ბათუმის შოთა რუსთაველის სახელმწიფო უნივერსიტეტში უანგარო დონორთა აქცია „ჯანმრთელი სისხლი ყველას” გაიმართა. უმაღლესი საგანმანათლებლო დაწესებულების სტუდენტებმა, პროფესორ-მასწავლებლებმა და თანამშრომლებმა უანგაროდ გაიღეს სისხლი და თანადგომა გამოხატეს იმ ადამიანების მიმართ, რომელთაც დახმარება სჭირდებათ. სისხლის ბანკის შესავსებად ბსუ-ში რამდენიმე წელია ეტაპობრივად იმართება უანგარო დონორთა აქცია. ღონისძიება უნივერსიტეტის საბუნებისმეტყველო მეცნიერებათა და ჯანდაცვის ფაკულტეტისა და საქართველოს მედიკოსთა ასოციაციის ორგანიზებით მოეწყო.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის ჯანდაცვის მიმართულების პროფესორ-მასწავლებლები და სტუდენტები „თეთრი ხალათების“ აქციას შეუერთდნენ და საოკუპაციო რეჟიმის მიერ უკანონოდ დაკავებულ ექიმს, ვაჟა გაფრინდაშვილს სოლიდარობა გამოუცხადეს.

ბათუმის შოთა რუსთველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებმა და სტუდენტებმა მონაწილეობა მიიღეს სტუდენტური თვითმმართველობის ორგანიზებულ გამწვანების აქციაში. ახალგაზრდებმა ქალაქ ბათუმის გორგასალის ქუჩის მიმდებარე ტერიტორიაზე დარგეს დიდფოთოლა მაგნოლიას, ტუიას და გინკო ბილობას ნერგები. ღონისძიება ქალაქის გამწვანებისა და ლანდშაფტური დაგეგმარების სამსახურის მხარდაჭერით ჩატარდა.

წარმატებით გაიარა პროგრამული აკრედიტაცია ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის დიპლომირებული მედიკოსის ინგლისურენოვანმა საგანმანათლებლო პროგრამამ. ვულოცავთ ფაკულტეტის სტუდენტებსა და პროფესორ-მასწავლებლებს მნიშვნელოვან გამარჯვებას და წარმატებებს ვუსურვებთ.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის ბიოლოგიის დეპარტამენტმა USAID-ის ფინანსური მხარდაჭერით და კავკასიის გარემოსდაცვითი არასამთავრობო ქსელის (CENN) ორგანიზებით ძველი ბულვარის მიმდებარე ტერიტორიაზე შავი ზღვის სანაპიროს დასუფთავების აქცია მოაწყო. ღონისძიება პროგრამის - ნარჩენების მართვის ტექნოლოგიები რეგიონებში (WMTR II) ფაზა II-ის ფარგლებში გაიმართა. შავი ზღვის დაცვის საერთაშორისო დღისადმი მიძღვნილ აქციაში ფაკულტეტის პროფესორ-მასწავლებლები, სტუდენტები, სკოლა ევრო 2000-ის და სკოლა მონპარნასის მოსწავლეები მონაწილეობდნენ.