ფაშიზმზე გამარჯვების 70 წლისადმი მიძღვნილი სამეცნიერო სესია გაიმართა ბათუმის შოთა რუსთაველის სახელმწიფო უნივერსიტეტში. ნიკო ბერძენიშვილის ინსტიტუტის მკვლევარებმა, ისტორიის, არქეოლოგიისა და ეთნოლოგიის დეპარტამენტის პროფესორ-მასწავლებლებმა და აჭარის ხარიტონ ახვლედიანის სახელობის მუზეუმის მეცნიერ-თანამშრომლებმა მოხსენებები წარმოადგინეს მეორე მსოფლიო ომის საკითხებზე. კონფერენციის მონაწილეებმა ისეთი მნიშვნელოვანი საკითხები განიხილეს, როგორიცაა „აჭარა მეორე მსოფლიო ომის წლებში“, „მეორე მსოფლიო ომი და თურქეთის მიერ მიტაცებული ქართული ტერიტორიების დაბრუნების საკითხი“, „ჰიტლერის გეგმები მსოფლიოს პოლიტიკური რუკის შეცვლაში“, „ბათუმის შოთა რუსთაველის სახელმწიფო პედაგოგიური ინსტიტუტის წარგზავნილები მეორე მსოფლიო ომში“ და „მეორე მსოფლიო ომში მონაწილე ქალები აჭარიდან“. სამეცნიერო სესია ბათუმის შოთა რუსთაველის სახელმწიფო უნივერსიტეტისა და აჭარის ხარიტონ ახვლედიანის სახელობის მუზეუმის ორგანიზებით ჩატარდა.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ქართული ფილოლოგიის სამეცნიერო კლუბის წევრებმა (ხელმძღვანელი ასოც. პროფ. გ. ბახტაძე) ილია ჭავჭავაძის მუზეუმში ჩაატარეს სამეცნიერო კონფერენცია თემაზე: „ჩემო კარგო ქვეყანავ“. სესიაზე სტუდენტებმა ილია ჭავჭავაძის საზოგადოებრივ ღვაწლზე, ცხოვრებასა და შემოქმედებაზე საინტერესო თემები წარმოადგინეს.

ბათუმის სახელმწიფო უნივერსიტეტის ჰუმანიტარულ მეცნიერებათა ფაკულტეტზე, „არაფორმალური განათლების ცენტრის“ ფარგლებში, მიმდინარე სასწავლო წელს ჩამოყალიბდა ლიტერატურის კლუბი, რომელსაც ფილოლოგიის დოქტორი, ასოცირებული პროფესორი, ნანა ტრაპაიძე ხელმძღვანელობს. შეხვედრები იმართება ყოველ კვირას, 14:00 საათზე. კლუბის მიზანია შექმნას არაფორმალური განათლების პრაქტიკა, მოიზიდოს ჰუმანიტარული ცოდნით დაინტერესებული სტუდენტები მათი ინტელექტის, კრიტიკული და სამოქალაქო აზროვნების განვითარებისათვის. კლუბის მუშაობაში აქტიურად არიან ჩართულები არა მხოლოდ ჰუმანიტარულო ფაკულტეტს სტუდენტები.

ჰუმანიტარულ მეცნიერებათა ფაკულტეტის ფილოსოფიის სექციის სტუდენტთა რეფერატული ნაშრომების კონკურსი ჩატარდა. კონკურსში მონაწილეობა მიიღეს ბათუმის შოთა რუსთაველის სახელმწიფო უნივერსიტეტის ფილოსოფიის, ქართული ფილოლოგიისა და ევროპისმცოდნეობის სპეციალობების სტუდენტებმა. წარმოდგენილი მოხსენებების ირგვლივ გაიმართა საინტერესო დისკუსია.

იენის ფრიდრიხ შილერის სახელობის უნივერისიტეტის პროფესორმა ანეგრეტ-პლონტკე-ლუნინგმა უნივერსიტეტში საჯარო ლექციათა ციკლი დაიწყო ბიზანტიური კულტურისა და ისტორიის საკითხებზე. გერმანელი ექსპერტი მოხსენებებს წაიკითხავს შემდეგ თემებზე: ,,რას ნიშნავს ბიზანტია?“,,რავენა - გვიანანტიკური ხანის დასავლეთ ევროპის დედაქალაქი“, ,,ადრეული ბიზანტიური არქიტექტურა“, ,,ნეობიზანტიზმი დასავლეთ ევროპის არქიტექტურაში“. საჯარო ლექციები აჭარის ა.რ. განათლების, კულტურისა და სპორტის სამინისტროს ,,უმაღლესი განათლების ხელშეწყობა“ ქვეპროგრამების ფარგლებში ტარდება.