წყლის რესურსების დაცვის საერთაშორისო დღეს ბათუმის შოთა რუსთაველის სახელმწიფო უნივერსიტეტის ქიმიის დეპარტამენტის პროფესორ-მასწავლებლები და ქიმიის სპეციალობის სამივე საფეხურის სტუდენტები კომპანია „ბათუმის წყალს“ ეწვივნენ. მასპინძელი ორგანიზაციის ხელმძღვანელმა ალექსანდრე მჟავანაძემ და კომპანიის წარმომადგენლებმა შეხვედრაზე სტუდენტებს გააცნეს ქალაქის წყალმომარაგების რესურსები, მართვის საკითხები და სასმელი წყლის ტექნიკური რეგლამენტით გათვალისწინებულ კვლევები. შეხვედრაზე დაიგეგმა ქიმიის სპეციალობის სტუდენტებთან და კურასდამთავრებულებთან სამომავლო თანამშრომლობის პერსპექტივები და მიმართულებები. ვიზიტი ბსუ-სა და ბათუმის წყალს შორის გაფორმებული თანამშრომლობის მემორანდუმის ფარგლებში შედგა.

ტყის საერთაშორისო დღე ბსუ-ს სტუდენტებმა და პროფესორ-მასწავლებლებმა რამდენიმე ღონისძიებით აღნიშნეს. მაჭახელას ეროვნული პარკის ბუნებრივი რესურსების მთავარმა სპეციალისტმა მარად იაკობაძემ ეკოლოგიის და ბიოლოგიის სპეციალობის სტუდენტებს გააცნო მაჭახელას დაცული ტერიტორიის ბიომრავალფეროვნება და ესაუბრა მათი მნიშვნელობის შესახებ. გეოგრაფიის საგანმანათლებლო პროგრამის სტუდენტებმა და პროფესორ-მასწავლებლებმა მაჭახელას ეროვნულ პარკში ერთობლოვად ჩაატარეს ღონისძიება, გაიმართა ლექცია დაცული ტერიტორიების მნიშვნელობისა და მაჭახელას ეროვნული პარკის ბიომრავალფეროვნების შესახებ.

საბუნებისმეტყველო მეცნიერებათა და ჯანდაცვის ფაკულტეტმა უმასპინძლა ტრაბზონის მეთევზეობის ცენტრალური კვლევითი ინსტიტუტის წარმომადგენლებს. სტუდენტები, ფაკულტეტის მოწვეული მასწავლებლის, რამაზ მიქელაძის ორგანიზებით შეხვდნენ ტრაბზონის მეთევზეობის ცენტრალური კვლევითი ინსტიტუტის დირექტორს, ერჯან ქუჩურს, დირექტორის ტექნიკურ მოადგილეს, აჰმეთ ფარუკ იეშილსუს და გენეტიკის დეპარტამენტის უფროსს, შირინ ფირიდინის. სტუმრებმა სტუდენტებს გააცნეს მეთევზეობის ცენტრალურ კვლევით ინსტიტუტში მიმდინარე აქტივობები, კვლევითი სამუშაოები, აკვაკულტურისა დ მარიკულტურის მიმართულების მიღწევები. ვიზიტის ფარგლებში ინსტიტუტის წარმომადგენლებმა ფაკულტეტის დეკანთან, პროფესორ რუსუდან ხუხუნაიშვილთან გამართულ შეხვედრაზე განიხილეს ფაკულტეტის სტუდენტთა ერთობლივი სასწავლო-საგანმანათლებლო პროექტების განხორციელების პერსპექტივები.

ბათუმის შოთა რუსთაველის სახელმწიფო უნივერსიტეტის რექტორი, პროფესორი მერაბ ხალვაში, რექტორის მოადგილე, ასოცირებული პროფესორი ანზორ ბერიძე და ადმინისტრაციის ხელმძღვანელი, ასოცირებული პროფესორი მერაბ დიასამიძე საბუნებისმეტყველო მეცნიერებათა და ჯანდაცვის ფაკულტეტის პროფესორ-მასწავლებლებს შეხვდნენ. შეხვედრაზე ფაკულტეტის დეკანმა, პროფესორმა რუსუდან ხუხუნაიშვილმა 2023 წელს ჩატარებული მუშაობის ანგარიში წარადგინა, უნივერსიტეტის რექტორი მერაბ ხალვაში ფაკულტეტის პროფესორ-მასწავლებლებს უნივერსიტეტის სამომავლო გამოწვევებსა და დაგეგმილ აქტივობობეზე ესაუბრა.

ბსუ-ს საბუნებისმეტყველო მეცნიერებათა და ჯანდაცვის ფაკულტეტის შინაგანი მედიცინის დეპარტამენტის ასოცირებულმა პროფესორმა ეთერ ჯაყელმა ხელვაჩაურის მუნიციპალიტეტის ჭარნალის საჯარო სკოლის მოსწავლეებთან შეხვედრისას წაიკითხა ლექცია თემაზე: „რა არის ფარმაცია“. მომხსენებელმა ისაუბრა ფარმაციის არსზე, ფარმაცევტის დასაქმების სფეროებზე, ფარმაცევტის როლსა და საჭიროებაზე საზოგადოებისათვის. განსაკუთრებით საინტერესო იყო შეხვედრის პრაქტიკული ნაწილი, სადაც მოსწავლეებმა საკუთარი ხელით დაამზადეს წამლის ფორმა - ფხვნილები, მოცემული რეცეპტის მიხედვით. დაიგეგმა შეხვედრის ჩატარება ბათუმის შოთა რუსთაველის სახელმწიფო უნივერსიტეტში.