ბათუმის შოთა რუსთაველის სახელმწიფო უნივერსიტეტში, ახალგაზრდა ნატურალისტთა საზოგადოების ინიციატივით, ჩატარდა ვორქშოფი: რეპტილიები და მათი იდენტიფიცირება, ოფიდიოფობია და მითები. ვორქშოფს ესწრებოდნენ მოწვეული სტუმრები: პროსფესორები, მასწავლებლები, სტუდენტები და ბათუმის შპს ფრანგული სკოლის, წმინდა ანდრია პირველწოდებულის სახელობის სკოლის მოსწავლეები. პრეზენტაციის შემდეგ კითხვა-პასუხი გაიმართა და მონაწილეებს მიეცათ საშუალება დაეძლიათ შიშები და უფრო ახლოს გაცნობოდნენ ქვეწარმავლებს.
ბსუ-ში საბუნებისმეტყველო მეცნიერებათა მიმართულების პოპულარიზაციის მიზნით, ქიმიის დეპარტამენტს ეწვივნენ შპს ელიტარული სკოლა „გორდას“ მოსწავლეები და მასწავლებლები. სტუმრებმა დაათვალიერეს ქიმიის დეპარტამენტის სასწავლო და კვლევითი ლაბორატორიები, დასავლეთ საქართველოს რეგიონალური ქრომატოგრაფიული ცენტრი. მოსწავლეები შეხვდნენ ქიმიის დეპარტამენტის აკადემიურ პერსონალს. პროფესორი ალეკო კალანდია ესაუბრა მათ ეკოლოგიური პრობლემებიდან გამომდინარე ქიმიური კვლევების აუცილებლობაზე. დეპარტამენტის ხელმძღვანელი, ასოცირებული პროფესორი მაია ვანიძე მოსწავლეებს ესაუბრა STEM -ის მნიშვნელობაზე სწავლების პროცესში.
საბუნებისმეტყველო მეცნიერებათა და ჯანდაცვის ფაკულტეტის საბჭო 2022 წლის 01 ნოემბერს აცხადებს ფაკულტეტის დეკანის არჩევნებს.კანდიდატთა რეგისტრაცია იწარმოებს 2022 წლის 01 დეკემბრიდან 07 დეკემბრის ჩათვლით, 11:00-დან 16:00 საათამდე, ბსუ-ს საარჩევნო კომისიაში (მისამართი: ქ. ბათუმი, ნინოშვილის/რუსთაველის 35/32, ოთახი №13).
