ტყის დაცვის საერთაშორისო დღე ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის სპეციალობის I კურსის სტუდენტებმა სემინარით აღნიშნეს. ბათუმის ბოტანიკურ ბაღში ფლორისა და კონსერვაციის განყოფილების მთავარმა სპეციალისტმა დავით ხარაზიშვილმა ტრენინგი ჩაატარა თემაზე: ,,აჭარის ტყის ეკოსისტემები". ახალგაზრდები გაეცნენ ტყის ეკოსისტემის მრავალფეროვნებას, იშვიათ და ქრობად სახეობებს, კონსერვაციულ ღონისძიებებს და პრობლემებს. სემინარის დასრულების შემდეგ ახალგაზრდებმა ამიერკავკასიის ტენიანი სუბტროპიკების ფიტოგეოგრაფიული განყოფილება დაათვალიერეს.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის აკრედიტებული სამაგისტრო საგანმანათლებლო პროგრამის „საზოგადოებრივი ჯანდაცვა“ პრეზენტაცია გაიმართა. პროგრამის ხელმძღვანელმა ასოცირებულმა პროფესორმა სალომე ღლონტმა აკადემიურ პერსონალთან და მოწვეულ პედაგოგებთან ერთად, სტუდენტებსა და მედიცინის სხვადასხვა დარგის სპეციალისტებს „საზოგადოებრივი ჯანდაცვის“ მიზნები და ამოცანები გააცნო. სამაგისტრო პროგრამის კურსდამთავრებულს შესაძლებლობა ექნება დასაქმდეს ჯანდაცვის სფეროს სხვადასხვა სტრუქტურაში, შრომის, ჯანმრთელობისა და სოციალური დაცვის სამინისტროში, სამედიცინო დაწესებულებებში, საზოგადოებრივი ჯანმრთელობის ეროვნულ ცენტრში, დაავადებათა კონტროლისა და საზოგადოებრივი ჯანდაცვის ეროვნული ცენტრში, კორპორაციულ, არასამთავრობო და საერთაშორისო ორგანიზაციებში.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ბიოლოგიის II კურსის სტუდენტებმა კურატორი ლალი ჟღენტის ხელმძღვანელობით ბათუმის წმინდა მოწამე ეკატერინეს სახელობის სათნოების სახლში მოაწყვეს საქველმოქმედო აქცია დევიზით - ”ჩვენც დავბერდებით”. ახალგაზრდებმა სათნოების სახლში მცხოვრებ ქალბატონებს ქალთა საერთაშორისო დღე - 8 მარტი მიულოცეს და ტკბილეულთან ერთად ყვავილები მიართვეს.

საბუნებისმეტყველო მეცნიერებათა და ჯანდაცვის ფაკულტეტის ქიმიის დეპარტამენტის ორგანიზებით საჯარო და კერძო სკოლების მოსწავლეებისათვის ვორქშოფი მოეწყო თემაზე: „ქიმია და ყოველდღიურობა“. ქიმიის და ჯანდაცვის სპეციალობების სტუდენტებმა: ზეინაბ გობაძემ, ვარა ირემაძემ, ანა მეფარიშვილმა და ხატია ჩხაიძემ ნაშრომები წარმოადგინეს ქიმიის, ეკოლოგიისა და ჯანდაცვის აქტუალურ პრობლემებზე. ახალგაზრდებმა ყურადღება გაამახვილეს მოსწავლეებისთვის ისეთ მნიშვნელოვან საკითხებზე, როგორიცაა: კვების პროდუქტების ფალსიფიკაცია, ქიმია და ჭარბი წონა, ახალი სამედიცინო პრეპარატები, ახალი ბიოლოგიური პოლიმერების სინთეზი.

სრულიად საქართველოს, ჩემს სათაყვანებელ კუთხეს, მშობლიური უნივერსიტეტის პროფესორ მასწავლებლებსა და მთელ პერონალს, სტუდენტობას ვულოცავ დამდეგ შობა-ახალ წელს! 2015 წელი საუკეთესო ცვლილებების, სიხარულის, წარმატებების, სურვილების ასრულების, მშვიდობის, სიძლიერის, სიმტკიცისა და სტაბილურობის მომტანი ყოფილიყოს. თითოეულ ჩვენთაგანს, განსაკუთრებით კი მომავალ თაობას, ჩვენს სტუდენტობას შრომისმოყვერეობით, პროფესიონალიზმით, საქმის სიყვარულითა და ერთგულებით თავისი წვლილი შეეტანოს ქვეყნისა და ჩვენი უნივერსიტეტის წინსვლაში.

ღმერთის კურთხევა არ მოკლებოდეს ჩვენს ერს.

საბუნებისმეტყველო მეცნიერებათა და ჯანდაცვის ფაკულტეტის დეკანი პროფესორი მარინა ქორიძე