ფრანკფურტის გოეთეს სახელობის უნივერსიტეტის კავკასიოლოგიის კათედრის გამგეს, პროფესორ მანანა თანდაშვილს ბათუმის შოთა რუსთაველის სახელმწიფო უნივერსიტეტის აკადემიურმა საბჭომ საპატიო დოქტორის წოდება მიანიჭა. პროფესორმა მანანა თანდაშვილმა მნიშვნელოვანი წვლილი შეიტანა ბსუ-ს განვითარებაში, მისი ხელშეწყობით უნივერსიტეტში 2012 წელს დაარსდა საზაფხულო სკოლა ციფრულ ჰუმანიტარიაში, 2015 წელს ამავე მიმართულებაში შეიქმნა დამატებითი საგანმანათლებლო პროგრამა, ხოლო 2016 წელს გაიხსნა ციფრული ჰუმანიტარიის ცენტრი. ცნობილი ენათმეცნიერის ხელმძღვანელობით უნივერსიტეტში ხორციელდება შოთა რუსთაველის ეროვნული სამეცნიერო ფონდის მიერ დაფინანსებული საგრანტო პროექტი „ლინგვოკულტუროლოგიური დიგიტალური არქივი“, რომელიც მიზნად ისახავს უმაღლესი საგანმანათლებლო დაწესებულების ლინგვოკულტუროლოგიური დიგიტალური არქივის დაფუძნებას, ტექნოლოგიური და მეთოდოლოგიური ჩარჩოს შექმნას. პროექტის ფარგლებში შეიქმნა DigiArchive-ს ორენოვანი ვებგვერდი.

24 აგვისტოდან 2 სექტემბრის ჩათვლით ბათუმის შოთა რუსთაველის სახელმწიფო უნივერსიტეტი მასპინძლობდა VII საერთაშორისო საზაფხულო სკოლას დიგიტალურ ჰუმანიტარიაში. ღონისძიების ფარგლებში ჩატარდა ლექციები, სემინარები და ვორკშოფები დიგიტალურ ჰუმანიტარიაში, კორპუსლინგვისტიკასა და დოკულინგვისტიკაში (ენისა და კულტურის ელექტრონულ დოკუმენტირებაში). სწავლების თეორიული ნაწილი მოიცავდა კორპუსების მორფოსინტაქსური და ჟანრული ანოტაციის საკითხებს, ენის ნაციონალური კორპუსების დიზაინსა და აგების პრინციპებს, ვორკშოფები კი მიეძღვნა ციფრული ჰუმანიტარიის პროგრამული ინსტრუმენტებისა და სტანდარტების - ELAN, FLEX, XML TEI ათვისებას.

შოთა რუსთაველის სამეცნიერო ფონდის საგრანტო პროექტის „ისტორიული ჭანეთის ცენტრალურ ნაწილში დაცული ქართული კულტურული მემკვიდრეობის ძეგლები (საფორტიფიკაციო ნაგებობები, ეკლესიები, საკომუნიკაციო და საყოფაცხოვრებო არქიტექტურის ნიმუშები)“ ფარგლებში, დასრულდა მეორე კომპლექსური სამეცნიერო ექსპედიცია ისტორიული ჭანეთის ტერიტორიაზე. ექსპედიცია მიზნად ისახავდა გიუმუშხანესა და მისი შემოგარენის კვლევას. ერთი კვირის განმავლობაში ექსპედიციის წევრები: პროფესორი შოთა მამულაძე (პროექტის ხელმძღვანელი), ასოცირებული პროფესორი ემზარ კახიძე, ასოცირებული პროფესორი თამაზ ფუტკარაძე, ასოცირებული პროფესორი ელგუჯა მაკარაძე, ასოცირებული პროფესორი ლილე თანდილავა, ფილოლოგიის დოქტორი ომარ მემიშიში, ისტორიის დოქტორი კახაბერ ქამადაძე, დოქტორანტი სულხან მამულაძე მუშაობდნენ საკვლევ რეგიონში.

საქართველოს მეცნიერებათა ეროვნული აკადემიის ვიცე-პრეზიდენტმა, აკადემიკოსმა როინ მეტრეველმა ბსუ-ს ჰუმანიტარულ მეცნიერებათა ფაკულტეტის პროფესორებს საქართველოს ისტორიის, ფილოლოგიის, არქეოლოგიის და ეთნოლოგიის დარგში გამოცემული საუკეთესო მონოგრაფიისათვის „კლარჯეთი“ მინიჭებული ივანე ჯავახიშვილის სახელობის აკადემიური პრემია გადასცა. მამია ფაღავამ (პროექტის სამეცნიერო ხელმძღვანელი და რედაქტორი), მალხაზ ჩოხარაძემ (პროექტის კოორდინატორი), †ემერიტუს-პროფესორმა მერი ცინცაძემ, თინა შიოშვილმა, შოთა მამულაძემ, რამაზ ხალვაშმა, ნუგზარ მგელაძემ; ასოცირებულმა პროფესორებმა: ზაზა შაშიკაძემ, მაია ბარამიძემ, ჯემალ კარალიძემ მონოგრაფია შოთა რუსთაველის ეროვნული სამეცნიერო ფონდის სამეცნიერო პროექტის „კლარჯეთი“ ფარგლებში გამოსცა. წიგნში კომპლექსურადაა შესწავლილი თურქეთის რესპუბლიკის შემადგენლობაში მოქცეული ისტორიული ქართული კუთხე კლარჯეთი. მონოგრაფია ორი ნაწილისაგან შედგება, დართული აქვს ლექსიკონი, რუკები და ფოტომასალა.

VII საერთაშორისო საზაფხულო სკოლა „დიგიტალური ჰუმანიტარია, ქართველოლოგია, კორპუსლინგვისტიკა, დოკულინგვისტიკა“ გაიხსნა ბათუმის შოთა რუსთაველის სახელმწიფო უნივერსიტეტში. სწავლების მიზანია დიგიტალური ჰუმანიტარიის განვითარება საქართველოში, ენისა და კულტურის ელექტრონული დოკუმენტაციის ძირითადი პრინციპებისა და მეთოდების შესწავლა, ქართული და საერთაშორისო ელექტრონული რესურსების გაცნობა, საველე სამუშაოების ჩატარების უნარ-ჩვევების გამომუშავება. საქართველოს, რუმინეთის, თურქეთის, ირანის სხვადასხვა უნივერსიტეტის ბაკალავრიატის, მაგისტრატურისა და დოქტორანტურის სტუდენტები ინტერდისციპლინური პროგრამის ფარგლებში გაეცნობიან დიგიტალური ჰუმანიტარიის მულტიდისციპლინურ მეთოდებს, ინსტრუმენტებსა და სტანდარტებს, დიგიტალური ქართველოლოგიის მიღწევებსა და განვითარების პერსპექტივებს.