,,სამედიცინო კორპორაცია ევექსი“-ს სასწავლო ცენტრის დირექტორი გიორგი ბერია საბუნებისმეტყველო მეცნიერებათა და ჯანდაცვის ფაკულტეტის სამედიცინო მიმართულების სტუდენტებს შეხვდა და ექთნების გადამზადების პროგრამა წარუდგინა. პროექტი ითვალისწინებს საქართველოს მასშტაბით ექთნების კვალიფიკაციის ასამაღლებლად თეორიულ და პრაქტიკულ სწავლებას. პროგრამაში მონაწილეობის მიღება შეუძლიათ მედიცინის სპეციალობის სტუდენტებს. კონკურსანტებისთვის ლექციები უფასოა და დაფინანსებულია ,,სამედიცინო კორპორაცია ევექსის მიერ. პროგრამის დასასრულს საკვალიფიკაციო ბარიერის გადალახვის შემთხვევაში ყველა მონაწილე დასაქმდება კორპორაციის ქსელში არსებულ ჰოსპიტალში. აჭარაში საექთნო პროფესიულ სასწავლო კურსზე საბუთების მიღება 11 მაისს დაიწყო და 11 ივნისამდე გაგრძელდება.

ბათუმის შოთა რუსთაველის სახელმწიფო უნივერსიტეტში სტუდენტური ვორკ-შოპი ჩატარდა თემაზე: „ფარმაცია ჯანმრთელი მომავლისათვის“. ფარმაციის სპეციალობის პირველკურსელებმა მოხსენებები წაიკითხეს საკითხებზე: „ქართული ფარმაციის ისტორიის ქრონიკები“, „სამკურნალო მცენარეთა გამოყენების ისტორიული ასპექტები“, „მედიცინა და ფარმაცია ხატოვან აზროვნებაში“. ღონისძიების ფარგლებში პროფესორმა ვლადიმერ მახარაძემ ფარმაციის საუნივერსიტეტო სწავლების მნიშვნელობაზე ისაუბრა, ჭარნალის საჯარო სკოლის XI კლასის მოსწავლემ პრეზენტაცია გამართა თემაზე: „დაფნის ღირსება ეთერზეთებშია“ და დასაქმებულმა კურსდამთავრებულებმა მომავალ კოლეგებს გამოცდილება გაუზიარეს. ვორკ-შოპს სტუდენტთა ფარმაციის კლუბის წევრები, ფარმაციის დეპარტამენტის პროფესორ-მასწავლებლები და საზოგადოების წარმომადგენლები ესწრებოდნენ.

ფრინველთა მიგრაციის საერთაშორისო დღესთან დაკავშირებით საბუნებისმეტყველო მეცნიერებათა და ჯანდაცვის ფაკულტეტის სტუდენტებმა და ეკო-ტურის წევრებმა ასისტ. პროფ. ლალი ჟღენტის ხელმძღვანელობით, აჭარის ა.რ. გარემოს დაცვისა და ბუნებრივი რესურსების სამმართველოს ორგანიზებით ჭოროხის დელტაში გასვლითი ღონისძიება განახორციელეს. სტუდენტებმა ღია ბუნებაში მოისმინეს ჰოლანდიელი ექსპერტის რინს ვან დერ ვილტმას პრეზენტაცია ფრინველთა მიგრაციაზე. ახალგაზრდებს დაურიგდათ მაისურები და წიგნები ფრინველების გადაფრენისა და აღრიცხვის შესახებ.

რესპირაციულ დაავადებათა შესწავლის პროექტის ფარგლებში ბათუმის შოთა რუსთაველის სახელმწიფო უნივერსიტეტს კანადელი მკვლევარი, ეპიდემიოლოგი, პროფესორი ჯოშუა ლოვსონი ეწვია. უცხოელი ექსპერტი რექტორის მოვალეობის შემსრულებელს მერაბ ხალვაშს, საბუნებისმეტყველო მეცნიერებათა და ჯანდაცვის ფაკულტეტის დეკანს მარინა ქორიძეს და პროექტის კოორდინატორს, ბსუ-ს პროფესორს ვახტანგ ბერიძეს შეხვდა. უცხოელი ექსპერტის ვიტის მიზანია ქ. ბათუმის ბავშვთა ასაკის კონტიგენტში ასთმის გავრცელების შესწავლისა და წამყვანი რისკ-ფაქტორების იდენტიფიცირების მიმდინარე ანალიზი და ერთობლივი კვლევების განხორციელება. ასთმის დიაგნოსტირების გაუმჯობესება რეგიონში პოლონეთის სილეზიის უნიერსიტეტის ინიციატივით გასული წლის შემოდგომაზე დაიწყო და უკვე გამოკითხულია ბათუმისა და ახლომდებარე რაიონების 6000-მდე მოსწავლე. მკვლევარი საქართველოში ბათუმის შოთა რუსთაველის სახელმწიფო უნივერსიტეტის მოწვევით იმყოფება.

ბიოლოგიის დეპარტამენტის ასოცირებული პროფესორები: ნანი გვარიშვილი, ნინო ლომთათიძე და ასისტენტ პროფესორი გუგული დუმბაძე თურქეთის რესპუბლიკის უმაღლესი განათლების აღმასრულებელი საბჭოს მიერ დაფინანსებული გაცვლითი პროგრამით - MEVLANA ართვინის ჭოროხის უნივერსიტეტში იმყოფებოდნენ. პროგრამის ფარგლებში პროფესორებმა ჩაატარეს ვორქშოპები თემაზე: „აჭარის ძირითადი ეკოსისტემები“, „საქართველოს ძირითადი ეკოლოგიური პრობლემები“, „ბიორიტმების გავლენა ადამიანზე“ და ჩატარდა ტესტირება სტუდენტთა ქრონოტიპების დასადგენად. პროფესორები ასევე გაეცნენ ართვინის ჭოროხის უნივერსიტეტის სამეცნიერო-კვლევით ლაბორატორიებს და თურქი კოლეგების სამეცნიერო მუშაობის მიმართულებებს.