საგანმანათლებლო პროექტის „უნივერსიტეტის დახმარება სკოლებს STEM მეცნიერებების პოპულარიზაციაში“ ფარგლებში, ქიმიის დეპარტამენტმა უმასპინძლა ბათუმის სკოლა მასტერკლასისა და XVI საჯარო სკოლის მოსწავლეებსა და პედაგოგებს. ბსუ-ს გამარჯვებული პროექტის ხელმძღვანელმა, ქიმიის სპეციალობის II კურსის სტუდენტმა, კახა კოტრიკაძემ სტუმრებს ესაუბრა მეცნიერული კვლევითი პროექტების მნიშვნელობაზე და გააცნო ეთერზეთების მიმართულებით კვლევების თანამედროვე მიდგომები, აგრეთვე პროექტის ფარგლებში მიღებული შედეგები, რითაც მოსწავლეებს კიდევ ერთხელ დაანახა STEM დარგების მნიშვნელობა მომავალი კონკურენტუნარიანი სპეციალისტის ჩამოყალიბებაში.

ბსუ-ს საბუნებისმეტყველო მეცნიერებათა და ჯანდაცვის ფაკულტეტმა გაცვლითი პროგრამის ფარგლებში, საერთაშორისო მობილობით 2024-2025 სასწავლო წლის შემოდგომის სემესტრში, კ. ზუბანოვის სახელობის აკტობეს რეგიონალური (ყაზახეთის) სახელმწიფო უნივერსიტეტის სტუდენტებს ბოლებაი გულზჰან მურატკესე-ს და ბეკტასოვა ტომირის სამატოვნა-ს მონიკა მილაკს უმასპინძლა.

27-29 ნოემბერს, აზერბაიჯანის დედაქალაქ ბაქოში გაიმართა მე-6 საერთაშორისო ევრაზიული სამეცნიერო კონფერენცია „RISK-2024 ინოვაციები კლიმატის ცვლილების ბუნებრივი და ადამიანის მიერ გამოწვეული რისკების მინიმიზაციისთვის: მეთოდოლოგია და პრაქტიკა“, COP-29-ის ეგიდით. COP 29 არის გაეროს კლიმატის ცვლილების კონფერენცია, რომელიც იმართება ყოველწლიურად და არის მსოფლიოში ერთადერთი მრავალმხრივი გადაწყვეტილების მიმღები ფორუმი კლიმატის ცვლილების შესახებ, რომელიც აერთიანებს დედამიწის თითქმის ყველა ქვეყანას, რათა შეთანხმდნენ კლიმატის კრიზისის მოსაგვარებლად ქმედებებზე, როგორიცაა ნულოვანი გამონაბოლქვი 2050 წლისთვის.

საბუნებისმეტყველო მეცნიერებათა და ჯანდაცვის ფაკულტეტის ბიოლოგიის სამაგისტრო საგანმანათლებლო პროგრამის სტუდენტი ლანა ირემაძე 18-22 ნოემბერს „Erasmus+“- ის შერეული ინტენსიური პროგრამის "ველური ბუნების მართვა და კონსერვაცია ადამიანის მიერ შეცვლილ ეკოსისტემებში" ფარგლებში იმყოფებოდა ლიეტუვაში, ვიტაუტას მაგნუსის უნივერსიტეტში. პროგრამა მოიცავდა თეორიულ და პრაქტიკულ ტრენინგებს, მათ შორის ონლაინ და პირისპირ ლექციებს, დისკუსიებს, თვითშესწავლას, სტუდენტების პრეზენტაციებს, საველე გამოცდილებას და ევროპის ბიზონების პოპულაციის მონახულებას. სტუდენტმა მიიღო პრაქტიკული ნადირობის გამოცდილება. აღნიშნულ პროგრამაში მონაწილეობით გაიგო ველური ბუნების პოპულაციის აღდგენის, ტყის ეკოსისტემებსა და სოფლის მეურნეობაში მათი როლის შესახებ, საველე-პრაქტიკული მუშაობის გამოცდილება, რაც სტუდენტს სამომავლოდ დაეხმარება კარიერულ წინსვლაში.

ბათუმის შოთა რუსთაველის სახელმწიფო უნივერსიტეტში დასრულდა გამარჯვებული სტუდენტური კულტურულ-საგანმანათლებლო პროექტი „Gather2Gether-2", რომელიც მიზნად ისახავდა ქართველი და უცხოელი სტუდენტების დაახლოებას, კულტურის გაზიარებას, შემეცნებითი ღონისძიებების განხორციელებას და ინტეგრაციის გაძლიერებას. პროექტი მოიცავდა რამდენიმე მნიშვნელოვან აქტივობას, მათ შორის პოსტერების კონკურსს სახელწოდებით „ინტეგრაცია და მიმღებლობა" და ფოტოკონკურსს „მრავალფეროვნება რეალურ ცხოვრებაში".