ბსუ-ს ქიმიის დეპარტამენტმა და დასავლეთ საქართველოს რეგიონალურმა ცენტრმა უმასპინძლეს ჩოხატაურის ყოვლადწმინდა ღვთისმშობლის სახელობის სამრევლო სკოლის მეათე კლასის მოსწავლეებსა და პედაგოგებს. მოსწავლეებმა დასავლეთ საქართველოს რეგიონალურ ცენტრში დაათვალიერეს თანამედროვე ხელსაწყოები და ქიმიური აპარატურა. ცენტრის ხელმძღვანელი, პროფესორი ალეკო კალანდია ესაუბრა მოსწავლეებს ცენტრში ჩატარებული კვლევებისა და ქიმიის აქტუალური საკითხების შესახებ.

შავი ზღვის დაცვის საერთაშორისო დღე ბათუმის შოთა რუსთაველის სახელმწიფო უნივერსიტეტში რამდენიმე ღონისძიებით აღინიშნა. პროექტ „ემბლასის“ წარმომადგენელმა, ბიოლოგიის მეცნიერებათა დოქტორმა რამაზ მეგრელაძემ ლექცია წაიკითხა თემაზე: „შავი ზღვის ეკოლოგიური გარემო, არსებული გამოწვევები და მათი გადაჭრის გზები“. ასევე გაიმართა ფლეშმობის კონკურსი „შავი ზღვის ხმა“, რომელშიც საჯარო და კერძო სკოლის მოსწავლეებთან ერთად, მონაწილეობა მიიღეს ბათუმის N20 საჯარო სკოლის უკრაინული სექტორის მოსწავლეებმაც. ჟიურის გაასდწყვეტილებით, I ადგილი კერძო სკოლას „ევრო 2000“ ერგო, II ადგილი - კერძო სკოლას „გორდა“, ხოლო III ადგილი - ფოთის N4 საშუალო სკოლას. ბსუ-ს ბიოლოგიისა და ეკოლოგიის საგანმანათლებლო პროგრამების სტუდენტებისათვის სასტუმრო „პარაგრაფში“ ბიოლოგიის დოქტორმა ანდრეი ტრეგუბოვმა ლექცია წაიკითხა ზღვის ბიომრავალფეროვნების აქტუალურ საკითხებზე.

20-21 ოქტომბერს საბუნებისმეტყველო მეცნიერებათა და ჯანდაცვის ფაკულტეტის დეკანმა რუსუდან ხუხუნაიშვილმა და ბიოლოგიის დეპარტამენტის წევრებმა მონაწილეობა მიიღეს „ბულვარის ფესტივალში“. ფესტივალი პირველად გაიმართა და მოიცავდა სხვადასხვა კულტურულ, შემეცნებით და გასართობ ღონისძიებებს. „ბულვარის ფესტივალი“ გაიხსნა პირველი საერთაშორისო სამეცნიერო კონფერენციით თემაზე: „რეკრეაციული პარკების მართვისა და განვითარების შესაძლებლობები“. სესიაზე ქართველმა და უცხოელმა დარგის სპეციალისტებმა წარადგინეს საინტერესო მოხსნებები ურბანული პარკების, გამწვანებისა და ლანდშაფტის დიზაინის, გარემოს დაცვისა და ეკოლოგიის მიმართულებით. კონფერენციაზე მოხსენება „ბულვარის ეკოლოგიური ფუნქციები“ წაიკითხა ბსუ-ს ასოცირებულმა პროფესორმა გუგული დუმბაძემ. მან ასევე, 21 ოქტომბერს, ბულვარში ჩაატარა „მწვანე გაკვეთილი“ პატარებისთვის, რომლის დასრულების შემდეგ, მათი მონაწილეობით დაირგო ფიჭვის ნერგები.

ბათუმის შოთა რუსთველის სახელმწიფო უნივერსიტეტში ძუძუს კიბოს ცნობიერების ამაღლების კამპანიის „ვარდისფერი ოქტომბრის“ ფარგლებში, კონფერენიაცია გაიმართა თემაზე: „დაავადების ადრეული გამოვლენის მნიშვნელობა და სახელმწიფო სკრინინგ პროგრამები”. ბსუ-ს სტუდენტებს, პროფესორ-მასწავლებლებს, ოჯახის ექიმებსა და საზოგადოების წარმომადგენლებს აჭარის ა.რ. ჯანმრთელობისა და სოციალური დაცვის მინისტრმა ნინო ნიჟარაძემ კამპანიის „ვარდისფერი ოქტომბერი“ მნიშვნელობა, აჭარაში სკრინინგის ხელმისაწვდომობა და ადგილობრივი ონკო პროგრამები გააცნო. მსმენელებს მამოლოგი, ქირურგი მალხაზ დიასამიძე სარძევე ჯირკვლის დაავადებების გამომწვევ მიზეზებზე, რისკ ფაქტორებსა და ადრეული დიაგნოსტიკის მნიშვნელობაზე ესაუბრა.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის ქიმიის დეპარტამენტსა და დასავლეთ საქართველოს რეგიონალურ ქრომატოგრაფიულ ცენტრს ბათუმის მომავლის სკოლისა და სკოლა-ლიცეუმ მასტერკლასის VIII, IX, X კლასის მოსწავლეები და პედაგოგები ეწვივნენ. სტუმრებმა დაათვალიერეს ქრომატოგრაფიული ცენტრი და ქიმიური ლაბორატორიები. პროფესორი ალეკო კალანდია მოსწავლეებს ესაუბრა ქიმიის აქტუალურ საკითხებზე, ქიმიის სპეციალობის სტუდენტებმა კი ქიმიის დეპარტამენტის სპეციალისტის, თამარ გოგიტიძის ხელმძღვანელობით, ახალგაზრდებს აჩვენეს სახალისო ქიმიური ექსპერიმენტები.