ყარაგანდის სამედიცინო უნივერსიტეტის მიკრობიოლოგიის დეპარტამენტის პროფესორებმა აბდულინა გალია ამერბეკოვმა და ახმეტოვა საულე ბალტაბაევნამ მედიცინის პროგრამის სტუდენტებისთვის წაიკითხეს საჯარო ლექციები და ჩაატარეს პრაქტიკული და ლაბორატორიული კურსი მიკრობიოლოგიაში. ლექციების კურსი მოიცავდა შემდეგ საკითხებს: კლინიკური ბაქტერიოლოგია, მიკროორგანიზმების ეკოლოგია, ადამიანის ნორმალური მიკროფლორა და ჰოსპიტალური ინფექციები. ყარაგანდელმა ბიოოლოგებმა მომავალი მედიკოსებისათვის ასევე, ჩაატარეს მასტერკლასი მიკრობიოლოგიის აქტუალურ თემებზე. ღონისძიებები ბათუმის შოთა რუსთაველის სახელმწიფო უნივერსიტეტსა და ყარაგანდის სახელმწიფო სამედიცინო უნივერსიტეტს შორის გაფორმებული მემორანდუმის ფარგლებში გაიმართა.

ბსუ-ს ქიმიის დეპარტამენტმა აჭარის კერძო და საჯარო სკოლის მოსწავლეებს უმასპინძლა. პროფესორებმა სტუმრებს პროგრამული და სახალისო ცდები აჩვენეს.
მოსწავლეებმა სასწავლო და კვლევითი ლაბორატორიები და დასავლეთ საქართველოს რეგიონული ქრომატოგრაფიული ცენტრი დაათვალიერეს. შეხვედრა უნივერსიტეტში პროექტის „ უნივერსიტეტი ფართო საზოგადოებისათვის’’ ფარგლებში გაიმართა.

ფრინველთა მიგრაციის კვირეულის ეგიდით ბიოლოგიისა და ეკოლოგიის სპეციალობის I კურსის სტუდენტები პალიასტომის ტბისა და მდ. მალთაყვის მიდამოებში ბინოკლებითა და ტელესკოპით დააკვირდნენ გადამფრენ ფრინველებს. ღონისძიების ფარგლებში კოლხეთის ეროვნულ პარკში სტუდენტებმა მოისმინეს ხათუნა ქაცარავასა (ეროვნული პარკის მეცნიერ-თანამშრომელი) და ასლან ბოლქვაძის (კინტრიშის დაცული ტერიტორიების მეგობართა ასოციაციის დირექტორი) ლექციები კოლხეთის ეროვნული პარკის ბიომრავალფეროვნებისა და ფრინველთა მიგრაციის ფენომენის შესახებ. ლექციის დასასრულს ახალგაზრდებს სარკვევები და ბროშურები დაურიგდათ ფრინველების გადაფრენისა და აღრიცხვის შესახებ. ღონისძიება საბუნებისმეტყველო მეცნიერებათა და ჯანდაცვის ფაკულტეტისა და აჭარის ა.რ. გარემოს დაცვისა და ბუნებრივი რესურსების სამმართველოსა და კინტრიშის დაცული ტერიტორიების მეგობართა ასოციაციის ორგანიზებით ჩატარდა.

აჭარის ავტონომიური რესპუბლიკის უმაღლეს საბჭოს ბათუმის შოთა რუსთაველის სახელმწიფო უნივერსიტეტის ჯანდაცვის მიმართულების წარჩინებული ქართველი და უცხოელი სტუდენტები, პროფესორ-მასწავლებლები და აჭარაში მოღვაწე ღვაწლმოსილი ექიმები ეწვივნენ. აჭარის უმაღლესი საბჭოს თავმჯდომარის მოადგილემ მერაბ კარანაძემ ღონისძიების მონაწილეებს რეგიონის საკანონმდებლო ორგანოს საქმიანობის პრინციპები გააცნო, ხოლო ჯანმრთელობის დაცვისა და სოციალურ საკითხთა კომისიის თავმჯდომარემ ნუგზარ სურმანიძემ ახალგაზრდებს აჭარაში მოღვაწე წარმატებული ექიმები - ლამარა კალანდარიშვილი, რამაზ სურმანიძე და აკაკი ბერიძე წარუდგინა. თითოეულმა მათგანმა მომავალ მედიკოსებს გამოცდილება გაუზიარეს და ახალგაზრდებისათვის მნიშვნელოვან საკითხებზე ისაუბრეს. ღონისძიება ერთჯერადი ხასიათის არ არის და შეხვედრები მომავალშიც გაიმართება.

ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის ორგანიზებით დნმ-ის კვირეული გაიმართა. ღონისძიების ფარგლებში პროფესორმა რუსუდან ხუხუნაიშვილმა და ასოცირებულმა პროფესორმა მარინა ნაგერვაძემ საჯარო ლექციები წაიკითხეს დნმ-ის აქტუალურ საკითხებზე. პროექტის მონაწილეებმა პრობლემურ ამოცანებზე იმუშავეს. ასევე ახალგაზრდები ლაბორატორიაში ბიოუსაფრთხოების წესებსა და გრამის წესით შეღებვას გაეცნენ. კვირეულის ეგიდით ფლეშმობი „დნმ-ის რეპლიკაცია“ მოეწყო. პროექტში სტუდენტებთან ერთად, ბათუმისა და ხელვაჩაურის საჯარო სკოლისა და ქართულ-ფრანგული სკოლის მოსწავლეები მონაწილეობდნენ.