13-17 ივლისს, ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის ფილოსოფიის ძირითადი და დამატებითი სპეციალობის სტუდენტები, პროფ. ლალი ზაქარაძის ხელმძღვანელობით მონაწილეობდნენ ახალი საქართველოს უნივერსიტეტის მიერ ორგანიზებულ ზაფხულის სკოლაში - ქრისტიანული ფილოსოფია (მარიუს ვიქტორინუსი, ნეტარი ავგუსტინე, ბოეციუსი). საზაფხულო სკოლა ჩატარდა ხობის მუნიციპალიტეტში, ხობის ისტორიული მონასტრის ტერიტორიაზე არსებულ ახლადაღდგენილ საკათალიკოსო სასახლეში.

საქართველოს მეცნიერებათა ეროვნული აკადემიის პრეზიდიუმის დადგენილებით ბათუმის შოთა რუსთაველის სახელმწიფო უნივერსიტეტის ჰუმანიტარულ მეცნიერებათა ფაკულტეტის პროფესორებს: მამია ფაღავას (პროექტის სამეცნიერო ხელმძღვანელი და რედაქტორი), მალხაზ ჩოხარაძეს (პროექტის კოორდინატორი), †ემერიტუს-პროფესორ მერი ცინცაძეს, თინა შიოშვილს, შოთა მამულაძეს, რამაზ ხალვაშს, ნუგზარ მგელაძეს; ასოცირებულ პროფესორებს: ზაზა შაშიკაძეს, მაია ბარამიძეს, ჯემალ კარალიძეს, საქართველოს ისტორიის, ფილოლოგიის, არქეოლოგიის და ეთნოლოგიის დარგში გამოცემული საუკეთესო მონოგრაფიისათვის „კლარჯეთი“ მიენიჭათ ივანე ჯავახიშვილის სახელობის აკადემიური პრემია.

ბათუმის შოთა რუსთაველის სახელმწიფო უნივერსიტეტისა და პუატიეს (საფრანგეთი) უნივერსიტეტების თანამშრომლობის ფარგლებში ბსუ-ს პროფესორ-მასწავლებლებმა და სხვადასხვა ფაკულტეტის ფრანგულენოვანმა 23-მა სტუდენტმა ფრანგული ფილოლოგიის მიმართულების ორგანიზებით, მონაწილეობა მიიღეს ΙV ევროპულ კამპუსში. ტრენინგები და ლექციათა კურსი მიმდინარეობდა 2018 წლის 18 ივნისიდან 30 ივნისამდე და მოიცავდა ორ ძირითად მიმართულებას. პროფესორ-მასწავლებლები გაეცნენ ისეთ აქტუალურ საკითხებს, როგორიცაა: ინოვაციური მეთოდოლოგიების განსაზღვრა, უახლესი გამოცემის ფრანგული სახელმძღვანელოების განხილვა და დისტანციური/ონლაინ მეთოდების დანერგვა ფრანგული ენის სწავლა-სწავლების პროცესში, სწავლების თანამედროვე ტენდეციები და შეფასების პრობლემები.

ბათუმის შოთა რუსთაველის სახელმწიფო უნივერსიტეტის აკადემიური საბჭოს გადაწყვეტილებით პროფესორ თინა შიოშვილს უმაღლესი საგანმანათლებლო დაწესებულების განვითარებაში შეტანილი წვლილისა და ხანგრძლივი ნაყოფიერი სამეცნიერო-პედაგოგიური მოღვაწეობისათვის ბსუ-ს საპატიო ჯილდო მიენიჭა. აკადემიური საბჭოს სხდომაზე უნივერსიტეტის რექტორმა მერაბ ხალვაშმა ღვაწლმოსილ პროფესორს საიუბილეო თარიღი მიულოცა და შოთა რუსთაველის სახელობის მედლით დააჯილდოვა.

ბათუმის შოთა რუსთაველის სახელმწიფო უნივერსიტეტში ილიას სახელმწიფო უნივერსიტეტის პროფესორ ცირა ბარბაქაძის პირველი ტვიტერატურული კრებულის - „ყველაფერი (თ)ამაშია“ წარდგენა გაიმართა. წიგნში თანამდროვე პოსტმოდერნის - თამაშის ენაზე შესრულებული პოეტის ენობრივი თამაშებია მოცემული. ღონისძიების ფარგლებში წიგნის ავტორმა საჯარო ლექცია წაიკითხა თემაზე: „რა არის ტვიტერატურა?“ და სტუდენტების შეკითხვებს უპასუხა. ლექციის დასრულების შემდეგ, ახალგაზრდებმა საკუთარი ლექსები წაიკითხეს.