„ჩემი ჯანმრთელობა - ჩემი უფლებაა“ ამ სლოგანით შიდსთან ბრძოლის საერთაშორისო დღე ბათუმის შოთა რუსთაველის სახელმწიფო უნივერსიტეტში C ჰეპატიტისა და აივ ინფექციის სკრინინგ აქციით აღინიშნება. დღის განმავლობაში სტუდენტებსა და პროფესორ-მასწავლებლებს უფასოდ უტარდებათ დაავადებების სკრინინგი. აქციას საბუნებისმეტყველო მეცნიერებათა და ჯანდაცვის ფაკულტეტი აჭარის ა.რ. საზოგადოებრივი ჯანდაცვის ცენტრის, დაავადებათა კონტროლისა და საზოგადოებრივი ჯანმრთელობის ეროვნული ცენტრის აჭარის სამმართველოს მხარდაჭერით ატარებს.

საბუნებისმეტყველო მეცნიერებათა და ჯანდაცვის ფაკულტეტის დეკანი, პროფესორი მარინა ქორიძე, პროფესიული პროგრამების მართვის სამსახურის უფროსი მამუკა გოგელია, პროფესორ-მასწავლებლები ეთერ ჯაყელი და მზია ბაკურიძე ფარმაცევტის თანაშემწის და პრაქტიკოსი ექთნის მოდულური პროფესიული საგანმანათლებლო პროგრამების სტუდენტებს შეხვდნენ. და წარმატებების უსურვეს. გაცნობითი ხასიათის შეხვედრაზე სტუდენტები უნივერსიტეტის პროფესიული პროგრამების განხორციელების წესს, პროფესიული პროგრამების სტრუქტურას, რეგულაციებსა და ლექცია-პრაქტიკული მუშაობების ჩატარების პრინციპებს გაეცნენ.

კონკურსის „ეფექტიანი ცვლილებების სესიები“ დასკვნით ეტაპზე ოთხი წარდგენილი სტუდენტური პროექტიდან ორი გამარჯვებული გუნდი გამოვლინდა, რომელსაც ფინანსურ მხარდაჭერას კავკასიის გარემოსდაცვითი არასამთავრობო ორგანიზაციების ქსელი (CENN) გაუწევს. კონკურსი (WMTR II) პროგრამის ეგიდით ჩატარდა, რომელიც ორ ეტაპს მოიცავდა, პირველი ეტაპის ფარგლებში ღონისძიება უკვე ჩატარდა 9-10 ნოემბერს, რომლის ფარგლებშიც სტუდენტებს ჩაუტარდათ სემინარები და ტრენინგები ნარჩენების მართვის თემაზე. სემინარების შემდეგ, სტუდენტებმა სამუშაო ჯგუფებში მენტორების დახმარებით შეიმუშავეს კონკრეტული პროექტები ნარჩენების მართვის საკითხებზე.

მსოფლიო დიაბეტის დღე საბუნებისმეტყველო მეცნიერებათა და ჯანდაცვის ფაკულტეტის საზოგადოებრივი ჯანდაცვისა და მტკიცებითი მედიცინის დეპარტამენტის ინიციატივით დევიზით - „ერთად დავამარცხოთ დიაბეტი!“ - რამდენიმე ღონისძიებით აღინიშნა. მედიცინის საგანმანათლებლო პროგრამის IV კურსის სტუდენტებმა საჯარო გამოკითხვა ჩაატარეს თემაზე: „რა ვიცით შაქრიანი დიაბეტის შესახებ?“. ბსუ–ს სასწავლო ცენტრის ბაზაზე, კორპორაცია „ევექსის“ ორგანიზებით,მსურველებს ჩაუტარდათ გლუკოზის (შაქრის) დონის განსაზღვრა სისხლში. ასევე, ჯანმრთელობის დაცვის სახელმწიფო პროგრამების დაავადებათა ადრეული გამოვლენისა და სკრინინგის პროგრამის ფარგლებში უნივერსიტეტში მოეწყო კიბოს სკრინინგისა და ქალთა ჯანმრთელობის ხელშეწყობის აქცია.

სამეცნიერო კონფერენცია „გულ-სისხლძარღვთა დაავადებათა ტენდენციები საქართველოში (აჭარის რეგიონის 20-წლიანი კვლევის შედეგები)“ გაიმართა ბათუმის შოთა რუსთაველის სახელმწიფო უნივერსიტეტში. თსუ-სა და ბსუ-ს ერთობლივ სამეცნიერო სესიაზე მონაწილეებმა აჭარაში წარმოებული კვლევის შედეგები შეაჯამეს და ისეთი მნიშვნელოვანი მოხსენებები წარმოადგინეს გულ-სისხლძარღვთა დაავადებებზე, როგორიცაა: გულ-სისხლძარღვთა სისტემის დაავადებები აჭარის ავტონომიური რესპუბლიკის პოპულაციაში, რისკ-ფაქტორთა რეგიონული ტენდენციები, არაგადამდებ დაავადებებით ავადობა და სიკვდილიანობა აჭარის ავტონომიური რესპუბლიკის მოსახლეობაში, ცერებრო-ვასკულური პათოლოგიის კლინიკურ-ეპიდემიოლოგიური პროფილი აჭარის რეგიონში.