ბათუმის შოთა რუსთაველის სახელმწიფო უნივერსიტეტის განათლების ფაკულტეტის დაწყებითი განათლების სპეციალობის პირველი კურსის სტუდენტებმა ასისტენტ პროფესორ დარეჯან გელაძესთან ერთად, მცირე საოჯახო ტიპის სახლში მცხოვრები, სახელმწიფო მზრუნველობაში მყოფი ბავშვები მოინახულეს. ახალგაზრდებმა პატარებს დამდეგი შობა-ახალი წელი მიულოცეს, ამანათები გადასცეს და გადაიღეს სამახსოვრო ფოტოები.

ბათუმის შოთა რუსთაველის სახელმწიფო უნივერსიტეტი ერასმუს პლუსის ინსტიტუციური განვითარების პროექტის „აკადემიური კეთილსინდისიერება ხარისხიანი სწავლისა და სწავლებისთვის ქართულ უმაღლეს საგანმანათლებლო დაწესებულებებში (INTEGRITY)“ ერთ-ერთი პარტნიორია. პროექტს ილიას სახელმწიფო უნივერსიტეტი, ოთხ ევროპულ სასწავლებელთან – როეჰემპტონის (University of Reohampton, ინგლისი), უფსალას (University of Uppsala, შვედეთი), ვენისა (University of Vienna, ავსტრია) და დუბლინის (Dublin City University, ირლანდია) უნივერსიტეტებთან, თორმეტ ქართულ სასწავლებელთან, საქართველოს განათლებისა და მეცნიერების სამინისტროსა და განათლების ხარისხის განვითარების ეროვნულ ცენტრთან თანამშრომლობით ახორციელებს სტრუქტურული ღონისძიების ეროვნულ პროექტს ”Academic Integrity for Quality Teaching and Learning in Higher Education Institutions in Georgia (INTEGRITY)”. პროექტის კონსორციუმში შემავალი 12 ქართული უნივერსიტეტის წარმომადგენელთა მონაწილეობით, 2017 წლის 15 დეკემბერს ილიას სახელმწიფო უნივერსიტეტში პირველი შეხვედრა გაიმართა.

ბათუმის შოთა რუსთაველის სახელმწიფო უნივერსიტეტის განათლების ფაკულტეტის განათლების ადმინისტრირების სამაგისტრო საგანმანათლებლო პროგრამის მეორე სასწავლო წლის სტუდენტებმა მელანო ვარშანიძემ და თეონა ხომერიკმა სილოვან დადუნაშვილისა და გულო-აღა კაიკაციშვილის სახელობის სახელობითი სტიპენდიები მოიპოვეს. ფაკულტეტი ულოცავს სტიპენდიანტებს გამარჯვებას და წარმატებებს უსურვებს!

2017 წლის 3-4 ნოემბერს ბათუმის შოთა რუსთაველის სახელმწიფო უნივერსიტეტში „ერაზმუს+“-ის საგრანტო პროექტის „კურიკულუმის რეფორმა სამოქალაქო განათლებისა და დემოკრატიული პრინციპების განვითარების ხელშეწყობისათვის ისრაელსა და საქართველოში (CURE)“ კონსორციუმის IV ეროვნული შეხვედრა გაიმართა, რომელსაც პროექტის პარტნიორი ქართული უნივერსიტეტების - ილიას სახელმწიფო უნივერსიტეტის, ივანე ჯავახიშვილის სახელობის თბილისის სახელმწიფო უნივერსიტეტის, სამცხე-ჯავახეთის სახელმწიფო უნივერსიტეტისა და შპს ქუთაისის უნივერსიტეტის წარმომადგენლები ესწრებოდნენ. ბსუ-დან შეხვერაში მონაწილეობა მიიღეს ნანა მაკარაძემ, მადონა მიქელაძემ და ნინო მიქელაძემ. შეხვედრის მიზანი იყო პროექტის ამოქმედებიდან დღემდე განხორციელებული აქტივობებისა და მიღებული შედეგების შეჯამება და მომდევნო ეტაპზე განსახორციელებელი სამუშაოების დაგეგმვა. შეხვედრას ესწრებოდა პროექტის ფინანსური მენეჯერიც, რომელმაც შეაჯამა პროექტის ბიუჯეტის პირველის წლის ხარჯვითი ნაწილი და თითოეულ პარტნიორ უნივერსიტეტს რეკომენდაციები მისცა მომდევნო წლის ბიუჯეტის განკარგვასთან დაკავშირებით.

ბათუმის შოთა რუსთაველის სახელმწიფო უნივერსიტეტის ასოცირებულმა პროფესორმა მადონა მიქელაძემ, ასისტენტ პროფესორებმა ნატო შეროზიამ და მამუკა გოგელიამ 16-27 ოქტომბერს მონაწილეობა მიიღეს ვორქშოფში „პროფესიული განათლების სამაგისტრო საგანმანათლებლო პროგრამების განვითარება“. მაგდებურგის უნივერსიტეტის პროფესორმა ფრანკ ბიუნინგმა საქართველოს უმაღლესი საგანმანათლებლო დაწესებულებების (ბსუ, თსუ, სტუ და აწსუ) პროფესორ-მასწავლებლებს რეკომენდაციები გაუწია პროგრამის მომზადებისა და ქართულ საგანმანათლებლო სივრცეში დანერგვის საკითხებზე. პროფესორმა ფრანკ ბიუნინგმა ტრენინგები ჩაატარა ასევე პროფესიულ პედაგოგიკაში და ვორქშოფის მონაწილეებს პროფესიული საგანმანათლებლო პროგრამების სწავლების მეთოდები გააცნო. მხარეთა შეთანხმებით, მაგდებურგის უნივერსიტეტის წარმომადგენლები დახმარებას გაუწევენ ქართველ კოლეგებს პროფესიული განათლების სამაგისტრო საგანმანათლებლო პროგრამების მომზადება-განხორცილებაში.