულებელმა, ასოცირებულმა პროფესორმა მერაბ ხალვაშმა, ჰუმანიტარულ მეცნიერებათა ფაკულტეტის დეკანმა, პროფესორმა მარინა გიორგაძემ, მშვიდობის კორპუსის დირექტორის მოადგილემ კარმენ შიენმა და მშვიდობის კორპუსის ინგლისური ენის მასწავლებელმა მარია ინისმა გახსნეს. ორკვირიანი საზაფხულო სკოლა ახალგაზრდებში ინგლისურ ენაზე თავისუფლად საუბრის უნარ-ჩვევების გამომუშავებასა და ამერიკის კულტურის შესახებ ცოდნის შეძენას ითვალისწინებს. მასში პირველ ეტაპზე ბათუმის კერძო და საჯარო სკოლების IX, X, XI კლასების 130 წარმატებული მოსწავლე მიიღებს მონაწილეობას, ხოლო მეორე ეტაპზე - ბსუ-ს ინგლისური ფილოლოგიის 100-მდე სტუდენტი.

ბათუმის შოთა რუსთაველის სახელმწიფო უნივერსიტეტის სტუდენტები ნახჭევანის სახელმწიფო უნივერსიტეტთან გაფორმებული მემორანდუმის საფუძველზე, მესამე წელია მონაწილეობენ გაცვლით პროგრამაში და სასწავლო კურსის ერთ სემესტრს გადიან ნახჭევანში. მიმდინარე სასწავლო წელს გაზაფხულის სემესტრი საპასუხო ვიზიტით ნახჭევანის უნივერსიტეტში გაატარეს ჰუმანიტარულ მეცნიერებათა ფაკულტეტის სტუდენტებმა: ქეთევან არძენაძემ, თამთა ნაგერვაძემ (ინგლისური ფილოლოგია); ლელა მაჭუტაძემ, სოფიკო კონცელიძემ (თურქული ფილოლოგია, თურქეთისმცოდნეობა).

ბათუმის შოთა რუსთაველის სახელმწიფო უნივერსიტეტის ფილოსოფიის სპეციალობის 1-ლი კურსის სტუდენტებმა სასწავლო კურსის ,,დემოკრატია და მოქალაქეობა“ ფარგლებში პროექტების პრეზენტაცია გამართეს. ჰუმანიტარულ ფაკულტეტთან არსებული ,,არაფორმალური განათლების ცენტრის“ ღია ბიბილიოთეკის მხარდაჭერის მიზნით უნივერსიტეტის ფოიეში კუთხე ახალი წიგნებითა და პუფებით მოაწყვეს და ჩატარებული ღონისძიებების შედეგები წარმოადგინეს. სტუდენტებმა ბუნების დასაცავად თამარის დასახლებაში ხეები დარგეს, ზებრა ზოლზე ქვეითების გზის დათმობის მოთხოვნით გამოკითხვები ჩაატარეს და აქციები მოაწყვეს. ახალგაზრდები ჟესტების ენას დაეუფლნენ და შემდეგ დაინტერესებულ პირებს შეასწავლეს.

ჰუმანიტარულ მეცნიერებათა ფაკულტეტთან არსებულ ლიტერატურულ კლუბში გაიმართა მწერლის, მთარგმნელის, ესეისტის დათო ბარბაქაძის საჯარო ლექცია თემაზე: „პოეზია, როგორც პასუხებზე კითხვების გაცემის ხელოვნება". ფილოსოფიურ კულტუროლოგიური ანალიზის არეალში მოხვედრილ მრავალ ასპექტს შორის უმნიშვნელოვანესია პოეზიის უმდიდრესი გამოცდილების, მისი თუნდაც პირწმინდად ისტორიული შრისგან ზოგადებადა, ამის საფუძველზე, პოეზიის ძირითადი ექსისტენციალური კოდების დადგენა. აღნიშნული ამოცანის „ამოსახსნელად“ კი აუცილებელი ხდება პოეზიის შეპირისპირება მასთან განსაკუთრებით დაახლოებული სულიერი მოღვაწეობის - ფილოსოფიის - გამოცდილებასთან. მომხსენებელმა დათო ბარბაქაძემ საკითხი განიხილა პოეზიის, როგორც „სიბრძნის ერთი დარგის“ პოზიციებიდან (პოეზიისა და ფილოსოფიის თავდაპირველი თანაარსებობის ბერძნული გამოცდილების გათვალისწინებით.