ბათუმის შოთა რუსთაველის სახელმწიფო უნივერსიტეტის ისტორიის, არქეოლოგიისა და ეთნოლოგიის დეპარტამენტის აკადემიური პერსონალმა რეგიონის საჯარო და კერძო სკოლებთან თანამშრომლობის ფარგლებში, 7-9 თებერვალს მოსწავლეებისათვის საჯარო ლექციები წაიკითხეს. ისტორიის, არქეოლოგიისა და ეთნოლოგიის დეპარტამენტის თამჯდომარემ, ასოცირებულმა პროფესორი ჯემალ კარალიძე ქობულეთის ილია ჭავჭავაძის სახელობის №2 საჯარო სკოლაში მოხსენებით წარსდგა თემაზე: „ილია ჭავჭავაძე და აჭარა“. პროფესორმა ოთარ გოგოლიშვილმა ხელვაჩაურის რაიონის სოფელ ხელვაჩაურის №1 საჯარო სკოლაში ლექცია წაიკითხა თემაზე: „ბათუმის ისტორიიდან“, პროფესორმა კახაბერ სურგულაძემ ბათუმის №10 საჯარო სკოლაში მოხსენება - „მონობა ანტიკურ რომში“ და ასოცირებულმა პროფესორი მარინე ჯინჭარაძემ ბათუმის №22 საჯარო სკოლაში მოხსენება - „რენესანსის ეპოქის კულტურა“.

შინაგან საქმეთა სამინისტროს აკადემიამ, განათლებისა და მეცნიერების სამინისტროსთან ერთად, რეგიონებში პროექტის - „შეისწავლე ისტორია - გახდი მკვლევარი“ პრეზენტაცია გამართა.

ღონისძიებას შსს-ს აკადემიის რექტორი გივი მიქანაძე, შსს-ს არქივის დირექტორი ომარ თუშურაშვილი, განათლებისა და მეცნიერების მინისტრის მოადგილე ლია გიგაური, ბათუმის, თელავის, გორის, ზუგდიდისა და ქუთაისის უმაღლესი სასწავლებლების რექტორები, ისტორიის ფაკულტეტების სტუდენტები, საჯარო სკოლების ისტორიის პედაგოგები და მოსწავლეები დაესწრნენ.

ბათუმის შოთა რუსთაველის სახელმწიფო უნივერსიტეტის ფილოსოფიის დეპარტამენტის ორგანიზებით ჩატარდა ფილოსოფიური სემინარი თემაზე - „ჰერაკლიტე ეფესელი და ფრიდრიხ ნიცშე“. სემინარს უძღვებოდა გრიგოლ რობაქიძის სახელობის უნივერსიტეტისა და ახალი საქართველოს უნივერსიტეტის პროფესორი თენგიზ ირემაძე. პროფ. თ. ირემაძემ წარადგინა მოხსენება, რომელიც ეხებოდა დიდი ბერძენი ფილოსოფოსის, ჰერაკლიტე ეფესელის ინტერპრეტაციის თავისებურებებს ფრიდრიხ ნიცშეს ადრეულ და გვიანდელ ნაშრომებში, განსაკუთრებით კი ნიცშეს მთავარ ფილოსოფიურ ნაშრომზე - „ესე იტყოდა ზარატუსტრა“, რომლის ძირითადი იდეები (მარადიული დაბრუნებისა და ზეკაცის იდეა, ძალაუფლების ნება და ა.შ.) ჰერაკლიტეს შემორჩენილი ფილოსოფიური ფრაგმენტების კვალსაც ატარებს.

ბათუმის შოთა რუსთაველის სახელმწიფო უნივერსიტეტის სტიპენდიების კონკურსი დასრულდა. შოთა რუსთველის სახელობის საუნივერსიტეტო სტიპენდია ჰუმანიტარულ მეცნიერებათა ფაკულტეტის ისტორიის სამაგისტრო პროგრამის მეორე კურსის სტუდენტმა თამაზ დავითაძემ მოიპოვა. პროფესორ როლანდი კომახიძის სახელობითი სტიპენდია მიენიჭა ანა ბაგრატიონს (ისტორია, ბაკალავრიატი, მესამე კურსი), პროფესორ აბელ სურგულაძის სახელობითი სტიპენდია თათული მოწყობილს (ისტორია, ბაკალავრიატი, მესამე კურსი), ხოლო სელიმ ხიმშიაშვილის სახელობითი სტიპენდია - ლალი ტუნაძეს (ევროპეისტიკა, მაგისტრატურა, მეორე კურსი).

ჰუმანიტარულ მეცნიერებათა ფაკულტეტის ისტორიის სპეციალობის სტუდენტების მონაწილეობით ბათუმის შოთა რუსთველის სახელმწიფო უნივერსიტეტში ღონისძიება გაიმართა 1815 წლის 18 ივნისს გამართულ ვატერლოოს ბრძოლასა და მის ალტერნატიულ ისტორიაზე. პროექტი მიზნად ისახავდა ისტორიის სპეციალობის სტუდენტების ცოდნის გაღრმავებას კონკრეტულ ისტორიულ მოვლენაზე, აღნიშნული მოვლენის გააზრებას განსხვავებულ ისტორიულ ჭრილში და მის გამოვლენას ფართო აუდიტორიის წინაშე. კომპეტენტურმა ჟიურიმ რიგით მესამე ღონისძიების მონაწილე გუნდებიდან - „ლინი“ და „კორსიკა“ - გამარჯვებული გამოავლინა და უპირატესობა „ლინის“ მიანიჭა. პროექტში მონაწილე გუნდები დასაჩუქრდა სამახსოვრო საჩუქრებითა და სიგელებით.