იუნესკოს მიერ დაწესებულ მეცნიერების მსოფლიო დღესთან დაკავშირებით თბილისში საქართველოს მეცნიერებათა ეროვნულ აკადემიაში საზეიმო სხდომა ჩატარდა. საქართველოს მეცნიერებათა ეროვნულმა აკადემიამ ბათუმის შოთა რუსთაველის სახელმწიფო უნივერსიტეტის პროფესორი, აჭარის რეგიონალური სამეცნიერო ცენტრის სამეცნიერო საბჭოს წევრი, მარინე აროშიძე ფოლოლოგიის დარგის განვითარებაში შეტანილი წვლილისათვის საპატიო სიგელით დააჯილდოვა. უნივერსიტეტი ულოცავს პროფესორ მარინე აროშიძეს გამარჯვებას და უსურვებს წარმატებებს.

2015 წლის 7-8 ნოემბერს ჰუმანიტარულ ფაკულტეტთან არსებულ ლიტერატურულ კლუბში ფილოსოფოსისა და ლიტერატურის კრიტიკოსის ლექსო დორეულის საჯარო ლექცია გაიმართა თემაზე: „ლიტერატურა და ფენომენოლოგია“. ფენომენოლოგია მე-20 საუკუნის ერთ-ერთი ყველაზე გავლენიანი მიმდინარეობაა. მის ფარგლებში ორიგინალურად გაიაზრებოდა მთელი რიგი ფილოსოფიური პრობლემები და ჩამოყალიბდა ეგოლოგიის, ანუ „მე“-ს მცოდნეობის ახლებური პარადიგმები, რომლებიც დღესაც არ კარგავს თეორიული მნიშვნელობას და ახლაც ინტენსიური კვლევის ობიექტს წარმოადგენს თანამედროვე ფილოსოფიისათვის. ამ ფილოსოფიურმა მიმდინარეობამ გარკვეული გავლენა იქონია თანამედროვე კულტურის ფორმირებაზე. ფენომენოლოგიურ მეთოდს და მასზე დამყარებულ „მე“-ს შემეცნების პრინციპს გამოიყენებს არა მხოლოდ ფილოსოფიური აზროვნება; მან მკაფიო ასახვა ჰპოვა მხატვრულ ლიტერატურაშიც.

ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტთან არსებულ ლიტერატურულ კლუბში გაიმართა შეხვედრა ფილოსოფოსთან და ლიტერატურის კრიტიკოსთან ლექსო დორეულთან. სტუმარმა სტუდენტებისათვის ორდღიანი საჯარო ლექცია წაიკითხა თემაზე: „ფენომენოლოგია და ლიტერატურა“. ღონისძიება აჭარის ა.რ. განათლების, კულტურისა და სპორტის სამინისტროს „უმაღლესი განათლების ხელშეწყობის“ ქვეპროგრამის ფარგლებში ჩატარდა.

ჰუმანიტარულ მეცნიერებათა ფაკულტეტთან არსებულ ლიტერატურულ კლუბში გაიმართა ფილოსოფიის დოქტორის, პროფესორ გია ბარამიძის საჯარო ორდღიანი ლექცია თემაზე „ლიტერატურა და კინემატოგრაფი“. ლექცია მიზნად ისახავდა სიტყვას/ხმასა და გამოსახულებას შორის არსებული კავშირის ნათელყოფას, მხატვრული სახეებისა და კინემატოგრაფიული გამოსახულებების, ლიტერატურული ენისა და კინოენის თავისებურებათა გაანალიზებას. მომხსენებელმა ისაუბრა კინოს, როგორც უნივერსალური ენის, აბსტრაქციისა და უნივერსალიზაციის, გამოსახულებებისა და ნიშნების კომპოზიციის გაგებაზე; ლექცია ასევე ითვალისწინებდა იმის ახსნას, თუ რა მიმართებაშია ერთმანეთთან მხატვრული წარმოსახვა და კინემატოგრაფიული ფანტაზია; განსაკუთრებული ყურადღება დაეთმო სიუჟეტური დროისა და კინემატოგრაფიული დროის პრობლემას.

ბათუმის შოთა რუსთაველის სახელმწიფო უნივერსიტეტის 80 წლის იუბილისადმი მიძღვნილი XXXV რესპუბლიკური დიალექტოლოგიური სამეცნიერო კონფერენცია გაიხსნა შოთა რუსთაველის დარბაზში. სამეცნიერო სესია მიზნად ისახავს საქართველოში მიმდინარე საველე-შემკრებლობითი და კვლევითი საქმიანობის შედეგების შეჯამებას. ქვეყნის სხვადასხვა უმაღლესი საგანმანათლებლო დაწესებულების პროფესორ-მასწავლებლები, სამეცნიერო ინსტიტუტების მეცნიერ-თანამშრომლები და ახალგაზრდა მკვლევრები ორ სექციაში მოხსენებს წარმოადგენენ დიალექტოლოგიის აქტუალურ საკითხებზე.