მინდა სულითა და გულით მოგილოცოთ დამდეგი შობა-ახალი წელი ყველას - სრულიად საქართველოს, ჩემს სათაყვანებელ კუთხეს, ჩვენი მშობლიური უნივერსიტეტის პროფესორ-მასწავლებლებს, მთელ კოლექტივს, სტუდენტ-ახალგაზრდობას, კურსდამთავრებულებს, ყველას, ვისაც უსწავლია, უღვაწია და თავისი წვლილი შეუტანია ჩვენი უნივერსიტეტის წინსვლასა და განვითარებაში.
ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის დიპლომირებული მედიკოსის უცხოენოვანი პროგრამის სტუდენტებმა მონაწილეობა მიიღეს ქუთაისის აკაკი წერეთლის სახელმწიფო უნივერსიტეტში გამართულ კონფერენციაში თემაზე: „XXI საუკუნის მედიცინის მიღწევები“. კონფერენციის თემატიკა მოიცავდა ისეთ მნიშვნელოვან და აქტუალურ საკითხებს, როგორიცაა: ორგანოთა ტრანსპლანტაცია, ნანოტექნოლოგია, ანტიბიოტიკორეზისტენტობა და სხვა. კონფერენციის თითოეულ მონაწილეს სერტიფიკატები გადაეცა.
საბუნებისმეტყველო მეცნიერებათა და ჯანდაცვის ფაკულტეტის მედიცინის IIკურსის სტუდენტმა დავით ქობულაძემ ვლადიმერ ქემხაძის სახელობის სტიპენდია მოიპოვა, გეოგრაფიის II კურსის სტუდენტმა დავით ბაკურაძემ მემედ კომახიძის სახელობის სტიპენდია, ხოლო დიპლომირებული მედიკოსის III კურსის სტუდენტმა კუმარ რავიმ პროფესორ ოთარ ახვლედიანის სახელობის სტიპენდია. ფაკულტეტის სტუდენტები, პროფესორ-მასწავლებლები და ადმინისტრაცია გილოცავთ კონკურსში გამარჯვებას და გისურვებთ წარმატებებს!
ბათუმის შოთა რუსთაველის სახელმწიფო უნივერსიტეტის საბუნებისმეტყველო მეცნიერებათა და ჯანდაცვის ფაკულტეტის სტუდენტებისათვის თსუ-ს პროფესორმა ბესიკ კალანდაძემ სჯარო ლექცია წაიკითხა თემაზე: „ნიადაგის დეგრადაცია - გამოწვევები საქართველოსთვის“. მომხსენებელმა ახალგაზრდებს მიწის დეგრადაცია და მასთან დაკავშირებული პრობლემები გააცნო. საქართველოში მიწის დეგრადაცია განპირობებულია კლიმატურ-რელიეფური თავისებურებებით, გეოდინამიკური პროცესებითა და სხვა გარემო-პირობებით. საქართველოში დათბობისა და კლიმატის არიდიზაციის პროცესები დაემთხვა ნიადაგების გაძლიერებულ დეგრადაციას, რაც კიდევ უფრო ზრდის სოფლის მეურნეობის წარმოების პროდუქტიულობის შემცირებას.
„ჩემი ჯანმრთელობა - ჩემი უფლებაა“ ამ სლოგანით შიდსთან ბრძოლის საერთაშორისო დღე ბათუმის შოთა რუსთაველის სახელმწიფო უნივერსიტეტში C ჰეპატიტისა და აივ ინფექციის სკრინინგ აქციით აღინიშნება. დღის განმავლობაში სტუდენტებსა და პროფესორ-მასწავლებლებს უფასოდ უტარდებათ დაავადებების სკრინინგი. აქციას საბუნებისმეტყველო მეცნიერებათა და ჯანდაცვის ფაკულტეტი აჭარის ა.რ. საზოგადოებრივი ჯანდაცვის ცენტრის, დაავადებათა კონტროლისა და საზოგადოებრივი ჯანმრთელობის ეროვნული ცენტრის აჭარის სამმართველოს მხარდაჭერით ატარებს.
