ბათუმის შოთა რუსთაველის სახელმწიფო უნივერსიტეტის ღია კარის დღე გიმართა ბათუმის N2 საჯარო სკოლაში. საინფორმაციო შეხვედრაზე ბსუ-ს საბუნებისმეტყველო მეცნიერებათა და ჯანდაცვის ფაკულტეტის დეკანმა, პროფესორმა რუსუდან ხუხუნაიშვილმა მეთორმეტე კლასის მოსწავლეებს უნივერსიტეტის საგანმანათლებლო პროგრამები, საუნივერსიტეტო ცხოვრება, სოციალური პროგრამები, სტიპენდიები და გაცვლითი პროგრამები გააცნო. ღონისძიებაში მონაწილეობა მიიღო ავსტრალიის ჩარლზ დარვინის უნივერსიტეტის პროფესორმა ფილისითი მაკლუერმა, რომელიც აბიტურიენტებს ავსტრალიაში სწავლის შესაძლებლობებსა და პირობებზე ესაუბრა და მათ შეკითხვებს უპასუხა. შეხვედრის დასასრულს, მეთორმეტე კლასის მოსწავლეებს სამახსოვრო საჩუქრები გადაეცათ.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის გეოგრაფიის სამაგისტრო პროგრამის სტუდენტი ქართლოს მანველიძე, ბიოლოგიის სამაგისტრო პროგრამის სტუდენტები სოფიო აბულაძე და ამირან მექვაბიშვილი დაჯილდოვდნენ 1500-ლარიანი „მწვანე სტიპენდიით“. სტუდენტებს სიგელები გადასცა გაეროს განვითარების პროგრამის მუდმივმა წარმომადგენელმა საქართველოში (UNDP), ნიკ ბერესფორდმა და ბსუ-ს წარმომადგენელმა ასისტენტ პროფესორმა ხათუნა ჭიჭილეიშვილმა. „მწვანე სტიპენდიების” პროგრამა ხელი შეუწყობს გარემოსდაცვითი დეფიციტური პროფესიების პოპულარიზაციასა და წარჩინებული სტუდენტების წახალისებას.

ახალგაზრდა ნატურალისტთა საზოგადოების ინიციატივით ბათუმის შოთა რუსთაველის სახელმწიფო უნივერსიტეტის თავისუფალ სივრცეში ვორქშოფი ჩატარდა თემაზე: „ბიოფილოსოფია, რა არის სიცოცხლე?” ვორქშოპს ესწრებოდა საბუნებისმეტყველო მეცნიერებათა და ჯანდაცვის ფაკულტეტის დეკანი, პროფესორი რუსუდან ხუხუნაიშვილი, პროფესორ-მასწავლებლები, სტუდენტები და სკოლის მოსწავლეები. ვორქშოფს უძღვებოდნენ ასოცირებული პროფესორები ჟანა ჭითანავა და გიორგი მასალკინი. ღონისძიება კითხვა-პასუხის რეჟიმში წარიმართა.

ბათუმის შოთა რუსთაველის სახელმწიფო უნივერსიტეტში ჩატარდა ლექცია-მასტერკლასი თემაზე: „კბილის გათეთრების თანამედროვე კონცეფციები", რომელშიც მონაწილეობა მიიღეს ბსუ-ს სტომატოლოგიის დეპარტამენტის პროფესორ-მასწავლებლებმა, პრაქტიკოსმა ექიმ-სტომატოლოგებმა და სტომატოლოგიის საგანმანათლებლო პროგრამების სტუდენტებმა. ლექცია-მასტერკლასის სპიკერიიყო ექიმი სტომატოლოგი, Whiter imege-ის ოფიციალური ტრენერი, Dental Products-ის დამფუძნებელი თამარ ცუცხაშვილი. ღონისძიება ბათუმის შოთა რუსთაველის სახელმწიფო უნივერსიტეტის ორგანიზებითა და Dental Products-ის მხარდაჭერით ჩატარდა.

ბსუ-ში საქართველოს ზოგადი და გამოყენებითი მიკრობიოლოგიის ასოციაციის, რუსთაველის ეროვნული სამეცნიერო ფონდის და ამერიკის მიკრობიოლოგთა ასოციაციის მხარდაჭერით ჩატარდა კონფერენცია „მიკრობული სამყარო და ადამიანი“. კონფერენციის მიზანი იყო სკოლის მოსწავლეების (VIII-XI კლასი) დაინტერესება მიკრობიოლოგიის მეცნიერების მიღწევებით და ამ მიმართულებით მათი ცოდნის გაღრმავება. თემატიკა მოიცავდა მიკრობიოლოგიის დარგის აქტუალურ საკითხებს: „მიკრობული და მოლეკულური არქეოლოგია”, „ანტიბიოტიკები; ანტიბიოტიკების რაციონალური გამოყენება”, „ადამიანის ურთიერთობა გარემოსთან და ბიოუსაფრთხოება”, „მცენარეთა კარანტინი - სურსათის უსაფრთხოების გარანტი” და „მიკროორგანიზმები - ზღვის უხილავი სამყარო”.