ბათუმის შოთა რუსთველის სახელმწიფო უნივერსიტეტში ეკონომიკისა და ბიზნესის ფაკულტეტის 25 წლის იუბილე საზეიმოდ აღინიშნა. ბსუ-ს რექტორმა, პროფესორმა მერაბ ხალვაშმა ფაკულტეტს იუბილე მიულოცა, მის ისტორიაზე, მიღწევებზე ისაუბრა და უნივერსიტეტის განვითარებაში შეტანილი განსაკუთრებული წვლილისათვის უნივერსიტეტის უმაღლესი ჯილდო - შოთა რუსთველის მედალი - გადასცა. ფაკულტეტს საიუბილეო თარიღი მიულოცეს და წარმატებები უსურვეს აჭარის ა.რ. უმაღლესი საბჭოს თავმჯდომარემ დავით გაბაიძემ, აჭარის ა.რ. ფინანსთა და ეკონომიკის მინისტრმა ჯაბა ფუტკარაძემ, აჭარის ა.რ სოფლის მეურნეობის მინისტრმა ზაზა შავაძემ, ბსუ-ს ადმინისტრაციის უფროსმა მერაბ დიასამიძემ, ბსუ-ს ხარისხის უზრუნველყოფის სამსახურის უფროსმა ვლადიმერ ღლონტმა, კურსდამთავრებულებმა, სხვადასხვა უმაღლესი საგანმანათლებლო დაწესებულებების, ბიზნეს სექტორისა და საზოგადოების წარმომადგენლებმა.

ბათუმის შოთა რუსთაველის სახელმწიფო უნივერსიტეტის ეკონომიკა და ბიზნესის ფაკულტეტს ქალაქ ბათუმის წმ. ანდრია პირველწოდებულის სახელობის სკოლის მე-10 კლასის მოსწავლეები ეწვივნენ, რომლებიც ეროვნული სასწავლო გეგმის ფარგლებში სწავლობენ მეწარმეობას. სტუმრებს მასპინძლობა გაუწიეს ფაკულტეტის დეკანმა, პროფესორმა ნათია წიკლაშვილმა და მისმა ასისენტმა, ასისტენტ-პროფესორმა თამარ ფოლადაშვილმა. შეხვედრას ესწრებოდნენ ფაკულტეტის სტუდენტებიც. მოსწავლეებმა „მეწარმეობის“ ფარგლებში აქტუალური და საინტერესო პრეზენტაციები წარმოადგინეს თემებზე: საქართველოს ბუნებრივი რესურსები, როგორც წარმოების ფაქტორები; გამოჩენილი ქართველი მეწარმე-ბიზნესმენები და თანამედროვე ქართული ბიზნესი. სტუდენტებსა და მოსწავლეებს შორის დაისახა თანამშრომლობის ახალი მიმართულებები. მოსწავლეებს გადაეცათ სამახსოვრო საჩუქრები.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის სტუდენტებმა საქართველოს შემოსავლების სამსახურის საბაჟო კონტროლის ზონა - საბაჟო გამშვები პუნქტი „სარფი“ და გაფორმების ეკონომიკური ზონა „ბათუმი" (ადლია) - მოინახულეს. გაცნობითი ხასიათის ვიზიტ-სემინარი მიზნად ისახავდა საზოგადოებაში საბაჟო ცნობიერების ამაღლებასა და სტუდენტების დახმარებას პროფესიულ ორიენტაციაში. შემოსავლების სამსახურის საბაჟო დეპარტამენტების თანამშრომლების დახმარებით, სტუდენტებს შესაძლებლობა მიეცათ, პრაქტიკულად გაცნობოდნენ საბაჟო გამშვებ პუნქტზე მგზავრების, სატრნასპორტო საშუალებებისა და საქონლის გატარების პროცესს, დათვალიერებისა და გაფორმების, საბაჟო კონტროლისა და ზედამხედველობის, სკანირების თავისებურებებს.

ბათუმის შოთა რუსთაველის სახელმწიფო უნივერსიტეტის ეკონომიკისა და ბიზნესის ფაკულტეტის ასოცირებულ პროფესორ ბესიკ ბოლქვაძის საჯარო ლექცია ჩატარდა თემაზე: „სათამაშო ბიზნესი: მითი და რეალობა (მსოფლიო გამოცდილება და საქართველო)“. ეკონომიკისა და ბიზნესის ფაკულტეტის 25 წლის იუბილესადმი მიძღვნილ საჯარო ლექციაზე მომხსენებელმა განიხილა აზარტული თამაშების ევოლუცია, სათამაშო ბიზნესის თანამედროვე გლობალური ტრენდები და რეგულაციები, ასევე საქართველოში სათამაშო ინდუსტრიის ფუნქციონირების პრობლემური საკითხები. საჯარო ლექციას ესწრებოდნენ ეკონომიკისა და ბიზნესის ფაკულტეტის პროფესორ-მასწავლებლები, სტუდენტები და კურსდამთავრებულები. ლექცია დისკუსიის რეჟიმში გაგრძელდა და ასოცირებულმა პროფესორმა ბესიკ ბოლქვაძემ აქტუალურ შეკითხვებს უპასუხა.

ბსუ-ს ეკონომიკისა და ბიზნესის ფაკულტეტის ასისტენტ-პროფესორი გიორგი ქათამაძე შოთა რუსთაველის საქართველოს ეროვნული სამეცნიერო ფონდის 2022 წლის ახალგაზრდა მეცნიერთა კვლევების გრანტით დაფინანსების კონკურსის გამარჯვებულია. პროექტის „მცირე და საშუალო ბიზნეს სუბიექტების კრიზისი და მისი პრევენცია პოსტ-პანდემიურ პერიოდში საქართველოში“ ხანგრძლივობაა 2 წელი. ახალგაზრდა მეცნიერის მენტორია ბათუმის შოთა რუსთაველის სახელწიფო უნივერსიტეტის ეკონომიკისა და ბიზნესის ფაკულტეტის დეკანი, პროფესორი ნათელა წიკლაშვილი. ახალგაზრდა მეცნიერის კონსულტანტებია ამავე ფაკულტეტის ასოცირებული პროფესორები ბადრი გეჩბაია და გიორგი აბუსელიძე. პროექტს ჰყავს უცხოელი კონსულტანტი, ბულგარეთის, ქ. სვიშტოვის დ. ცენოვის სახელობის ეკონომიკის აკადემიის პროფესორი მარიანა პეტროვა.