ილიას სახელმწიფო უნივერსიტეტის პროფესორმა ცირა ბარბაქაძემ ჰუმანიტარულ მეცნიერებათა ფაკულტეტის სტუდენტებისა და პროფესორ-მასწავლებლებისათვის საჯარო ლექცია წაიკითხა თემაზე: "კვანტურობა, შემოქმედება და ადამიანი". მომხსენებლის შეფასებით, მეცნიერები სულ უფრო რწმუნდებიან იმაში, რომ კვანტური ეფექტები მხოლოდ ფიზიკის სფეროს არ განეკუთვნება, იგი ცნობიერების პროცესების გამოვლინებაა და ვრცელდება ყველაფერზე. თანამედროვე ადამიანი კვანტური ცნობიერების დაუფლებით ცვლის და მართავს საკუთარ ცხოვრებას. ღონისძიება ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტისა და ილიას სახელმწიფო უნივერსიტეტის სემიოტიკის კვლევითი ცენტრის მემორანდუმის ფარგლებში გაიმართა.

UNESCO-ს რეგლამენტით გათვალისწინებული ფილოსოფიის პროგრამის ფარგლებში ბათუმის შოთა რუსთაველის სახელმწიფო უნივერსიტეტის ბიბლიოთეკაში ფილოსოფიის მსოფლიო დღისადმი მიძღვნილი ახალი პუბლიკაციების პრეზენტაცია გაიმართა. ჰუმანიტარულ მეცნიერებათა ფაკულტეტის ფილოსოფიის დეპარტამენტის ორგანიზებით ჩატარებულ ღონისძიებაზე ფილოსოფიის სპეციალობის სტუდენტებმა ახალი თარგმანები, მნიშვნელოვანი ტექსტები და სამეცნიერო კრებულები წარადგინეს. პროფესორმა ლალი ზაქარაძემ ისაუბრა ფილოსოფიის საერთაშორისო დღის ისტორიაზე, UNESCO-ს კულტურათა დაახლოების საერთაშორისო ათწლეულის (2013-2022) მიზნებზე, ინიციატივებზე, თანამედროვე საზოგადოებისთვის ფილოსოფიისა და კრიტიკული აზროვნების როლსა და მნიშვნელობაზე.

ბათუმის შოთა რუსთაველის სახელმწიფო უნივერსიტეტის რექტორის მოვალეობის შემსრულებლის მერაბ ხალვაშის 2015 წლის 11 ნოემბრის #01-08/54 ბრძანების შესაბამისად, დაიწყო საგანმანათლებლო პროგრამების განხილვა. ჰუმანიტარულ მეცნიერებათა ფაკულტეტის სპეციალურმა კომისიებმა საბაკალავრო საგანმანათლებლო პროგრამების აკრედიტაციის სტანდარტებთან შესაბამისობის განსაზღვრისა და ხელახალი აკრედიტაციისათვის მომზადებისათვის შეისწავლეს შემდეგი პროგრამები: „ქართული ფილოლოგია“, „რუსული ფილოლოგია“, „თურქოლოგია“, „თურქული ფილოლოგია“. 18-19 ნომებერს იგეგმება პროგრამების „ინგლისური ფილოლოგია“, „ფრანგული ფილოლოგია“, „გერმანული ფილოლოგია“, „ფილოსოფია“, „ისტორია“, „არქეოლოგია“ წარდგინება.

ბათუმის შოთა რუსთაველის სახელმწიფო უნივერსიტეტი მწუხარებას გამოთქვამს 13 ნოემბერს, პარიზში მომხდარი ტრაგედიის გამო და თანაგრძნობას უცხადებს საფრანგეთსა და დაღუპულთა ოჯახებს. უნივერსიტეტის რექტორის მოვალეობის შემსრულებელმა მერაბ ხალვაშმა, პროფესორ-მასწავლებლებმა, მკვლევრებმა, ადმინისტრაციის თანამშრომლებმა და სტუდენტებმა უმაღლეს საგანმანათლებლო დაწესებულებაში გამართულ სოლიდარობის აქციაზე დაგმეს საფრანგეთში განხორციელებული ტერორისტული აქტები და პატივი მიაგეს დაღუპულთა ხსოვნას.

ჰუმანიტარულ მეცნიერებათა ფაკულტეტს ექვსი სახელობითი სტიპენდიანტი ჰყავს. საიუბილეო წელს ბათუმის შოთა რუსთაველის სახელმწიფო უნივერსიტეტში აღდგა შოთა რუსთაველის სახელობის სტიპენდია, რომლის პირველი მფლობელი „თურქეთის მცოდნეობის“ სპეციალობის III კურსის სტუდენტი ბექა მაკარაძე გახდა. ავთანდილ ბარათაშვილის სახელობის სტიპენდია ისტორიის სპეციალობის IV კურსის სტუდენტ თამაზ დავითაძეს დაენიშნა, სელიმ ხიმშიაშვილის სახელობის სტიპენდია - მაგისტრანტ თინიკო პაპიძეს, აკადემიკოს დავით ხახუტაიშვილის სტიპენდია - მაგისტრანტ ნათია მახარაძეს, პროფესორ როლანდ კომახიძის სახელობის სტიპენდია - მაგისტრანტ ნათია ტარიელაძეს, ხოლო პროფესორ აბელ სურგულაძის სახელობის სტიპენდია - მაგისტრანტ ნაირა გუნდაძეს. ფაკულტეტის სტუდენტები, პროფესორ-მასწავლებლები და ადმინისტრაცია სტუდენტებს ულოცავენ წარმატებას.